CAB. I

1Goo yn Chiarn haink gys Joel mac Phethuel. 2Clasht-jee rish shoh, shiuish shenn gheiney, as eaisht-jee, ooilley shiuish chummaltee ny cheerey: vel shoh er ny ve ayns ny laghyn euish, ny dy jarroo ayns laghyn nyn shenn-ayryn? 3Insh-jee shoh da nyn gloan, as lhig da yn chloan euish shen y insh da’n chloan ocsyn, as yn chloan ocsyn da yn nah heeloghe. 4Shen ny ta’n veishteig-loauee er n’aagail, ta’n locust er n’ee; as shen ny ta’n locust er n’aagail, ta’n veishteig-vergagh er n’ee; as shen ny ta’n veishteig-vergagh er n’aagail, ta’n vraddag er n’ee. 5Dooisht-jee, shiuish veshtallee, as keayn-jee: as gull-jee, ooilley shiuish iuderyn-feeyney, son y feeyn noa, er-yn-oyr dy vel eh giarit jeh veih nyn meeal. 6Son ta ashoon er jeet seose er my heer, niartal, as gyn earroo, ta ny feeacklyn oc myr feeacklyn lion: as ta oc feeacklyn-keeilley lion mooar. 7T’eh er choyrt mow my villey-feeyney, as er roostey my villey-figgagh: t’eh er n’yannoo eh glen-lhome, as er yiarey sheese eh, ta ny banglaneyn echey bane-fiojit.

8Keayn-jee myr ben-aeg ayns aanrit-sack, son sheshey yn aegid eck. 9Ta’n oural-arran, as yn oural-jough giarit jeh veih thie yn Chiarn, ta ny saggyrtyn, shirveishee yn Chiarn, dobberan. 10Ta’n magher ny hraartys, ta’n thalloo dobberan, son ta’n arroo mow: ta’n feeyn noa chyrmit seose, ta’n ooil cherraghtyn. 11Bee-jee seaghnit, O shiuish eirinnee: yllee-jee, O shiuish ghareyderyn-feeyney, son y churnaght, as son yn oarn, son ta troar y vagheragh er n’gholl naardey. 12Ta’n billey-feeyney fiojit, as ta’n billey-figgagh creenagh, yn billey-pomegranate, yn billey-palm myrgeddin, as yn billey-ooyl, eer ooilley biljyn y vagheragh t’ad fiojit: as ta’n boggey fioghey ersooyl veih mec deiney. 13Trog-jee erriu, as keayn-jee, shiuish haggyrtyn: yllee-jee shiuish shirveishee yn altar: tar-jee, lhie-jee fud-ny-hoie ayns aanrit-sack, shiuish shirveishee yn Jee aym’s: son ta’n oural-arran, as yn oural-jough er ny lhiettal voish thie yn Jee eu.

14Jean-jee laa troshtee y chasherickey: cur-jee eam son feailley casherick dy ve er ny reayll: chaggle-jee yn chenndeeaght, as ooilley cummaltee ny cheerey, gys thie yn Chiarn y Jee eu, as eïe-jee gys y Chiarn, 15Ah treih son y laa! son ta laa yn Chiarn er-gerrey, as goll-rish toyrt-mow veih yn Ooilley-niartal hig eh. 16Nagh vel yn beaghey giarit jeh roish nyn sooillyn, eer boggey as gennallys veih thie yn Jee ain? 17Ta’n sheel loau fo ny creaghyn, ta ny thieyn-arroo follym-faase, ta ny soaltyn nyn dholtanyn; son ta’n arroo fowanit. 18Kys ta ny beïyn garveigagh! ta ny shellooyn ollagh seaghnit, son nagh vel aber oc: dy jarroo ta ny shioltaneyn keyrragh shymley ersooyl. 19O Hiarn, hood’s nee’m geamagh: son ta’n aile er stroie aberyn yn aasagh, as ta’n aile er lostey ooilley biljyn y vagher. 20Ta beïyn y vagher geamagh myrgeddin hood’s: son ta ny hawinyn ushtey chyrmit seose, as ta’n aile er stroie aberyn yn aasagh.