CAB. XLII

1Eisht dreggyr Job y Chiarn, as dooyrt eh, 2Ta fys aym dy vod oo dy chooilley nhee y yannoo, as nagh vod smooinaghtyn erbee ve gyn-yss dhyt. 3Quoi eh-hene ta goaill er dy hoilshaghey coyrleyn follit? shen-y-fa ta mee er n’ockley magh shen nagh hoig mee; reddyn yindyssagh erskyn my roshtyn, nagh row fys aym orroo. 4Eaisht rhym, ta mee guee ort, as loayr-ym: fên-yms jeed’s, as jean uss y hoilshaghey dooys. 5Cheayll mee jeed’s dy jarroo liorish clashtyn cleayshey; agh nish ta my hooill er dt’akin: 6Shen-y-fa ta dwoaie aym orrym pene, as ta mee goaill arrys ayns joan as leoie.

7As shen myr ve, erreish da’n Chiarn v’er loayrt ny goan shoh rish Job, dy dooyrt y Chiarn rish Eliphaz yn Temanite, Ta my chorree er ny vrasnaghey dt’oï, as noi dty ghaa charrey: son cha vel shiu er loayrt [my-]mychione’s shen ny ta cairagh, myr ta my harvaant Job. 8Shen-y-fa gow-jee nish hiuish shiaght dew as shiaght reaghyn, as immee-jee gys my harvaant Job, as cheb-jee seose er nyn son hene oural-losht; as nee my harvaant Job padjer y ghoaill er nyn son, son eshyn neem’s soiaghey jeh; er-aggle dy dellym riu rere nyn ommijys, ayns wheesh as nagh vel shiu er loayrt my-mychione’s shen ny ta cairagh, myr ta my harvaant Job. 9Myr shen hie Eliphaz yn Temanite, as Bildad yn Shuhite as Zophar yn Naamathite, as ren ad ny va’n Chiarn er harey: ren y Chiarn myrgeddin soiaghey jeh Job. 10As ren y Chiarn cappeeys Yob y hyndaa, tra ghow eh padjer son e chaarjyn: myrgeddin hug y Chiarn da Job ghaa wheesh as v’echey roïe. 11Eisht haink huggey ooilley e vraaraghyn, as ooilley e hayraghyn, as ooilley e ainjyssee, as ghow ad gien mârish ayns e hie; as ghow ad accan jeh, as ren ad eh y gherjaghey son ooilley ny seaghyn va’n Chiarn er choyrt er: hug ad dy chooilley ghooinney da myrgeddin peesh dy argid, as fainey-cleaysh dy airh. 12Myr shoh vannee’n Chiarn jerrey bea Yob ny smoo na’n toshiaght: son v’echey kiare thousaneyn jeig keyrragh, as shey thousane camel, as thousane whing dy ghew, as thousane assyl bwoirryn. 13V’echey myrgeddin shiaght mec, as three inneenyn. 14As denmys eh ennym yn inneen shinney, Jemima; as yn nah unnane, Kezia; as ennym y trass, Keren-happuch. 15As ayns ooilley’n cheer cha row mraane erbee ry-akin cha aalin as inneenyn Yob: as hug nyn ayr daue eiraght mastey nyn mraaraghyn. 16Ny lurg shoh va Job bio shiaght-feed bleïn, as honnick eh e vec, as cloan e chlienney, eer kiare sheelogheyn. 17Myr shen hooar Job baase ayns shenn eash vie, as lane dy laghyn.