CAB. XL

1Ny-sodjey, dreggyr y Chiarn Job, as dooyrt eh, 2Jean eshyn ta streeu rish yn Ooilley-niartal goaill er dy ynsaghey eh? eshyn ta geddyn foill rish Jee, lhig da gansoor er y hon.

3Eisht dreggyr Job y Chiarn, as dooyrt eh, 4Cur-my-ner, ta mee my chretoor treih; cre t’aym dy reggyrt? lhie-ym my laue er my veeal. 5Keayrt ta mee er loayrt, agh cha jean-ym freggyrt; dy jarroo, daa cheayrt, agh cha jem lesh ny-sodjey. 6Eisht dreggyr y Chiarn Job ass y gheay-chassee, as dooyrt eh, 7Kiartee seose dty veeghyn nish myr dooinney: feysht-ym oo, as soilshee uss dooys. 8Jean uss myrgeddin my vriwnys dy ve dyn bree? jean oo mish y gheyrey, dy vod oo-hene ve er dty heyrey? 9Vel roih ayd’s myr t’ec Jee? er-nonney vod oo taarnaghey lesh dty choraa goll-rishyn? 10Coamree nish oo-hene lesh ard-ooashley as ooilley-niartallys; as soie oo-hene magh lesh gloyr as aalid. 11Skeayl mygeayrt-y-mood eulys dty yymmoose; as cur-my-ner dy chooilley hranlaasagh, as lhieg eh. 12Jeeagh er dy chooilley vooaralagh, as cur eh sheese dy injil; cur ny mee-chrauee fo-chosh ayns nyn gummal. 13Follee ad ayns y joan dy cheilley, as coodee nyn eddin ayns dorraghys. 14Eisht neem’s myrgeddin goaill rhyt dy vod dty laue yesh hene oo y hauail. 15Cur-my-ner nish Behemoth, ta mee er chroo mayrt; t’eh gee faiyr myr dow. 16Cur-my-ner nish, ta’n niart echey ayns e veeghyn, as e vree ayns imleig e volg. 17T’eh troggal e amman myr billey-cedar: ta fehyn e veeghyn er ny sniemmey cooidjagh. 18Ta e chraueyn lajer myr prash, as e asnaghyn myr barryn yiarn. 19T’eh unnane jeh ard-obbraghyn Yee: cha vod agh cliwe yn Er-croo cheet er-gerrey da. 20Son shickyrys ta ny sleityn gymmyrkey magh beaghey da, raad ta ooilley maase y vagher goaill nyn soylley. 21T’eh lhie fo scadoo ny biljyn, fo coodagh yn chuirtlagh, as ny curreeyn. 22T’eh lhie fo scaa ny biljyn choo; ta shellagh ny strooanyn son fastee da. 23Cur-my-ner, t’eh giu seose awin ec e chaa: er-lesh hene dy vod eh Jordan y lhuggey seose lesh e veeal. 24T’eh goaill eh lesh e hooillyn: as lesh e chab t’eh brishey trooid ribbaghyn.