CAB. XXXVIII

1Eisht dreggyr y Chiarn Job ass y gheay-chassee, as dooyrt eh, 2Quoi eh shoh ta tilgey scadoo harrish creenaght liorish goan gyn tushtey? 3Trog seose nish dty veeghyn myr dooinney; son neem’s fênaght jeed’s, as freggyr uss mish. 4C’raad v’ou tra ren mee undinyn y thallooin y hoiaghey? soilshee eh, my ta tushtey aynyd. 5Quoi ren soiaghey magh yn towshan echey, my ta fys ayd? ny quoi ren line y heeyney er? 6Cre er ta ny undinyn echey er ny hickyraghey? ny quoi ren soiaghey yn ard chlagh-chorneilagh echey, 7Tra ren rollageyn y voghrey nyn arraneyn-moyllee y ghoaill cooidjagh, as tra ren ooilley cloan Yee troggal seose nyn goraa son boggey? 8Ny quoi ren yn aarkey y yeigh seose lesh dorryssyn, tra vrish eh magh myr oikan ass y vreïn? 9Tra ren mee yn bodjal y yannoo son e choamrey, as dorraghys trome ny chryss-soillee da, 10As tra chleiy mee seose yn ynnyd kiarit er y hon, as yeigh mee stiagh eh lesh boltyn as dorryssyn, 11As tra dooyrt mee, Choud shoh hig oo, agh cha jig oo ny-sodjey; as shoh y raad vees dty honnyn moyrnagh er nyn lhiettal? 12Nee uss t’er reill yn voghrey rish dty hraa; as er chiartaghey raad son brishey’n laa; 13Dy roshtyn gys ardjyn sodjey magh y thallooin, as dy eiyrt ersooyl ny drogh-yantee? 14Te er ny hyndaa myr cray gys yn seal; as er ny chaghlaa myr coamrey. 15As veih ny mee-chrauee ta’n soilshey er ny reayll, as bee’n roih ard er ny vrishey. 16Vel uss er n’gholl stiagh gys moir ushtaghyn ny marrey? ny vel oo er hooyl ayns diunidyn yn aarkey? 17Vel giattyn y vaaish er ve foshlit hood’s? as vel oo er vakin dorryssyn scadoo’n vaaish? 18Vel oo er chronnaghey lheead y thalloo? soilshee eh, my ta fys ayd er ooilley. 19C’raad ta bun y toilshey? as er son dorraghys, c’raad te goaill, 20Dy voddagh oo geiyrt er gys e chagliagh, as fys ’ve ayd er ny cassanyn ta leeideil gys e oayll? 21Vel oo toiggal shoh, son dy r’ou eisht ruggit? as dy vel earroo dty laghyn mooar? 22Vel uss er n’gholl stiagh gys tashtaghyn y sniaghtey? ny vel oo er vakin creaghyn y sniaghtey-garroo, 23Shen ny ta mee er reayll ry-hoi earish seaghyn, ry-hoi laa cragh as caggey? 24Liorish cre’n raad ta’n soilshey er ny rheynn, ta skeayley geay-niar harrish y thalloo? 25Quoi t’er yiarey magh coorse-ushtey son ny thooillaghyn; ny raad son tendreil y taarnagh; 26Dy chur er y fliaghey dy heet neose er y thalloo, raad nagh vel dooinney erbee; er yn aasagh, raad nagh vel dooinney cummal; 27Dy yannoo magh yn thalloo feayn as faasagh, as dy chur er blaa yn ghlassyraght oor dy chur magh? 28Vel ayr ec y fliaghey? ny quoi hooar bineyn y druight? 29Ass quoi’n vreïn haink y rio? as lheeah-rio yn aer, quoi t’er yiennaghtyn eh? 30Ta ny ushtaghyn coodit myr lesh clagh, as ta eddin y diunid riojit. 31Vod oo bannaghtyn millish y Trilleen y lhiettal, ny kianglaghyn Orion y eaysley? 32Vod oo Mazzaroth y chur magh ayns e imbagh? ny vod oo Arcturus y leeideil marish e vec? 33Vel toiggal ayd’s jeh oardaghyn niau? nee uss oddys goardrail yn reill oc er yn ooir? 34Vod oo dty choraa y hroggal seose gys ny bodjallyn, dy vod ad mooarane ushtey y gheayrtey neose dhyt? 35Vod oo ny tendreilyn y lhiggey, dy jean ad goll, as gra rhyt, Shoh’n raad ta shin? 36Quoi t’er choyrt creenaght ayns yn aigney? ny quoi t’er choyrt tushtey ayns y chree? 37Cre’n chreenaght oddys towse ny bodjallyn? ny quoi oddys moir ushtaghyn yn aer y lhiettal, 38Tra ta’n thalloo sponkit gys joan, as ny ceabyn lhiantyn creoi dy cheilley? 39Jean oo shelg son cragh da’n lion? ny accyrys ny lionyn aegey y yannoo magh, 40Tra t’ad lhie croymmey ayns nyn ooigyn, as cooyl-chlea fo coodagh ny keylljyn? 41Quoi ta kiarail beaghey son y feeagh? tra ta e eeanlee geamagh gys Jee, t’ad rouail mygeayrt son laccal bee.