CAB. XLI

1Vod oo Leviathan y hayrn seose lesh croagane? ny’n coyrd t’ou lhiggey sheese y chur trooid e ghruntyn? 2Vod oo dooan y chur ayns ny stroanyn echey? ny’n cheeill echey y hoylley lesh kibbin? 3Jean eh ymmodee accanyn hood? ny brynneraght rhyt ayns goan meeley? 4Jean eh coardail y yannoo rhyt? jean oo goaill eh son dty harvaant gagh-laa? 5Jean oo cloie rish myr rish ushag? ny cur eh er-eistyr son dty vraane aegey? 6Jean oo gaarlaghey eh son dty ghoaldee? jean ad eh y rheynn mastey ny marchanyn? 7Vod oo yn crackan echey y lhieeney lesh yiarnyn friogagh? ny’n kione echey y lhottey lesh listeryn eeastee? 8Lhie dty laue er my s’loys dhyt, cooinee er y chaggey, as faag voïd eh. 9Cur-my-ner, te ayns fardail dy hreishteil er: nagh beagh fer er ny lhieggey ec yn eer shilley jeh? 10Cha by-loys da’n dooinney s’dunnal dy ghoostey eh; quoi eisht ta abyl dy hassoo roym’s? 11Quoi t’er ve ro-laue rhym ayns kenjallys, dooys dy lhiasaghey da? cre-erbee ta fo yn slane niau, she lhiam’s eh. 12Cha jean-ym keiltyn e oltyn, ny e hroshid, ny stoamid cummey e niart. 13Quoi oddys cheu-astan e choamrey y hyndaa? ny quoi oddys cheet huggey lesh streean-volgagh? 14Quoi s’loys da dorryssyn e veeal y osley? s’atchimagh ta e eeacklyn ooilley mygeayrt! 15Ta e scaailey e voyrn, lhiantyn er y cheilley myr lesh seal shickyr. 16T’ad cha chion er y cheilley, nagh vod yn aer sloo cheet eddyr ad. 17T’ad sniemmit yn derrey yeh gys y jeh elley, t’ad lhiantyn ry-cheilley, nagh vod ad ve er ny scarrey. 18Liorish yn streiyraght echey ta soilshey brishey magh, as ta e hooillyn myr ferrooghyn y voghrey. 19T’eh cur magh yn ennal ass e veeal myr strooanyn aile, as myr smarageyn aile lheim mygeayrt. 20Ass ny stroanyn echey ta jaagh goll magh, myr bree oghe ny coirrey. 21T’eh sheidey seose aile lesh e ennal, as ta bree aileagh goll magh er e veeal. 22Ayns e wannal ta niart tannaghtyn, as ta toyrt-mow boggyssagh kiongoyrt rish. 23Ta fillaghyn yn eill echey sniemmit dy cheilley: t’ad lajer orroo hene; cha vod ad ve er ny vrishey. 24Ta e chree co-chreoi rish y chreg; eer, co-chreoi rish peesh jeh clagh-laare y wyllin. 25Tra t’eh troggal seose eh-hene, ta ny treanee fo aggle: son eer atchim t’ad tuittym gys y thalloo. 26Yn cliwe echeysyn ta dy woalley er, cha vod eh cummal rish; yn shleiy, yn gah, ny’n eilley-broghil. 27T’eh dy choontey yiarn myr coonlagh, as prash myr fuygh loau. 28Cha vod y tide cur er-chea: cha vel claghyn-sling huggeysyn agh myr coau. 29Ta’n gah coontit myr stubble: t’eh jannoo craid jeh baggyrt y shleiy. 30T’eh lhie er claghyn gyere: t’eh skeayley e oltyn frioganagh er y laagh. 31T’eh cur er y diunid dy vroie myr pot: as yn aarkey dy ve myr pot ooiley. 32T’eh cur er luddan-mea dy hoilshean ny yeï; heillagh fer yn diunid dy ve lheeah. 33Er yn ooir cha vel tuarystal jeh, cretoor nagh vel aggle ayn. 34T’eh soiaghey beg jeh dy chooilley nhee ard: t’eh ny ree harrish ooilley cloan ny mooaralee.