CAB. V

1Eïe nish, my ta fer erbee ayn dy dty reggyrt; as gys quoi jeh ny ainleyn nee oo chyndaa? 2Son ta sproght marroo yn dooinney ommijagh, as ta troo stroie yn er mee-hushtagh. 3Ta mee er vakin yn drogh ghooinney goaill fraue: agh dy leah honnick mee mollaght er e hie. 4Ta e chloan foddey veih sauchys, t’ad er nyn gheyrey ’sy yiat, chamoo ta fendeilagh erbee oc. 5Yn fouyr oc ta ny accryssee gee seose, as t’ad dy ghoaill eh veih mastey ny drineyn, as ta’n roosteyr sluggey seose nyn gooid. 6Ga nagh vel trimshey troggal ass yn ooir, ny seaghyn gaase ass y thalloo, 7Ny-yeih ta dooinney er ny ruggey gys seaghyn, myr ta smaylyn yn aile getlagh lesh yn yrjid. 8Gys Jee yinnin’s shirrey, as gys Jee yinnin’s my chooish y hymney; 9Ta jannoo reddyn mooarey, as erskyn nyn dushtey; reddyn yindyssagh erskyn earroo: 10Ta cur fliaghey er y thalloo, as deayrtey ushtey er ny magheryn: 11Dy hroggal seose dy ard adsyn ta injil; dy vod adsyn ta dobberan ve soit ayns sauchys. 12T’eh tilgey bun-ry-skyn saaseyn ny croutee, myr shen nagh jarg ad cooilleeney ny t’ad dy ghoaill ayns laue. 13T’eh goaill y vooinjer chluicagh ayns y chialgeyrys oc hene; as cur shaghrynys er coyrle ny camlaagee. 14Ta dorraghys cheet orroo ’sy laa, as t’ad rasey son y raad er y vun-laa myr ’syn oie. 15Agh t’eh sauail yn voght veih’n chliwe, veih yn veeal ocsyn, as veih laue yn vooinjer niartal. 16Myr shen ta treishteil ec y voght, as ta beeal mee-chairys ny host. 17Cur-my-ner, s’maynrey ta’n dooinney ta Jee lhie e laue er; shen-y-fa ny jean uss soiaghey beg jeh smaght yn Ooilley-niartal: 18Son t’eh jannoo ching, as t’eh coyrt couyr; t’eh bwoalley, as ta ny laueyn echey slaanaghey. 19Nee eh uss y livrey ayns shey seaghyn, eer ayns shiaght cha jig olk erbee dty choair. 20Ayns gortey nee eh uss y livrey veih baase, as ayns caggey veih pooar y chliwe. 21Bee oo keillit veih guin y chengey elgyssagh; cha bee aggle ort roish toyrt-mow tra te cheet. 22Er traartys as genney cha jean oo agh garaghtee: chamoo gowee oo aggle roish beishtyn ny hooirey. 23Son bee oo ayns coardail rish claghyn y vagher; as bee beishtyn feïe ny hooirey ec shee rhyt. 24As bee fys ayd dy vel dty chabbane ayns shee; as hig oo stiagh ayns dty hie, as cha jed oo er-shaghryn. 25Nee oo toiggal myrgeddin dy bee dty chloan mooarane, as dty luight myr faiyr y thallooin. 26Hig oo gys dty oaie ayns slane eash, myr ta toorran arroo cheet stiagh ’syn imbagh cooie. 27Cur-my-ner shoh, ta shin er gheddyn magh eh, shen myr te; eaisht rish, as gow toiggal jeh son dt’oays hene.