CAB. XXII

1Eisht deïe Joshua er ny Reubeniteyn, as ny Gaditeyn, as er lieh-tribe Vanasseh, 2As dooyrt eh roo, Ta shiu er vreayll ooilley ny doardee Moses sharvaant y Chiarn diu, as ta shiu er chur biallys da my choraa ayns ooilley ny hug mee currym erriu: 3Cha vel shiu er hreigeil nyn mraaraghyn ry-foddey dy hraa gys y laa jiu, agh ta shiu er chooilleeney currym y Chiarn nyn Yee. 4As nish ta’n Chiarn nyn Yee er choyrt fea da nyn mraaraghyn, myr yiall eh daue: shen-y-fa nish, chyndaa-jee as immee-jee gys nyn gummallyn hene, as gys cheer nyn eiraght, hug Moses sharvaant y Chiarn diu er y cheu elley dy Yordan. 5Agh bee-jee feer chiaralagh dy chooilleeney’n sarey as y leigh, hug Moses sharvaant y Chiarn ayns currym diu, dy chur graih da’n Chiarn nyn Yee, as dy immeeaght ayns ooilley e raaidyn, as dy reayll e annaghyn, as dy lhiantyn huggey, as dy hirveish eh lesh ooilley nyn gree as lesh ooilley nyn annym. 6Myr shoh ren Joshua ad y vannaghey, as hug eh ad ersooyl: as hie ad gys nyn gummallyn.

7Nish da’n derrey lieh jeh tribe Vanasseh va Moses er choyrt eiraght ayns Bashan; agh da’n lieh elley hug Joshua [eiraght] mastey nyn mraaraghyn er y cheu shoh dy Yordan lesh y sheear. As tra hug Joshua ad ersooyl gys nyn gummallyn, ren eh ad y vannaghey; 8As loayr eh roo, gra, Chyndaa-jee gys nyn gummallyn lesh ymmodee berchys, as lesh mooarane maase, lesh argid, as lesh airh, as lesh prash, as lesh yiarn, as lesh palchey coamraghyn: rheynn shiu spooilley nyn noidyn rish nyn mraaraghyn.

9As hyndaa cloan Reuben, as cloan Ghad, as lieh-tribe Vanasseh, as daag ad cloan Israel ec Shiloh t’ayns cheer Chanaan, dy gholl gys cheer Ghilead, thalloo nyn eiraght, haink er yn ayrn oc, cordail rish goo’n Chiarn liorish Moses.

10As tra haink ad gys oirr Yordan, t’ayns cheer Chanaan, ren cloan Reuben, as cloan Ghad, as lieh-tribe Vanasseh, altar mooar y hroggal ayns shen liorish Jordan, altar feer ard as cronnal. 11As cheayll cloan Israel imraa, Cur-my-ner, ta cloan Reuben, as cloan Ghad, as lieh-tribe Vanasseh, er hroggal altar jeeragh er thalloo Chanaan, ayns ardjyn Yordan, raad hie cloan Israel harrish. 12As tra cheayll cloan Israel shoh, ren slane sheshaght cloan Israel chaglym cooidjagh ec Shiloh, dy gholl dy chaggey nyn ’oï. 13As hug cloan Israel Phinehas mac Eleazar y saggyrt gys cloan Reuben, as gys cloan Ghad, as gys lieh-tribe Vanasseh, gys cheer Ghilead; 14As mârishyn jeih princeyn, prince veih dagh tribe trooid ooilley Israel; as va dagh dooinney jeu kione thie e ayrey mastey thousaneyn Israel. 15As haink ad gys cloan Reuben, as gys cloan Ghad, as gys lieh-tribe Vanasseh, ayns cheer Ghilead, as loayr ad roo, gra, 16Myr shoh ta slane pobble y Chiarn gra, Cre’n drogh obbyr shoh ta shiu er n’yannoo noi’n Jee dy Israel, dy hyndaa ersooyl veih shirveish y Chiarn ec y traa shoh, ayns dy vel shiu er hroggal altar diu hene, myr shoh nish girree magh noi’n Chiarn? 17Nagh s’lioar dooin peccah Pheor, veih’n loght echey cha vel shin er nyn seyrey gys y laa jiu, (ga dy dug eh lesh y plague er sheshaght y Chiarn,) 18Agh dy negin diu chyndaa ersooyl yn laa jiu veih geiyrt da’n Chiarn? as shoh myr vees eh, fakin dy vel shiuish er n’irree magh jiu noi’n Chiarn, dy bee e yymmoose er ny vrasnaghey mairagh noi slane pobble Israel. 19Agh my ta shiu goaill cheer nyn eiraght dy ve neu-chasherick, tar-jee harrish reesht gys thalloo-eiraght y Chiarn, raad ta cabbane-agglish y Chiarn, as jean-jee cummal mârin: agh ny irree-jee magh noi’n Chiarn, ny noi shinyn, liorish troggal altar elley diu hene, marish altar yn Chiarn y Jee ain. 20Nagh row Achan mac Zerah kyndagh ’sy chooid mollaghtagh, as nagh huitt jymmoose er slane sheshaght Israel? cha nee eshyn ny-lomarcan v’er ny cherraghey son e vee-chairys.

21Eisht dreggyr cloan Reuben, as cloan Ghad, as lieh-tribe Vanasseh, as dooyrt ad rish ard-gheiney thousaneyn Israel, 22Ec y Chiarn Jee dy yeeghyn, ec y Chiarn Jee dy yeeghyn, ta fys; as nee Israel hene toiggal; my te er-chee dy irree magh, ny ayns mee-viallys da’n Chiarn, (shen myr choonys eh lhien,) 23Dy vel shin er hroggal dooin altar dy hyndaa veih’n Chiarn, ny dy ve ry-hoi chebbal er oural-losht, ny oural-arran, ny dy hebbal er ourallyn-shee, lhig da’n Chiarn hene briwnys eddyr shin; 24Agh dy nee eer son yn oyr shoh ren shin eh, er-aggle son y traa ta ry-heet dy jir y chloan euish rish y chloan ainyn, Cre ta’n Chiarn Jee Israel diuish? 25Son ta’n Chiarn er n’yannoo Jordan yn chagliagh eddyr shinyn as shiuish; cha vel veg y chairys euish, chloan Reuben, as chloan Ghad, ayns y Chiarn: myr shoh yinnagh yn chloan euish giarey magh y chloan ainyn veih shirveish y Chiarn. 26Dooyrt shin er-y-fa shen, Lhig dooin goaill ayns laue dy hroggal altar, cha nee son ourallyn-losht, ny son chebballyn; 27Agh dy ve son feanish eddyr shiuish as shinyn, as nyn sheelogheyn nyn yeï, dy vel cairys ain dy heet gys shirveish y Chiarn ayns e eanish, lesh nyn ourallyn-losht, as lesh nyn jebballyn as lesh nyn ourallyn-shee; nagh jir yn chloan euish rish y chloan ainyn ayns y traa ta ry-heet, Cha vel ayrn euish ayns y Chiarn. 28Dooyrt shin er-y-fa shen, tra jir ad myr shoh rooin, ny rish nyn sluight, ’sy traa ta ry-heet, dy vod mayd gansoor, Cur-jee my-ner sampleyr jeh altar y Chiarn, ren nyn ayraghyn y hroggal, cha nee ry-hoi chebballyn-losht, ny son ourallyn; agh son feanish eddyr shinyn as shiuish. 29Ny lhig eh Jee dy n’irragh shin magh noi’n Chiarn, dy hreigeil shirveish y Chiarn, liorish troggal altar erbee son ourallyn-losht, son ourallyn-arran, ny son chebballyn, agh altar y Chiarn nyn Yee ta kiongoyrt rish e chabbane-agglish.

30As tra cheayll Phinehas y saggyrt, as princeyn y cheshaght, as ard-gheiney thousaneyn Israel va mârish, ny goan va cloan Reuben, as cloan Ghad, as cloan Vanasseh, er loayrt, ghow ad lane boggey jeu. 31As dooyrt Phinehas, mac Eleazar y saggyrt, rish cloan Reuben, as cloan Ghad, as rish cloan Vanasseh, Ta shin toiggal y laa jiu dy vel y Chiarn ny mast’ ain, son nagh vel shiu er n’yannoo’n peccah shoh noi’n Chiarn: nish ta shiu er livrey cloan Israel veih jymmoose y Chiarn.

32As hie Phinehas mac Eleazar y saggyrt, as ny princeyn, roue, veih cloan Reuben, as veih cloan Ghad, as thalloo Ghilead, gys cheer Chanaan, lesh fys gys cloan Israel. 33As ghow cloan Israel lane boggey jeh’n chooish; as ren cloan Israel Jee y vannaghey; as cha row smooinaghtyn sodjey oc dy gholl seose gys caggey nyn ’oï, dy stroie’n cheer ayn va cloan Reuben as Gad cummal. 34As ren cloan Reuben, as cloan Ghad, genmys yn altar Ed: son bee eh son feanish eddyr shin dy vel y Chiarn y Jee ain.