CAB. III

1Son cur-jee my-ner, ayns ny laghyn shen, as ec y traa cheddin, tra ver-yms chyndaa da cappeeys Yudah as Yerusalem, 2Neem’s myrgeddin chaglym dy chooilley ashoon, as ver-yms lhiam sheese ad gys coan Yehoshaphat, as neem’s pleadeil roo ayns shen, son my phobble, as son my eiraght Israel, t’ad er skeayley mastey ny ashoonyn, as t’ad er rheynn my heer. 3As t’ad er hilgey lottyn son my phobble, as er choyrt guilley son leagh streebagh, as er chreck inneen son feeyn daue dy iu. 4As dy jarroo, cre’n eïe t’eu orrym, O Tyre as Zidon, as ooilley ardjyn Phalestine? jean shiu cooilleeney ’ghoaill orrym, as my ta shiu goaill lhiasaghey jeem’s, dy tappee as dy leah chyndaa-yms reesht yn cooilleeney eu er nyn ghing hene. 5Er-yn-oyr dy vel shiu er ghoaill my argid, as my airh, as er chur lhieu stiagh gys ny chiambleyn eu my chooid eunyssagh costal. 6Cloan Yudah myrgeddin, as cloan Yerusalem, ta shiu er chreck gys ny Grecianee, dy scughey ad foddey veih nyn jeer hene. 7Cur-jee my-ner, trog-yms ad veih yn boayl, gys chreck shiu ad, as chyndaa-ym reesht yn cooilleeney eu er nyn ghing hene. 8As neem’s ny mec as ny inneenyn euish y chreck gys laue cloan Yudah, as creckee adsyn ad gys ny Sabeanee, gys pobble foddey jeh; son ta’n Chiarn er loayrt eh.

9Fockle-jee shoh magh mastey ny ashoonee: bee-jee ullee son y chaggey, dooisht-jee ny deiney niartal, lhig da ooilley ny deiney-caggee tayrn er-gerrey, lhig daue cheet seose. 10Bwoaill-jee magh ny coulteryn eu ayns cliwenyn, as ny corranyn-pollal eu ayns shleiyghyn; lhig da’n fer faase gra, Ta mee lajer. 11Chaggle-jee shiu hene, as tar-jee, ooilley shiuish ashoonee, as chymsee-jee shiu hene dy cheilley ooilley mygeayrt: gys shen cur er dty gheiney niartal dy heet sheese, O Hiarn. 12Lhig da ny ashoonee ve er nyn ghoostey, as lhig daue cheet seose gys coan Yehoshaphat: son ayns shen neem’s soie dy vriwnys ooilley ny ashoonee ta mygeayrt. 13Cur-jee fo yn corran, son ta’n arroo creen; tar-jee, sheese-jee, son ta’n press-feeyney lane, ta ny doaghyn lhieeney harrish, son ta’n vee-chraueeaght oc mooar. 14Earrooyn mooarey, erskyn earrooyn mooarey ayns coan y vriwnys: son ta laa yn Chiarn er-gerrey ayns coan y vriwnys. 15Bee yn ghrian as yn eayst fo dorraghys, as cha geau ny rollageyn nyn soilshey. 16Nee yn Chiarn myrgeddin gyllagh dy ard ass Zion, as nee eh fockley-magh e choraa veih Jerusalem; as bee ny niaughyn as y thalloo er-creau; agh bee yn Chiarn treishteil e phobble, as niart cloan Israel. 17Myr shen bee fys eu, dy nee mish y Chiarn yn Jee eu, ta cummal ayns Zion, my lieau’s casherick: eisht bee Jerusalem casherick, as cha jed joarreeyn arragh ny hrooid.

18As hig eh gy-kione ayns y laa shen, dy jean ny sleityn shilley neose feeyn noa, as nee ny croink roie lesh bainney, as nee ooilley awinyn Yudah roie lesh ushtaghyn, as nee farrane geill magh veih thie yn Chiarn, as nee eh gushtaghey coan ny reih cedaryn. 19Bee Egypt ny hraartys, as bee Edom ny aasagh follym-feayn, son nyn ghewilys noi cloan Yudah; er-yn-oyr, dy vel ad er gheayrtey fuill gyn-loght ayns y cheer oc. 20Agh nee Judah tannaghtyn son dy bragh, as Jerusalem veih sheeloghe gys sheeloghe. 21Son glen-yms yn uill ocsyn, nagh vel mee er ghlenney; son ta’n Chiarn cummal ayns Zion.