CAB. VII

1Nagh vel traa kiarit da dooinney er y thalloo? nagh vel ny laghyn echey myrgeddin myr laghyn sharvaant failt? 2Myr ta’n charvaant dy jeean geearree yn scadoo, as myr ta’n labree jeeaghyn son leagh e obbyr; 3Myr shen ta mish êginit dy cheau meeaghyn dy ardalys, as ta oieghyn tooilleilagh er ny oardaghey dou. 4Tra ta mee lhie sheese, ta mee gra, Cuin nee’m girree, as yn oie ve baarit? as ta mee ceaut lesh chyndaa noon as noal son aash, derrey brishey’n laa. 5Ta my eill coodit lesh beishteigyn as crammanyn ooir; ta my chrackan shirgit as dwoaiagh. 6Ta my laghyn ny s’bieau na spaal fidderagh, as t’ad baarit fegooish treishteil. 7O cooinee nagh vel my vea agh geay: cha jean my hooill fakin maynrys arragh. 8Yn sooill t’er my akin cha vaik eh mee arragh: ta dty hooillyn orrym, as cha bee’m ny sodjey bio. 9Myr ta’n bodjal lheïe ersooyl as goll ass shilley; myr shen eshyn ta goll sheese ayns yn oaie, cha jig eh seose arragh. 10Cha jyndaa eh reesht gys e hie, chamoo ver e ynnyd enney er arragh. 11Shen-y-fa ver-yms reamys da my veeal; neem’s loayrt ayns angaish my spyrryd; neem’s gaccan ayns sherriuid my annym. 12Nee keayn, ny whale mee, dy vel oo troggal sterrym m’oï? 13Tra ta mee gra, Nee my lhiabbee my gherjaghey, nee my lhiaght my accan y veeinaghey; 14Eisht t’ou dy my agglaghey lesh dreamallyn, as dy my heaghney lesh ashlishyn; 15Myr shen dy vel m’annym goaill stroialtys myr reih, as baase roish my vea. 16Ta mee skee jeh; cha baillym ve foddey bio: lhig lhiam; son ta my laghyn fardalys. 17Cre ta dooinney dy by-feeu lhiat streeu rish, as dy hoiaghey dty chree n’oï? 18As dy lhieagh oo dty laue er dy chooilley voghrey, as dy smaghtaghey eh fey-ny-laa? 19Caïd nagh jean oo m’aagail, ny lhiggey fea dou choud as oddym sluggey my helley? 20Ta mee er n’yannoo peccah; cre’n lhiasaghey oddym’s y yannoo, O uss Saualtagh deiney? cre’n-fa t’ou er my hoiaghey myr mark dt’oï, myr shen dy vel mee my errey dou hene? 21As cre’n-fa nagh vel oo pardooney my pheccah, as goaill ersooyl my vee-chairys? son nish nee’m cadley ’sy joan; as nee oo shirrey my lurg ’sy voghrey, agh cha bee’m er-mayrn.