CAB. XI

1As haink eh gy-kione, tra va Jabin ree Hazor er chlashtyn jeh ny reddyn shoh, dy dug eh fys gys Jobab ree Vadan, as gys ree Shimron, as gys ree Achshaph, 2As gys ny reeaghyn v’er cheu-twoaie jeh ny sleityn, as jeh ny strahghyn jiass jeh Cinneroth, as ayns y choan, as ayns slystyn Dor cheu-heear, 3As gys y Chanaanite er cheu-har as cheu-heear, as gys yn Amorite, as yn Hittite, as y Perizzite, as y Jebusite ayns ny sleityn, as gys yn Hivite fo Hermon, ayns cheer Vispeh. 4As hie ad magh, ad-hene as ooilley ny deiney caggee oc mâroo, ymmodee sleih, dy jarroo myr genniagh y traie ayns earroo, lesh cabbil as fainee ymmodee seihlt. 5As tra va ooilley ny reeaghyn shoh er jeet cooidjagh, haink ad as champ ad lesh y cheilley liorish ushtaghyn Merom, dy chaggey noi Israel.

6As dooyrt y Chiarn rish Joshua, Ny gow aggle roue: son mysh y traa shoh mairagh, neem’s livrey ooilley ad seose marroo kiongoyrt rish Israel: nee oo feh-yskid nyn gabbil y yiarey, as lostey ny fainee oc ’syn aile. 7Er shoh haink Joshua as ooilley ny deiney-caggee mârish doaltattym orroo ec ushtaghyn Merom, as hie ad laue roo. 8As ren y Chiarn ad y livrey gys laue Israel, ren ad y woalley, as nyn glo gys Zidon mooar, as gys Misrephoth-maim, as gys glione Vispeh cheu-har, as ren eh ad y stroie, derrey nagh row fer jeu faagit. 9As ren Joshua roo myr doardee yn Chiarn da: yiare eh feh-yskid nyn gabbil, as losht eh nyn vainee lesh aile.

10As hyndaa Joshua ec y traa shen, as ghow eh Hazor, as varr eh yn ree echey lesh y chliwe: son va Hazor ’sy chenn earish yn ard-valley reeoil harrish ooilley ny reeriaghtyn shen. 11As woaill eh ooilley ny anmeenyn v’ayn lesh foyr y chliwe, stroie ad dy bollagh: cha row veg faagit bio: as losht eh Hazor lesh aile. 12As ooilley ard-valjyn ny reeaghyn shen, as ooilley ny reeaghyn oc, ren Joshua ’ghoaill, as woaill eh ad lesh foyr y chliwe; as stroie eh ad dy bollagh, myr va Moses sharvaant y Chiarn er harey. 13Agh son ny ard-valjyn shen va foast faagit shassoo ayns nyn niart, cha losht Israel veg jeu, er-lhimmey jeh Hazor hene; shen ren Joshua lostey. 14As slane spooilley ny ard-valjyn shoh, as y maase, ren cloan Israel y ghoaill son cooid daue hene; agh varr ad dy chooilley ghooinney lesh foyr y chliwe, derrey v’ad er stroie ad, chamoo daag ad veg jeu bio.

15Myr hug y Chiarn currym er Moses e harvaant, shen myr hug Moses currym er Joshua, as shen myr ren Joshua; cha daag eh veg giare jeh ooilley ny va’n Chiarn er harey da Moses. 16Myr shoh ghow Joshua ooilley’n cheer shen, ny croink, as ooilley’n cheer jiass, as ooilley cheer Ghoshen, as y coan, as y strah, as slieau Israel, as y ghlione echey; 17Eer veih cronk Halak, ta er raad Seir, choud as Baal-gad, ayns coan Lebanon, fo cronk Hermon: as ghow eh ooilley ny reeaghyn oc, as woaill eh, as varr eh ad. 18Foddey dy hraa ren Joshua caggey rish ooilley ny reeaghyn shen. 19Cha row ard-valley ren shee rish cloan Israel, agh ny Hiviteyn, cummaltee Ghibeon; ooilley’n chooid elley ghow ad ayns caggey. 20Son daag y Chiarn ad fo creoghys cree, dy chaggey noi Israel, dy voddagh eh stroie ad dy bollagh, nagh voghe ad foayr erbee, agh dy voddagh cragh cheet ny-vud oc, myr hug y Chiarn sarey da Moses.

21As ec y traa shen haink Joshua, as dastyr eh cloan Anak ass ny sleityn, ass Hebron, ass Debir, ass Anab, as veih ooilley sleityn Yudah, as ooilley sleityn Israel: ren Joshua stroie dy bollagh ad hene as nyn ard-valjyn. 22Cha row veg jeh sluight Anak faagit ayns cheer cloan Israel: agh ayns Gaza, ayns Gath, as ayns Ashdod, va kuse jeu. 23Myr shoh ghow Joshua yn slane cheer, cordail rish ooilley ny va’n Chiarn er ghra rish Moses; as hug Joshua eh son eiraght da Israel, cordail rish y rheynn va jeant fud ny tribeyn oc. As [ny lurg shoh] va shee ’sy cheer.