CAB. XVII

1Va cronney myrgeddin cour tribe Vanasseh, (son v’eh mac shinney Yoseph;) ta shen, son Machir mac shinney Vanasseh, ayr Ghilead; son dy nee dooinney caggee v’eh, shen-y-fa va Gilead as Bashan echey. 2Va cronney neesht son y chooid elley jeh cloan Vanasseh rere nyn gynneeyn; son cloan Abiezer, as son cloan Helek, as son cloan Asriel, as son cloan Shechem, as son cloan Hepher, as son cloan Shemida: ad shoh va mec Vanasseh mac Yoseph, liorish nyn gynneeyn.

3Agh cha row mec, agh inneenyn ec Zelophehad mac Hepher, mac Ghilead, mac Vachir, mac Vanasseh: as shoh enmyn e inneenyn, Mahlah, as Noah, as Hoglah, Milcah, as Tirzah. 4As haink ad fenish Eleazar y saggyrt, as fenish Joshua mac Nun, as fenish ny princeyn, gra, Hug y Chiarn currym er Moses eiraght y choyrt dooin mastey nyn mraaraghyn. Shen-y-fa, hug eh daue eiraght mastey braaraghyn nyn ayrey, cordail rish sarey’n Chiarn. 5As hooar Manasseh jeih ayrnyn, cheu-mooie jeh thalloo Ghilead as Bashan, va er cheu elley dy Yordan; 6Er-yn-oyr dy row eiraght ec inneenyn Vanasseh mastey ny mec echey: as va cheer Ghilead ec y chooid elley jeh mec Vanasseh.

7As va cagliagh Vanasseh veih Asher gys Michmethah, jeeragh er Shechem; as ren yn oirr echey sheeyney er y laue yesh gys cummaltee En-tappuah. 8Nish va cheer Happuah lesh Manasseh: agh va Tappuah, er oirr Vanasseh, er ny choyrt da cloan Ephraim. 9As roie’n chagliagh sheese gys awin Kanah, jiass jeh’n awin: ta ny ard-valjyn shoh jeh Ephraim mastey ard-valjyn Vanasseh: va cagliagh Vanasseh neesht er cheu-twoaie yn awin, as va’n cheu-mooie echey rish y cheayn: 10My-yiass ve lesh Ephraim, as my-hwoaie ve lesh Manasseh, as y cheayn e chagliagh; as haink ad dy cheilley lesh Asher er y twoaie, as Issachar er y shiar. 11As va ec Manasseh ayns Issachar, as ayns Asher, Beth-shean as e baljyn, as Ibleam as e baljyn, as cummaltee Dor as e baljyn, as cummaltee Endor as e baljyn, as cummaltee Taanach as e baljyn, as cummaltee Vegiddo as e baljyn, eer three cheeraghyn. 12Ny-yeih cha yarg cloan Vanasseh er geiyrt magh cummaltee ny baljyn shen, agh dreill ny Canaaniteyn nyn gummal ’sy cheer shen er niart. 13Ny-yeih haink eh gy-kione, tra va cloan Israel er n’ghoaill niart, dy dug ad ny Canaaniteyn fo keesh; agh cha deiyr ad magh ad dy bollagh. 14As loayr cloan Yoseph rish Joshua, gra, Kys te nagh vel oo er choyrt dou agh un chronney as un ayrn son m’eiraght, fakin dy vel shin ymmodee ayns earroo, as dy vel y Chiarn choud shoh er my vannaghey? 15As dreggyr Joshua ad, My t’ou pobble mooar ayns earroo, seose-jee eisht gys cheer ny keylley, jean gastyrt ny biljyn ayns shen, ayns cheer ny Perizziteyn, as ny foawir, my ta cronk Ephraim ro choon dhyt. 16As dooyrt cloan Yoseph, Cha vel y chronk (mooar) dy liooar dooin: as ta fainee yiarn ec ooilley ny Canaaniteyn cummaltee cheer ny glionney, chammah ocsyn jeh Veth-shean as e baljyn, as ocsyn jeh glione Jezreel. 17As loayr Joshua rish thie Yoseph, ta shen rish Ephraim as rish Manasseh, gra, T’ou uss dty phobble mooar as niartal; cha bee oo currit jeh ynrycan lesh un chronney: 18Agh bee’n slieau lhiat’s; son te ny cheyll, as giaree oo sheese eh: as bee ny ardjyn echey lhiat’s: as eiyree oo magh ny Canaaniteyn, ga dy vel oc fainee yiarn, as my s’lajer ad.