CAB. XVI

1As huitt cronney cloan Yoseph dy ve veih Jordan liorish Jericho, derrey ushtey Yericho lesh y shiar, gys yn aasagh ta goll seose veih Jericho trooid cronk Veth-el, 2As goll magh veih Beth-el gys Luz, as sheeyney choud’s ardjyn Archi gys Ataroth, 3As goll sheese sheear gys coast Japhleti, gys coast yn Veth-horon heese, as gys Gezer; as jannoo jerrey ec yn aarkey. 4Myr shen ghow cloan Yoseph, Manasseh as Ephraim, nyn eiraght.

5As shoh myr va cagliagh cloan Ephraim, cordail rish ny kynneeyn oc; cagliagh nyn eiraght er y cheu har va Ataroth-addar, gys Beth-horon heose: 6As hie’n chagliagh magh lesh yn aarkey gys Michmethah er y cheu-twoaie; as hie’n chagliagh mygeayrt lesh y shiar gys Taanath-shiloh, as shaghey shen lesh y shiar gys Janohah: 7As hie eh sheese veih Janohah gys Ataroth, as gys Naarath, as haink eh gys Jericho, as magh ec Jordan. 8Hie’n chagliagh magh veih Tappuah sheear gys awin Kanah; as ren eh jerrey ec yn aarkey. Shoh eiraght tribe cloan Ephraim rere ny kynneeyn oc. 9As ny ard-valjyn va soit magh son cloan Ephraim v’ad fud eiraght cloan Vanasseh, ooilley ny baljyn-mooarey marish ny baljyn-beggey. 10As cha deiyr ad magh ny Canaaniteyn, va cummal ayns Gezer: agh ta ny Canaaniteyn, cummal mastey ny Ephraimiteyn gys y laa jiu, as shirveish fo keesh.