CAB. XIV

1As shoh ny cheeraghyn va son eiraght da cloan Israel ayns cheer Chanaan, ren Eleazar y saggyrt, as Joshua mac Nun, as ard-gheiney tribeyn cloan Israel, rheynn orroo son eiraght. 2Liorish lottyn va nyn eiraght, myr ren y Chiarn sarey liorish Moses, da ny nuy tribeyn, as son y tribe dy lieh. 3Son va Moses er choyrt eiraght da daa hribe as lieh-tribe cheu elley dy Yordan: agh da ny Leviteyn cha dug eh veg yn eiraght ny mast’ oc. 4Son va cloan Yoseph daa hribe, Manasseh as Ephraim; agh cha dug ad ayrn erbee ’sy cheer da ny Leviteyn, er-lhimmey jeh ard-valjyn dy chummal ayndoo, lesh ny gleebyn va bentyn roo son nyn maase as son nyn gooid. 5Myr hug y Chiarn sarey da Moses, eer myr shen ren cloan Israel, as rheynn ad y cheer.

6Eisht haink cloan Yudah gys Joshua ayns Gilgal: as dooyrt Caleb mac Jephunneh yn Kenezite rish, Ta fys ayd cre dooyrt y Chiarn rish Moses yn dooinney dy Yee mychione mish as uss ayns Kadesh-barnea. 7Da-eed bleïn dy eash va mish tra hug Moses sharvaant y Chiarn mee veih Kadesh-barnea dy ghoaill baght jeh’n cheer; as hoilshee mee da yn irriney ayns ynrickys my chree. 8Ny-yeih my heshaghyn hie seose mârym hug ad y pobble ass cree: agh dreill mish dy chion gys y Chiarn my Yee. 9As ren Moses breearrey er y laa cheddin, gra, Son shickyrys bee’n cheer shen er ta dty chassyn er hooyl yn eiraght ayd’s, as dty chloan’s son dy bragh, son dy vel oo dy slane er lhiantyn gys y Chiarn my Yee. 10As cur-my-ner nish, ta’n Chiarn er my reayll bio, myr yiall eh dou, ny queig bleeaney as da-eed shoh, er-dyn traa loayr y Chiarn yn fockle shoh rish Moses, choud as va cloan Israel er nyn yurnah ’syn aasagh: as cur-my-ner nish, ta mee yn laa jiu kiare-feed as queig bleeaney dy eash. 11As ny-yeih ta mee cha mioyral jiu as va mee er y laa hug Moses mee er y chaghteraght: myr va my niart ’sy traa shen eer ta my niart nish, chammah dy gholl magh as dy heet stiagh ayns caggey. 12Nish er-y-fa shen, cur dou yn cheer sleitagh shoh, my-e-chione loayr y Chiarn ’sy laa cheddin; (son cheayll oo ayns y laa shen dy row cloan Anak ayns shen, as dy row ny ard-valjyn mooar as fencit:) my she shen dy bee’n Chiarn lhiam, bee’m eisht abyl dy eiyrt magh ad, myr yiall y Chiarn. 13As ren Joshua eh y vannaghey, as hug eh da Caleb mac Jephunneh, Hebron, son eiraght. 14Myr shoh haink Hebron dy ve son eiraght da Caleb mac Jephunneh yn Kenezite, gys y laa jiu; son dy dug eh slane biallys da’n Chiarn Jee Israel. 15As va ennym Hebron roish shen Balley-arba, va’n Arba shoh ny ard-ghooinney mastey sluight Anak. As va shee ’sy cheer veih caggey.