CAB. IX

1Eisht dreggyr Job as dooyrt eh, 2Ta fys aym son firrinys dy nee shen myr te: agh kys oddys dooinney ve er ny heyrey fenish Yee? 3My streeuys eh rish, cha vod eh freggyrt son peccah ayns thousane. 4T’eshyn creeney ayns cree, as niartal ayns troshid: quoi t’er chreoghey eh-hene n’oï, as er vishaghey? 5Ta scughey ny sleityn, as te gyn-yss daue; ta tilgey ad bun-ry-skyn ayns e yymmoose; 6Ta craa yn thalloo ass e ynnyd, as ta ny undinyn eck er-creau; 7Ta cur y ghrian fo harey, as cha vel eh girree; as ta sealal seose ny rollageyn; 8Eh ny-lomarcan ta skeayley magh ny niaughyn, as shooyl er tonnyn ny marrey; 9Eh t’er chroo Arcturus, Orion, as Pleiades, as shamyryn y jiass; 10Eh ta jannoo reddyn mooarey erskyn nyn dushtey; eer yindyssyn erskyn-earroo. 11Cur-my-ner, t’eh goll liorym, as cha vel mee dy akin eh; t’eh myrgeddin goll shagh-ym, as cha voddym goaill baght jeh. 12Cur-my-ner, t’eh goaill ersooyl, quoi oddys eh y lhiettal? quoi jir rish, Cre t’ou dy yannoo? 13Mannagh jean Jee e chorree y veeinaghey, nee ny fir-choonee mooaralagh croymmey fo. 14Foddey sloo oddym’s eshyn y reggyrt, as reih my ghoan dy phleadeil rishyn. 15Dasyn, ga dy beign cairagh, cha voddin cur ansoor; agh yinnin stiagh my accan gys my Vriw. 16Dy beign er n’eamagh, as eshyn er my reggyrt; s’coan veign er chredjal dy row eh er chlashtyn my choraa. 17Fakin dy vel eh er my vrishey lesh dorrin, as er vishaghey my lhottyn gyn oyr. 18Cha lhig eh dou goaill m’ennal, agh t’eh dy my lhieeney lesh sherriuid. 19My loayr-ym jeh niart, cur-my-ner, t’eshyn ny s’niartal: ny mychione briwnys, quoi oddys y traa y hoiaghey dy phleadeil my chooish? 20My ta mee seyrey mee-hene, nee my veeal hene m’y gheyrey: my jir-ym, Ta mee ynrick, nee shen myrgeddin prowal my neu-ynrickys. 21Ga dy beign ynrick, ny-yeih cha jinnin soiaghey jeh my vioys: cha shirrin dy ve ny-sodjey bio. 22Shoh un red, as ta mee er ghra eh, T’eh stroie yn vooinjer chairagh as ny mee-chrauee cooidjagh. 23My ta’n chragh stroie doaltattym, cha vel eh agh soiaghey beg jeh surranse yn vooinjer ôney. 24Ta’n seihll er ny choyrt ayns laue ny mee-chrauee: t’eh dolley eddinyn ny briwnyn eck; quoi agh eh-hene ta jannoo shoh? 25Nish ta my laghyn ny s’tappee na post; t’ad chea ersooyl, cha vel ad fakin gerjagh erbee. 26T’ad er n’gholl shaghey dy bieau myr ny lhongyn; myr yn urley ta ayns siyr son y spooilley. 27My jir-ym, Neem’s my accan y yarrood, ver-ym my hrimshey dy lhiattee, as mee-hene y gherjaghey; 28Ta aggle orrym roish ooilley my hrimshey, ta fys aym nagh jean uss goaill rhym dy ve gyn-loght. 29My ta mee cha olk shen, cre’n-fa eisht ta mee laboragh ayns fardail? 30My ta mee goonlagh mee-hene lesh ushtey sniaghtee, as niee my laueyn cha glen as oddym; 31Ny-yeih nee oo my hilgey ’sy laagh, as ver m’eaddagh hene dwoaie dou. 32Son cha nee dooinney eshyn, myr ta mee-hene, mish dy chur ansoor da, as dy darragh shin dy cheilley ayns briwnys. 33Chamoo ta fer erbee dy vriwnys eddyr shin, dy chiangley shin gys coardail. 34Lhig da e smaght y scughey voym, as ny lhig da’n atchim echey mish y agglaghey; 35Eisht loayrin, as cha goïn aggle roish: agh cha nee shoh myr ta’n chooish aym’s.