CAB. XIII

1Nish va Joshua shenn as er roie ayns eash; as dooyrt y Chiarn rish, T’ou ass shenn as er roie ayns eash, as ta foast lane thalloo rhymbiu nagh vel shiu er ghoaill. 2Shoh’n thalloo nagh vel foast goit stiagh: ooilley ardjyn ny Philistinee, as slane Geshuri, 3Veih Sihor, ta liorish Egypt, choud’s ardjyn Ekron my-hwoaie, ta lesh ny Canaaniteyn: queig chiarnyn jeh ny Philistinee; ny Gazathiteyn, as ny Ashdothiteyn, ny Eshkaloniteyn, ny Gittiteyn, as ny Ekroniteyn; myrgeddin ny Aviteyn: 4Veih’n jiass, ooilley cheer ny Canaaniteyn, as Mearah, ta liorish ny Sidonianee, choud as Aphek, gys slystyn ny Amoriteyn: 5As cheer ny Gibliteyn, as ooilley Lebanon, lesh y shiar, veih Baal-gad fo cronk Hermon derrey hig oo gys Hamath: 6Ooilley cummaltee ny sleityn, veih Lebanon gys Misrephoth-maim, as ooilley ny Sidonianee, adsyn nee’m geiyrt magh roish cloan Israel: as rheynn uss eh liorish lot mastey cloan Israel son eiraght, myr ta mee er dty harey. 7Nee oo eisht rheynn y cheer shoh son eiraght er ny nuy tribeyn, as lieh-tribe Vanasseh. 8Mâroo ta ny Reubeniteyn as ny Gaditeyn er gheddyn nyn eiraght, hug Moses daue, cheu elley dy Yordan, lesh y shiar, rere myr hug Moses sharvaant y Chiarn daue; 9Veih Aroer, ta rish broogh awin Arnon, as ny baljyn ta eddyr ny hawinyn, as ooilley strah Vedeba gys Dibon; 10As ooilley ard-valjyn Sihon ree ny Amoriteyn, va reill ayns Heshbon, gys cagliagh cloan Ammon; 11As Gilead, as ardjyn ny Geshuriteyn, as Maachathiteyn, as slane cronk Hermon, as ooilley Bashan gys Salcah; 12Ooilley reeriaght Og ayns Bashan, va reill ayns Ashtaroth as ayns Edrei, ooilley ny va er-mayrn jeh sluight ny foawir: son ad shoh ren Moses bwoalley, as geiyrt magh. 13Ny-yeih cha row cloan Israel er n’eiyrt magh ny Geshuriteyn, as ny Maachathiteyn: agh ta ny Geshuriteyn, as ny Maachathiteyn cummal mastey ny Israeliteyn gys y laa t’ayn jiu. 14Agh da tribe Levi cha dug eh eiraght erbee; ta ourallyn-losht y Chiarn Jee Israel yn eiraght ocsyn, myr dooyrt eh roo.

15As hug Moses da tribe cloan Reuben eiraght cordail rish ny kynneeyn oc: 16As va’n ayrn ocsyn veih Aroer ta er broogh awin Arnon, as ny baljyn va eddyr ny hawinyn, as ooilley strah Vedeba; 17Heshbon, as ooilley e baljyn ’sy strah: Dibon, as Bamoth-baal, as Beth-baal-meon, 18As Jahazah, as Kedemoth, as Mephaath. 19As Kirjathaim, as Sibmah, as Zareth-shahar, ayns cronk ny glionney, 20As Beth-peor, as Ashdoth-pisgah, as Beth-jeshimoth, 21As ooilley baljyn y strah, as ooilley reeriaght Sihon ree ny Amoriteyn, va reill ayns Heshbon, ren Moses bwoalley, marish princeyn Vidian, Evi, as Rekem, as Zur, as Hur, as Reba, va dukeyn Sihon, cummal ’sy cheer.

22Balaam myrgeddin, mac Beor, yn fer-obbee ren cloan Israel y varroo lesh y chliwe mâroosyn huitt ’sy chaggey. 23As va ayrn cloan Reuben, Jordan, as y slyst shen. Shoh va eiraght cloan Reuben cordail rish ny kynneeyn oc, ny ard-valjyn as ny baljyn-cheerey. 24As hug Moses eiraght da tribe Ghad, as nyn gloan, cordail rish nyn gynneeyn: 25As va’n ayrn ocsyn Jazer, as ooilley baljyn Ghilead, as y derrey lieh jeh cheer cloan Ammon, gys Aroer ta liorish Rabbah; 26As veih Heshbon gys Ramath-mizpeh, as Betonim; as veih Mahanaim gys slyst Debir; 27As ayns y choan, Beth-aram, as Beth-nimrah, as Succoth, as Zaphon, yn chooid elley jeh reeriaght Sihon ree Heshbon, Jordan as y slyst shen, gys oirr sodjey magh faarkey Chinnereth, cheu-har dy Yordan. 28Shoh eiraght cloan Ghad rere nyn gynneeyn, nyn ard-valjyn, as ny baljyn-cheerey.

29As hug Moses eiraght da lieh-tribe Vanasseh: as shoh va eiraght lieh-tribe Vanasseh lurg ny kynneeyn oc: 30As va’n ayrn ocsyn veih Mahanaim, ooilley Bashan, ooilley reeriaght Og ree Vashan, as ooilley baljyn Jair, t’ayns Bashan, three-feed balley; 31As va lieh Ghilead, as Ashtaroth, as Edrei, baljyn reeriaght Og ayns Bashan, er ny choyrt da cloan Vachir mac Vanasseh, ta shen, da’n derrey lieh jeh cloan Vachir rere nyn gynneeyn. 32As shoh ny cheeraghyn rheynn Moses son eiraght ayns strahghyn Voab, cheu elley dy Yordan, shiar veih Jericho. 33Agh da tribe Levi, cha dug Moses eiraght erbee: va’n Chiarn Jee Israel yn eiraght ocsyn, myr dooyrt eh roo.