CAB. XXXIX

1Vel fys ayd’s cre’n traa ta goair feïe y chreg gymmyrkey? as vel toiggal ayd’s cuin ta ny feeaïhee breh? 2Vod uss goardrail ny meeaghyn t’ad goll; as nee foyd’s ta’n traa daue dy ymmyrkey nyn ingan? 3T’ad dy chroymmey ad-hene, t’ad breh nyn lheiyee, garveigagh ayns pian. 4Ta nyn lheiyee ayns callin vie, t’ad gaase seose lesh arroo; t’ad cosney roue, as cha vel ad chyndaa huc arragh. 5Quoi t’er chur reamys da’n assyl fadane? ny quoi t’er eaysley kianglaghyn yn assyl oaldey? 6Yn fastee echey ta mee er n’yannoo ’syn aasagh, as y reeastane dy ve e chummal. 7Cha vel eh agh jannoo craid jeh ymmodee yn ard-valley, chamoo t’eh cur geill da coraa yn immanagh. 8Ta’n aber echey trooid slane reamys ny sleityn, as t’eh ronsagh lurg dy chooilley cheint dy ghlassyraght. 9Der oo er yn unicorn dy hirveish oo dy arryltagh, ny tannaghtyn liorish dty chratch? 10Vod oo yn unicorn y yokal ’sy whing son traaue? ny jean eh ny coanyn y chleiee er dty hon? 11Jean oo treishteil er, son dy vel e niart mooar? as jean oo dt’obbyr y aagail da? 12Vod oo credjal dy der eshyn lesh thie dty arroo, as chaglym stiagh eh gys dty hoalt? 13Nee uss hug ny skianyn aalin da’n peacock, ny skianyn as fedjagyn da’n ostrich? 14Ta faagail ny oohyn eck ’syn ooir, as lhiggey daue guirr ’sy ghenniagh. 15As jarrood dy vod y chass ad y vroo, ny’n beisht feïe ad y vrishey. 16T’ee creoghit noi e eeanlee, myr nagh beagh ad lh’ee hene: ta’n obbyr eck ayns fardail gyn aggle; 17Er-yn-oyr dy vel Jee er n’obbal creenaght jee, chamoo t’eh er yannoo magh ee lesh tushtey. 18Tra t’ee troggal seose ee-hene dy ard, cha vel ee agh jannoo craid jeh’n chabbyl as e varkiagh. 19Nee uss hug troshid da’n niagh? nee uss ren coamrey e wannal lesh taarnagh? 20Vod oo aggle y chur ayn, myr ayns y lheimeyder-faiyr? ta gloyr e stroanyn atchimagh. 21T’eh cleiy yn choan lesh e chass, as boggyssagh ayns e niart: t’eh goll er e hoshiaght quail ny deiney-caggee. 22T’eh craidey mysh aggle, as cha vel atchim bentyn rish; chamoo t’eh cur cooyl da’n chliwe. 23Ta’n bolg-side feiyral n’oï, yn shleiy sollys as yn eilley-caggee. 24T’eh sluggey seose y thalloo lesh eulys, as t’eh er-rouyl; chamoo ta scansh erbee echey jeh sheean y trumpet. 25T’eh shutternee mastey ny cayrnyn, Ha, ha! as t’eh soaral y chaggey veih foddey, taarnagh ny captanyn, as yn eam caggee. 26Nee liorish yn chreenaght ayd’s ta’n shawk getlagh, as skeayley magh e skianyn lesh y jiass? 27Vel yn urley getlagh seose er dty harey’s, as jannoo yn edd eck ’syn yrjid? 28T’ee soie as cummal er y chreg, er baare ny creggey, as beinn yn eaynee. 29Veih shen t’ee jeeaghyn mygeayrt son y chragh, as ta ny sooillyn eck cronnaghey foddey jeh. 30Ta ny eeanlee eck myrgeddin soo seose fuill: as raad ta ny merriu, shen y raad t’eeish.