CAB. XVIII

1As va slane sheshaght cloan Israel er nyn jaglym cooidjagh ec Shiloh, as hoie ad seose y chabbane-agglish ayns shen. As va’n slane cheer lhieu hene. 2As va mastey cloan Israel shiaght tribeyn nagh row foast er gheddyn nyn eiraght. 3As dooyrt Joshua rish cloan Israel, Caïd vees shiu lhag dy ghoaill possession jeh’n cheer ta’n Chiarn Jee ny ayraghyn eu er choyrt diu? 4Reih-jee veih ny mast’ eu three deiney ass dagh tribe: as ver-ym magh ad, as hed ad mygeayrt trooid y cheer, as nee ad soiaghey magh eh cordail rish nyn eiraght, as hig ad reesht hym’s. 5As rheynnee ad eh ayns shiaght ayrnyn: nee Judah tannaghtyn ayns nyn eiraght hene my-yiass, as nee thie Yoseph cummal ayns nyn eiraght hene my-hwoaie. 6Nee shiu er-y-fa shen soiaghey magh y cheer ayns shiaght ayrnyn, as ver shiu roym’s yn rheynn ta shiu er n’yannoo, dy voddym lottyn y hilgey er nyn son ayns shoh kiongoyrt rish y Chiarn nyn Yee. 7Agh cha vel ayrn ec ny Leviteyn nyn mastey; son ta saggyrtys y Chiarn yn eiraght ocsyn: as ta Gad as Reuben, as lieh-tribe Vanasseh, er gheddyn nyn eiraght shiar veih Jordan, shen hug Moses sharvaant y Chiarn daue.

8As hrog ny deiney orroo, as hie ad rhymboo: as hug Joshua currym orroosyn hie dy rheynn y cheer, gra, Immee-jee as shooyl-jee trooid y cheer, as soie-jee magh eh, as tar-jee reesht hym’s, dy voddyms ayns shoh lottyn y cheau er nyn son kiongoyrt rish y Chiarn ayns Shiloh. 9As jimmee ny deiney, as hie ad trooid y cheer, as hoie ad eh magh ayns shiaght ayrnyn, ayns lioar, lurg nyn ard-valjyn; as haink ad gys Joshua reesht gys y champ ec Shiloh.

10As cheau Joshua lottyn er nyn son ayns Shiloh kiongoyrt rish y Chiarn: as ayns shen rheynn Joshua yn cheer er cloan Israel, myr ve er ny hoiaghey magh.

11As haink lot tribe cloan Venjamin magh cordail rish nyn gynneeyn: as haghyr ayrn y lot ocsyn dy ve eddyr cloan Yudah as cloan Yoseph. 12As va’n chagliagh oc er y twoaie veih Jordan, as hie eh seose rish lhiattee Yericho er cheu-twoaie, as seose trooid ny sleityn lesh y sheear; as va’n kione echey ec faasagh Veth-aven. 13As roie’n chagliagh harrish veih shen lesh Luz, rish lhiattee Luz, (ta Beth-el,) my-yiass; as hie’n chagliagh sheese gys Ataroth-adar, er-gerrey da’n chronk ta lhie er cheu-jiass yn Veth-horon heese. 14As va’n chagliagh tayrnit veih shen, goaill combaase lesh y sheear-ass gys y cheayn, veih’n chronk ta lhie jeeragh er Beth-horon my-yiass; as va’n kione echey ec Kirjath-baal, (ta shen Kirjath-jearim,) ard-valley cloan Yudah: shoh va’n lhiattee heear. 15As va’n lhiattee jiass veih kione Kirjath-jearim; as roie’n chagliagh sheear, gys chibbyr ushtaghyn Nephtoah: 16As haink eh neose gys kione y clieau ta lhie jeeragh er coan mac Hinnom, as ta ayns glione ny foawir my-hwoaie, as hie eh sheese lesh coan Hinnom, gys lhiattee Yebusi er y jiass, as sheese gys Enrogel, 17As ve tayrnit veih’n twoaie, as hie eh magh gys En-shemesh, as veih shen lesh Geliloth, ta jeeragh er y raad gys Adummim, as sheese gys clagh-hoit Vohan mac Reuben, 18As veih shen rish y lhiattee lesh Arabah my-hwoaie, sheese gys Arabah: 19As hie’n chagliagh trooid gys lhiattee Veth-hoglah my-hwoaie: as va kione y chagliagh ec baïe twoaie yn cheayn sailjey, ec kione jiass Yordan: shoh va’n chagliagh jiass. 20As va Jordan yn cagliagh er y cheu har. Shoh va eiraght cloan Venjamin, cordail rish ny cagleeyn ooilley mygeayrt, rere nyn gynneeyn. 21Nish ard-valjyn tribe cloan Venjamin, cordail rish ny kynneeyn oc, va Jericho, as Beth-hoglah, as coan Keziz, 22As Beth-arabah, as Zemaraim, as Beth-el, 23As Avim, as Parah, as Ophrah, 24As Chephar-haammonai, as Ophni, as Gaba; daa ard-valley jeig, marish nyn maljyn-beggey: 25Gibeon, as Ramah, as Beeroth, 26As Mizpeh, as Chephirah, as Mozah, 27As Rekem, as Irpeel, as Taralah, 28As Zelah, as Eleph, as Jebusi, (ta shen Jerusalem,) Gibeath, as Kirjath; kiare ard-valjyn jeig, marish nyn maljyn-beggey. Shoh eiraght cloan Venjamin, cordail rish nyn gynneeyn.