CAB. VIII

1Eisht dreggyr Bildad yn Shuhite as dooyrt eh, 2Caïd nee oo loayrt er yn aght shoh? as caïd vees goan dty veeal myr geay-chassee? 3Vel Jee cur briwnys neu-chorrym? as vel yn Ooilley-niartal cassey cairys? 4My ta dty chloan er n’yannoo peccah n’oï-syn, as my t’eh er yiarey ad jeh son nyn ghrogh-yannoo; 5My yinnagh oo shirrey gys Jee dy leah, as dty aghin y yannoo gys yn Ooilley-niartal; 6Dy beagh oo er ve glen as ynrick; son shickyrys nish veagh eh er ve dooishtagh harryd, as er n’yannoo ynnyd-vaghee dt’ynrickys maynrey. 7Ga dy row dty hoshiaght fardalagh, ny-yeih veagh dty yerrey dy mooar er ny vannaghey. 8Son fênee, ta mee guee ort, jeh’n chenndeeaght, as bee imneagh dy vriaght veih ny shenn-ayryn ocsyn: 9(Son cha vel shinyn agh jeh’n laa jea, as cha vel nyn dushtey agh giare, er-yn-oyr nagh vel nyn laghyn er y thalloo agh myr y scadoo:) 10Nagh jean adsyn dt’ynsaghey, as ginsh dhyt, as fockley magh raaghyn creeney nyn gree? 11Vod y chuin gaase fegooish laagh? vod y chlioagagh gaase gyn ushtey? 12Choud as te foast glass, as gyn giarey sheese, te fioghey myr losserey erbee elley. 13Shen myr ta ny raaidyn ocsyn ooilley ta jarrood Jee; as nee treishteil yn chrauee-oalsey cherraghtyn: 14E hreishteil vees er ny yiarey jeh, as e yerkal myr feegan y doo-oallee. 15Ver eh ’varrant er e hie, agh cha jean eh shassoo; nee eh niartaghey eh, agh cha jean eh farraghtyn. 16T’eh glass ayns chiass ny greïney, as ta e vanglane blaaghey ayns e gharey. 17Ta ny fraueyn echey skeayley mysh y charnane, as gaase mastey creggyn. 18My t’eh dy astyrt eh veih’n ynnyd echey, eisht cha gow e ynnyd rish, gra, Cha nhione dou oo. 19Cur-my-ner, shoh gerjagh giare e vea, as veih’n ooir nee joarreeyn troggal ny ynnyd. 20Cur-my-ner, cha jean Jee tilgey jeh yn dooinney ynrick, chamoo nee eh cooney lesh ny drogh-yantee; 21Derrey t’eh er lhieeney dty veeal lesh garaghtee, as dty veillyn lesh gennallys. 22Bee dty noidyn er nyn goodaghey lesh nearey; as cha jean ynnyd-vaghee ny mee-chrauee shassoo.