CAB. VI

1Agh dreggyr Job as dooyrt eh, 2Oh dy beagh my hrimshey dy slane er ny howse, as my heaghyn troggit seose ayns ny meihaghyn noi-ry-hoi! 3Son nish veagh eh ny s’trimmey na geinnagh ny marrey: shen-y-fa ta my ghoan plooghit ayns my chree. 4Son ta sideyn yn Ooilley-niartal cheu-sthie jee’m, ta’n pyshoon oc soo seose my spyrryd: ta atchimyn Yee soiaghey ad-hene ayns order-caggee m’oï. 5Vel yn assyl feïe shutternee tra ta faiyr echey? ny vel y dow geamagh harrish e foddyr? 6Vod shen ta neu-vlastal ve eeit gyn sollan? ny cre’n vlass t’ayns fynnican ooh kiark? 7Ny reddyn shoh ta my annym dy yiooldey; t’ad myr my veaghey dobberanagh. 8Oh dy beagh my accan aym! as dy jinnagh Jee cur dou my vian! 9Eer dy gooidsave lesh Jee dy my stroie; dy jinnagh eh lhiggey magh e laue dy my yiarey jeh! 10Eisht veagh gerjagh foast my chour; yinnin eer mee-hene y niartaghey ayns my hrimshey: ny lhig da sparail, son cha vel mee er n’obbal goan yn Er-casherick. 11Cre ta my niart, dy voddym’s cummal rish? as cre ta my yerrey, dooys dy ve foddey beayn? 12Vel my niart myr niart claghyn? ny vel m’eill myr prash? 13Nee son nagh vel mee son cooney lhiam pene, dy vel creenaght dy bollagh er my hreigeil? 14Dasyn t’ayns seaghyn lhisagh erreeish ve er ny hoilshaghey liorish e charrey; agh ta eshyn cur cooyl rish aggle yn Ooilley-niartal. 15Ta my chaarjyn er ghellal dy molteyragh myr awin, as myr ny strooanyn t’ad lheïe ersooyl; 16Ta jeeaghyn doo lesh y rio; as ayndoo ta’n sniaghtey follit: 17Lesh y bree-hiass t’ad goll naardey; as lesh chiass ny greiney t’ad lheïe ersooyl. 18Ta’n choorse-ushtey oc er ny hyndaa noon as noal; t’ad goll ass shilley, as t’ad caillit. 19Yeeagh sheshaghtyn Tema er nyn son, va troailtee Sheba farkiaght orroo. 20V’ad ec kione nyn geiley, son dy row ad mollit ayns nyn dreishteil; haink ad gys shen, as hie nyn dappey voue. 21Son nish, goll-roosyn cha vel shiu veg dooys; ta shiu fakin kys ta mee er my lhieggal, as ta shiu goaill nearey jee’m. 22Dooyrt mee edyr, Cur-jee lhieu cooney? ny, Cur-jee kemmyrk dou jeh nyn gooid? 23Er-nonney, Livrey-jee mee veih laue y noid? ny, Jean-jee m’y eaysley veih laue yn tranlaasagh? 24Ynsee-jee mee, as bee’m my host; as cur-jee orrym toiggal cre ayns ta mee er ve foiljagh. 25Cre cha breeoil as ta goan ynrick! agh cre ta’n argane euish prowal orrym? 26Vel shiu smooinaghtyn dy my gheyrey son my ghoan, as son glare dooinney ta ec kione e cheiley, ta myr y gheay? 27Dy feer, ta shiu tuittym dy trome ersyn ta seaghnit, as ta shiu cleiy ooig son nyn garrey. 28Nish er-y-fa shen, lhig-jee fea dou; jeeagh-jee orrym; son cha bee eh gyn-yss diu my ta mee ’syn aggair. 29Gow-jee aa-smooinaght, ta mee guee erriu, ny cur-jee mee-chairys my lieh; dy jarroo, smooinee-jee er reesht, foddee cairys ’ve ayns my chooish. 30Vel camlaagys ayns my hengey? nagh vel my heaghyn sharroo gys my vlass?