CAB. XXIII

1As haink eh gy-kione lurg foddey dy hraa, as dy row’n Chiarn er choyrt fea dy Israel veih ooilley nyn noidyn er dy chooilley heu, dy row Joshua er n’aase shenn as er roie dy mooar ayns eash. 2As ren Joshua sumney ooilley Israel, as nyn shanstyr, as ny ard-gheiney, as ny briwnyn, as ny fir-oik, dy heet kionfenish, as dooyrt eh roo, Ta mee shenn as er roie ayns eash: 3As ta shiu er vakin ooilley ny ta’n Chiarn y Jee eu er n’yannoo rish ooilley ny ashoonyn shoh er y ghraih euish: son she’n Chiarn y Jee eu t’er chaggey er nyn son. 4Cur-jee my-ner, ta mee er rheynn erriu liorish lot ny ashoonyn shoh ta er-mayrn, dy ve son eiraght da ny tribeyn eu, veih Jordan, marish ooilley ny ashoonyn ta mee er yiarey jeh, derrey’n cheayn mooar lesh y sheear. 5As y Chiarn y Jee eu, eh-hene nee geiyrt ad magh kiongoyrt riu, as nyn imman ass y chilley eu; as gowee shiu yn cheer oc diu hene, myr ta’n Chiarn y Jee eu er yialdyn diu. 6Bee-jee shiuish er-y-fa shen feer dunnal, dy reayll as dy chooilleeney ooilley ny ta scruit ayns lioar leigh Voses, nagh jyndaa shiu dy lhiattee veih gys y laue yesh ny gys y laue hoshtal; 7Nagh jean-jee ainjys rish ny ashoonyn shoh, ta er-mayrn ny mast’ eu; chamoo loayrys shiu dy arrymagh jeh enmyn ny jeeghyn oc, ny loo lioroo, ny shirveish ad, ny croymmey shiu-hene sheese huc: 8Agh freill-jee firrinagh gys y Chiarn y Jee eu myr ta shiu er n’yannoo gys y laa t’ayn jiu. 9Son ta’n Chiarn er n’eebyrt magh reue ashoonyn mooar as lajer: agh er ny son euish, cha row dooinney erbee abyl shassoo reue gys y laa shoh. 10Nee un dooinney jiuish gimman ersooyl thousane; son she’n Chiarn y Jee eu ta caggey er nyn son, myr yiall eh diu. 11Bee-jee er-y-fa shen feer imneagh, dy chur graih da’n Chiarn y Jee eu. 12Agh my nee shiu er aght erbee coyrt cooyl, as lhiantyn rish fooilliagh ny ashoonyn shoh, ta foast ny mast’ eu, as my nee shiu poosaghyn roo, as jannoo cleunys roosyn, ny adsyn riuish; 13Toig-jee son firrinys nagh jean y Chiarn y Jee eu arragh gimman magh reue veg jeh ny ashoonyn shoh; agh bee ad myr ribbaghyn as geulaghyn diu, as son drineyn, ayns nyn lhiatteeyn, as jilg ayns nyn sooillyn, derrey hed shiu naardey ass y cheer mie shoh, ta’n Chiarn nyn Yee er choyrt diu. 14As cur-jee my-ner, ta mee nish goll raad ooilley’n seihll, as ta fys eu ayns ooilley nyn greeaghyn, as nyn anmeenyn, nagh vel nhee erbee er vailleil jeh ooilley ny reddyn mie ta’n Chiarn nyn Yee er loayrt mychione eu; t’ad ooilley er jeet gys kione, as cha vel red hene jeu nagh vel cooilleenit. 15Shen-y-fa hig eh gy-kione, ’naght myr ta dy chooilley nhee mie er jeet erriu, ta’n Chiarn nyn Yee er yialdyn diu; myr shen ver y Chiarn lesh erriu dy chooilley olk, derrey vees eh er stroie shin ass y cheer mie shoh ta’n Chiarn nyn Yee er choyrt diu. 16Tra vees shiu er vrishey conaant y Chiarn y Jee eu, doardee eh diu, as er n’gholl geiyrt er jeeghyn elley dy hirveish ad, as er choyrt ooashley daue; eisht bee corree’n Chiarn er ny vrasnaghey nyn ’oï, as bee shiu dy leah er nyn eebyrt veih’n cheer mie shen t’eh er choyrt diu.