CAB. X

1Nish haink eh gy-kione, tra cheayll Adoni-zedeck ree Yerusalem dy row Joshua er ghoaill Ai, as er stroie eh dy bollagh; as dy row eh er n’yannoo rish Ai as e ree myr ren eh rish Jericho, as e ree; as dy row cummaltee Ghibeon er n’yannoo shee rish Israel, as baghey ny mast’ oc; 2Dy row aggle mooar orroo, son dy row Gibeon ny ard-valley mooar, myr unnane jeh ny ard-valjyn reeoil, as son dy row eh ny s’troshey na Ai, as dy row ooilley e gheiney-caggee niartal. 3Dy dug Adoni-zedeck ree Yerusalem, er-y-fa shen, chaghteraght gys Hoham ree Hebron, as gys Piram ree Yarmuth, as gys Japhia ree Lachish, as gys Debir ree Eglon, gra, 4Tar-jee seose hym, as cooin-jee lhiam, dy stroie Gibeon: son te er n’yannoo shee rish Joshua as rish cloan Israel. 5Eisht va ny queig reeaghyn Amorite, ree Yerusalem, ree Hebron, ree Yarmuth, ree Lachish, ree Eglon, er nyn jaglym cooidjagh, as hie ad seose, adsyn as ooilley nyn sheshaghtyn-caggee, as champ ad kiongoyrt rish Gibeon, as ren ad caggey n’oï.

6As hug deiney Ghibeon fys gys Joshua gys y champ ec Gilgal, gra, Ny bee lhag-lauee rish dty harvaantyn; tar seose hooin ayns dy chooilley hiyr, as saue shin, as cooin lhien: son ta ooilley reeaghyn ny Amoriteyn ta cummal ayns ny sleityn er nyn jaglym cooidjagh nyn ’oï. 7Er shoh hie Joshua seose veih Gilgal, eh-hene as ooilley y slane sheshaght-caggee mârish, as ooilley ny ard-gheiney niartal.

8As dooyrt y Chiarn rish Joshua, Ny gow aggle roue; son ta mee er livrey ad gys dty laue; cha shass dooinney jeu royd. 9Haink Joshua er-y-fa shen orroo doaltattym, as hie eh seose veih Gilgal fud-ny-hoie. 10As hug y Chiarn barriaght da Israel harrystoo, as ren eh ad y stroie lesh toyrt-mow trome ec Gibeon, as ad y imman er y raad ta goll seose gys Beth-horon, as woaill eh ad derrey Azekah, as gys Makkedah. 11As haink eh gy-kione, myr v’ad chea roish Israel, as goll sheese lesh Beth-horon, dy ren y Chiarn claghyn mooarey y hilgey neose orroo veih niau derrey Azekah, as varr eh ad: va ny smoo stroit lesh ny claghyn-sniaghtee ny va lesh cliwe cloan Israel.

12Eisht loayr Joshua rish y Chiarn ’sy laa va’n Chiarn er livrey seose ny Amoriteyn gys laue cloan Israel, as dooyrt eh ayns shilley Israel, Ghrian, shass raad t’ou er Gibeon; as uss, Eayst, harrish coan Ajalon. 13As hass y ghrian myr ve, as va’n eayst er ny lhiettal, derrey va’n pobble er ghoaill cooilleeney er nyn noidyn. Nagh vel shoh scruit ayns lioar Yasher? Myr shen hass y ghrian ayns mean yn aer, as cha row siyr er dy gholl sheese mysh slane laa. 14As cha row lheid y laa as y laa shen. Roish ny ny yeï, dy deaisht y Chiarn rish coraa dooinney: son ren y Chiarn caggey son Israel.

15As hie Joshua reesht, as ooilley Israel mârish, gys y champ, gys Gilgal. 16Agh chossyn ny queig reeaghyn shoh er-chea, as dollee ad ad-hene ayns ooig ec Makkedah. 17As v’eh er ny insh da Joshua, gra, Ta ny queig reeaghyn er nyn gheddyn follit ayns ooig ec Makkedah. 18As dooyrt Joshua, Rowl-jee claghyn mooarey er beeal yn ooig, as cur-jee deiney liorish son gard orroo. 19As ny fuirree-jee shiuish agh gow-jee er-eiyrt’s nyn noidyn, as stroie-jee ad ayns chea; ny lhig-jee daue cosney stiagh ayns ny ard-valjyn oc: son ta’n Chiarn y jee euish er livrey ad gys nyn laue. 20As haink eh gy-kione, erreish da Joshua as cloan Israel v’er stroie ad lesh cragh trome, derrey v’ad er nyn goyrt mow, dy chossyn ny va er-mayrn jeu stiagh ayns ard-valjyn fencit. 21As hyndaa ooilley’n pobble gys y champ gys Joshua ec Makkedah dy sauchey: cha by-loys da fer erbee fosley e veeal noi cloan Israel. 22Eisht dooyrt Joshua, Foshil-jee beeal yn ooig, as cur-jee lhieu magh hym’s ny queig reeaghyn shen ass yn ooig. 23As ren ad shen, as hug ad lhieu magh huggey ny queig reeaghyn shen ass yn ooig, ree Yerusalem, ree Hebron, ree Yarmuth, ree Lachish, as ree Eglon. 24As haink eh gy-kione, tra hug ad lhieu magh ny queig reeaghyn shoh gys Joshua, dy deïe Joshua er ooilley deiney Israel, as dooyrt eh rish captanyn ny deiney caggee hie mârish; Tar-jee er-gerrey, as cur-jee nyn gassyn er mwannallyn ny reeaghyn shoh. As haink ad er-gerrey, as hug ad nyn gassyn er ny mwannallyn oc. 25As dooyrt Joshua roo, Ny gow-jee aggle, as ny bee-jee atchimagh, bee-jee dunnal as jeh cree mie: son shoh myr nee’n Chiarn rish ooilley nyn noidyn nyn ’oï ta shiuish caggey. 26As lurg shen ren Joshua ad y woalley, as y varroo, as chrogh eh ad er queig biljyn: as v’ad croghey er ny biljyn derrey’n astyr. 27As haink eh gy-kione ec lhie ny greiney, dy doardee Joshua, as ghow ad neose ad jeh ny biljyn, as cheau ad ad ’syn ooig ayn v’ad follit, as lhie ad claghyn mooarey er beeal yn ooig ta er-mayrn gys y laa jiu.

28Ec y traa cheddin ghow Joshua Makkedah, as woaill eh eh lesh foyr y chliwe, as stroie eh dy bollagh yn ree echey, as ooilley ny cummaltee v’ayn; cha daag eh veg er-mayrn: as ren eh rish ree Makkedah myr ren eh rish ree Yericho. 29Eisht hie Joshua er e hoshiaght, as ooilley Israel mârish, veih Makkedah gys Libnah, as ren eh caggey noi Libnah. 30As livrey yn Chiarn eh myrgeddin, as y ree echey, gys laue Israel; as woaill eh eh lesh foyr y chliwe, as ooilley ny cummaltee v’ayn; cha daag eh veg bio ayn; agh ren eh rish y ree echey, myr ren eh rish ree Yericho.

31As hie Joshua er e hoshiaght veih Libnah, as ooilley Israel mârish, gys Lachish, as champ eh roish, as ren eh caggey n’oï 32As livrey yn Chiarn Lachish gys laue Israel, ghow eh er yn nah laa, as woaill ad eh lesh foyr y chliwe, as ooilley ny cummaltee v’ayn, cordail rish ooilley v’eh er n’yannoo rish Libnah.

33Eisht haink Horam ree Ghezer dy chooney lesh Lachish; as woaill Joshua eshyn as e gheiney, derrey nagh daag eh veg er-mayrn.

34As veih Lachish hie Joshua er e hoshiaght gys Eglon, as ooilley Israel mârish; as ren ad campal roish, as caggey n’oï. 35As ghow ad eh yn laa shen, as woaill ad eh lesh foyr y chliwe; as ooilley ny cummaltee v’ayn stroie eh dy bollagh yn laa cheddin, cordail rish ooilley ny v’eh er n’yannoo rish Lachish. 36As hie Joshua seose veih Eglon, as ooilley Israel mârish, gys Hebron; as ren ad caggey n’oï: 37As ghow ad eh, as woaill ad eh lesh foyr y chliwe, as yn ree echey, as ooilley ny ard-valjyn, as ooilley ny cummaltee v’ayndoo; cha daag eh veg er-mayrn, cordail rish ooilley, ny v’eh er n’yannoo rish Eglon; agh stroie eh dy bollagh eh, as ooilley ny cummaltee v’ayn.

38As hyndaa Joshua, as ooilley Israel mârish, gys Debir, as ren eh caggey n’oï. 39As ghow eh eh, as y ree, as ooilley ny ard-valjyn echey; as woaill eh ad lesh foyr y chliwe, as stroie eh dy bollagh ooilley ny cummaltee v’ayndoo; cha daag eh veg er-mayrn: myr v’eh er n’yannoo rish Hebron, lheid cheddin ren eh rish Debir, as e ree; myr v’eh er n’yannoo rish Libnah, as e ree.

40Myr shoh ren Joshua bwoalley ooilley cheer ny sleityn, as y jiass, as y choan, as cheer ny farraneyn, as ooilley ny reeaghyn oc: cha daag eh veg er-mayrn; agh stroie eh dy bollagh dy chooilley chretoor bio, myr va’n Chiarn Jee Israel er harey. 41As woaill Joshua ad veih Kadesh-barnea eer gys Gaza, as ooilley cheer Ghoshen choud’s Gibeon. 42As ooilley ny reeaghyn shoh as nyn gheer ren Joshua ’ghoaill mysh yn un traa; son dy ren y Chiarn Jee Israel caggey ayns lieh Israel. 43As hyndaa Joshua, as ooilley Israel mârish, gys y champ gys Gilgal.