CAB. II

1As hug Joshua mac Nun magh daa ghooinney veih Shittim dy vriaght dy follit, gra roo, Immee-jee, gow-jee baght mie jeh’n cheer, dy jarroo jeh Jericho. As jimmee ad, as haink ad gys thie ben oast, enmyssit Rahab, as ghow ad aaght ayns shen. 2As ve er ny insh da ree Yericho, gra, Cur-my-ner, ta deiney er jeet stiagh ayns shoh noght jeh cloan Israel, dy scrial magh y cheer. 3As hug ree Yericho fys gys Rahab, gra, Cur lhiat magh ny deiney t’er jeet hood’s, as ta nish ayns dty hie: son er-chee dy scrial magh ooilley yn cheer t’ad er jeet. 4As ghow’n ven yn daa ghooinney, as ren ee follaghey ad, as dooyrt ec, Haink deiney gys my hie, agh cha row fys aym cre veih v’ad. 5As haink eh gy-kione, mysh traa dooney ny giattey, ’sy chomleayrtys, dy jagh ny deiney magh: cre’n raad hie ny deiney cha vel fys aym: eiyr-jee orroo dy tappee; son berree shiu orroo. 6Agh va ish er choyrt lh’ee ad seose gys mullagh y thie, as er vollaghey ad lesh gish dy lieen, v’ee er chiartaghey er mullagh y thie. 7As hie ny deiney er nyn eiyrt’s yn raad gys Jordan, choud’s ny aaghyn: as cha leah as va ny eiyrtyssee er n’gholl magh, yeigh ad y giat.

8As roish my row ad er lhie sheese, haink ee seose huc gys mullagh y thie; 9As dooyrt ee rish ny deiney, Ta fys aym dy vel y Chiarn er choyrt diu yn cheer, as dy vel atchim reueish er duittym orrinyn, as dy vel ooilley cummaltee yn cheer er choayl nyn mree kyndagh riuish. 10Son ta shin er chlashtyn kys ren y Chiarn chyrmaghey seose ushtey yn Aarkey Jiarg er ny son euish, tra haink shiu magh ass cheer Egypt; as cre ren shiu rish daa ree ny Amoriteyn va er cheu elley dy Yordan, Sihon as Og, ren shiu stroie dy bollagh. 11As cha leah’s cheayll shin ny reddyn shoh, ren ny creeaghyn ain lheïe, chamoo va veg y vree ayns dooinney erbee, kyndagh riuish: son y Chiarn yn Jee eu, t’eh ny Yee ayns niau heose, as er y thalloo wass. 12Nish er-y-fa shen, ta mee guee erriu, loo-jee dou liorish y Chiarn, fakin dy vel mish er yeeaghyn kenjallys diuish, dy jean shiuish myrgeddin kenjallys y yeeaghyn da thie my ayrey; as cur-jee cowrey shickyr dou: 13As dy jean shiu sauail bio my ayr, as my voir, as my vraaraghyn, as my hayraghyn, as ooilley ny t’oc, as nyn mioys y livrey veih baase. 14As dreggyr ny deiney ee, yn vioys ain son y vioys euish, my nee shiu keiltyn yn chooish ta shin mysh. As hig eh gy-kione, tra vees y Chiarn er choyrt dooin yn cheer, dy jean mayd dellal dy dooie as dy firrinagh rhyt. 15Eisht lhig ee sheese ad er coyrd trooid yn uinniag: son va’n thie eck er voalley yn valley, as v’ee cummal er y voalley. 16As dooyrt ee roo, Cosne-jee gys y clieau, er-aggle dy berr ny eiyrtyssee erriu; as follee-jee shiu hene ayns shen three laa, derrey vees ny eiyrtyssee er jyndaa: as ny lurg shen foddee shiu goll er nyn raad. 17As dooyrt ny deiney ree, Bee mayd seyr jeh’n loo shoh t’ou uss er choyrt orrin dy ghoaill. 18Jeeagh, tra hig mayd gys y cheer, nee oo yn skeog shoh dy naie scarleod y chiangley ’syn uinniag ny hrooid ren oo shin y lhiggey sheese; as ver oo lhiat dty ayr, as dty voir, as dty vraaraghyn, as ooilley lught-thie dty ayrey, gys dty hie hene. 19As hig eh gy-kione, quoi-erbee hed magh er dorryssyn dty hie gys y traid, dy bee yn uill echey er y chione hene, as bee shinyn neu-chyndagh: as quoi-erbee vees mayrt’s ayns y thie, bee yn uill echeysyn er y chione ain, my ver dooinney erbee laue er. 20As my nee uss shoh nyn gooish y vrah, eisht vees shinyn feayshlit veih’n loo hug oo orrin y ghoaill. 21As dooyrt ish, Cordail rish ny goan eu hene myr shen dy row eh. As hug ee ad ersooyl, as hie ad roue, as chiangle ee yn skeog scarleod syn uinniag. 22As chossyn ad roue, as haink ad gys y clieau, as duirree ad ayns shen three laa, derrey va ny eiyrtyssee er jyndaa: As ren ny eiyrtyssee briaght er nyn son trooid ooilley yn raad, agh cha row ad ry-gheddyn.

23Myr shen hyndaa y daa ghooinney, as haink ad neose veih’n clieau, as hie ad harrish (Jordan), as haink ad gys Joshua mac Nun, as dinsh ad da ooilley v’er daghyrt daue: 24As dooyrt ad rish Joshua, Dy feer ta’n Chiarn er livrey ooilley yn cheer gys ny laueyn ain; son ta eer ooilley cummaltee ny cheerey coayl nyn gree ayns aggle roïn.