CAB. XX

1Eisht loayr y Chiarn rish Joshua, gra, 2Abbyr rish cloan Israel, gra, Soie-jee er-lheh er nyn son hene ard-valjyn son sauchys, my-nyn-gione loayr mee riu liorish Moses: 3Dy vod eshyn ta marroo persoon erbee trooid taghyrt, as cha nee jeh e yoïn, cosney huc: as bee ad son sauchys diu veih’n cooilleeneyder-folley. 4As tra nee eshyn ta roie er-chea gys unnane jeh ny ard-valjyn shen, shassoo ec giat yn ard-valley, as soilshaghey e chooish ayns clashtyn chanstyr yn ard-valley shen, gowee ad stiagh eh gys yn ard-valley, as ver ad fastee da ny mast’ oc. 5As my hig y cooilleeneyder-folley er e eiyrt’s, cha livrey ad eh gys e laue: son dy nee trooid marranys varr eh e naboo, as nagh row eh ayns goanlys rish roïe. 6As nee eh cummal ’syn ard-valley cheddin, derrey hig eh fenish y pobble ayns briwnys, as derrey baase yn ard-saggyrt vees ’sy traa shen: eisht nee’n marrooder chyndaa gys e ard-valley hene, as gys e hie hene, gys yn ard-valley shen veih ren eh chea.

7As hoie ad er-lheh Kedesh dy Ghalilee ayns cronk Naphtali, as Shechem ayns cronk Ephraim, as Kirjath-arba (ta shen Hebron,) ayns slieau Yudah. 8As er y cheu elley dy Yordan liorish Jericho lesh y shiar, hug ad er-lheh Bezer ayns yn aasagh er y strah ass tribe Reuben, as Ramoth ayns Gilead ass tribe Ghad, as Golan ayns Bashan ass tribe Vanasseh. 9Ad shoh ny ard-valjyn va soit magh son ooilley cloan Israel, as son y joarree ta goaill ny mast’ oc, dy vod eshyn ta marroo persoon erbee trooid taghyrt cosney gys shen, as nagh vow eh baase liorish laue yn cooilleeneyder-folley, derrey v’eh er hassoo fenish y pobble ayns briwnys.