CAB. IV

1Eisht dreggyr Eliphaz yn Temanite, as dooyrt eh, 2My ghoys mayd orrin dy resooney rhyt, nagh jean oo goaill olk rish? agh quoi oddys eh-hene y smaghtaghey veih loayrt? 3Cur-my-ner, t’ou uss oo-hene er choyrlaghey ymmodee, as er niartaghey ny laueyn faase. 4Ta dty ghoan er chummal seose eshyn va aarloo dy huittym, as t’ou er niartaghey ny glioonyn annoon. 5Agh nish te er jeet dty raad, as t’ou lhag-chreeagh; te er duittym ort, as t’ou seaghnit. 6Nee shoh dty aggle, dty varrant, dty hreishteil ayns Jee, as ynrickys dty raaidyn? 7Smooinee, ta mee guee ort, quoi ren rieau cherraghtyn, as eh gyn-loght? ny cre’n raad va’n vooinjer chairagh er ny yiarey jeh? 8Eer myr ta mee er vakin, dy vel adsyn ta traaue mee-chairys, as cuirr olkys, buinn y lheid cheddin. 9Liorish blest Yee t’ad cherraghtyn, as liorish ennal e yymmoose t’ad er ny choyrt mow. 10Ta buirroogh y lion, as coraa’n lion dewil, as feeacklyn ny lionyn aegey, er nyn mrishey. 11Ta’n chenn lion goll naardey son laccal e chragh, as ta quallianyn y lion lajer er nyn skeayley. 12Nish va folliaght er ny hoilshaghey dou, as haink eh myr sannish gys my chlashtyn. 13Myr ayns smooinaghtyn veih ashlishyn yn oie, tra ta cadley trome tuittym er deiney, 14Haink aggle orrym, as atchim, hug er ooilley my chraueyn dy ve er-creau. 15Eisht hie spyrryd shaghey kiongoyrt rish my eddin; hrog folt my ching: 16Hass eh roym, agh cha voddin baght y ghoaill jeh e chummey: va scaan roish my hooillyn; va ooilley kiune, as cheayll mee coraa, gra, 17Vod dooinney marvaanagh ve ny s’cairal na Jee? vod dooinney ve ny s’ynrick na e Er-croo? 18Cur-my-ner, cha dug eh veg y varrant ayns e hirveishee; as eer ayns ny ainleyn hug eh my-ner fardalys: 19Cre-woad smoo ayndoosyn ta cummal ayns thieyn dy chray, ta’n undin oc ’sy joan, t’er ny vroo myr y lhemeen? T’ad goll naardey veih’n voghrey gys yn astyr: t’ad cherraghtyn son dy bragh, fegooish scansh ve jeant jeh. 20Nagh vel yn ooashley oc lheïe ersooyl? t’ad geddyn baase, eer fegooish tushtey.