CAB. XXIV

1As haggil Joshua ooilley tribeyn Israel gys Shiloh, as deïe eh er shanstyr Israel, as er ny ard-gheiney, as er ny briwnyn, as er ny fir-oik; as haink ad fenish Yee. 2As dooyrt Joshua rish ooilley’n pobble, Shoh myr ta’n Chiarn Jee Israel gra, Ren ny ayraghyn eu ’sy chenn earish cummal er cheu elley jeh’n awin [Euphrates] eer Terah ayr Abraham, as ayr Nachor: as ren ad jeeghyn joarree y hirveish. 3As ghow mee nyn ayr Abraham veih’n cheu elley jeh’n awin, as leeid mee eh trooid ooilley cheer Chanaan, as vishee mee yn sluight echey, as hug mee Isaac da. 4As hug mee da Isaac, Jacob as Esau: as da Esau hug mee cronk Seir son e chummal: agh hie Jacob as e chloan sheese gys Egypt. 5Hug mee myrgeddin Moses as Aaron er chaghteraght, as hug mee kerraghey trome er Egypt, cordail rish ny ren mee ny mast’ oc: as ny lurg shen hug mee lhiam shiuish magh ass. 6As hug mee lhiam ny ayraghyn euish ass Egypt: as haink shiu gys yn aarkey; as hie ny Egyptianee er-eiyrt’s nyn ayraghyn lesh fainee as markee gys yn Aarkey jiarg. 7As tra deïe ad gys y Chiarn, hug eh dorraghys eddyr shiuish as ny Egyptianee, as hug eh lesh yn aarkey orroo, as choodee eh ad; as ta ny sooillyn eu er vakin ny ren mee ayns Egypt: as ren shiu cummal ayns yn aasagh ry-foddey dy hraa. 8As hug mee lhiam shiu gys cheer ny Amoriteyn, va cummal er y cheu elley dy Yordan; as ren ad caggey riu; as livrey mee ad gys nyn laue, dy voddagh shiuish yn cheer oc y ghoaill; as stroie mee ad reue. 9Eisht hrog Balak mac Zippor, ree Voab, dy chaggey noi Israel, as hug eh fys er Balaam mac Beor dy ghwee mollaght erriu: 10Agh cha jinnin’s geaishtagh rish Balaam; shen-y-fa ren eh shiu dy kinjagh y vannaghey: myr shoh ren mee shiu y livrey ass e laue. 11As hie shiu harrish Jordan, as haink shiu gys Jericho: as ren deiney Yericho caggey nyn ’oï, ny Amoriteyn, as ny Perizziteyn, as ny Canaaniteyn, as ny Hittiteyn, as ny Girgashiteyn, ny Hiviteyn, as ny Jebusiteyn; as ren mee ad y livrey gys nyn laue. 12As hug mee yn pheishteig-nieunagh reue, ren ad y eiyrt magh rhymbiu, eer yn daa ree jeh ny Amoriteyn; agh cha nee lesh y chliwe ayd’s, ny lesh dty vhow. 13As ta mee er choyrt diu cheer ayn nagh ren shiuish laboragh, as ard-valjyn nagh ren shiu troggal, as ta shiu cummal ayndoo; jeh ny garaghyn-feeyney, as ny garaghyn-olive, nagh ren shiuish soiaghey, ta shiu gee.

14Shen-y-fa nish, gow-jee aggle roish y Chiarn, as shirveish-jee eh ayns ynrickys as firrinys: as cur-jee ersooyl ny jeeghyn ren ny ayraghyn eu shirveish er cheu elley jeh’n awin, as ayns Egypt; as shirveish-jee shiuish yn Chiarn. 15Agh my te noi nyn aigney dy hirveish yn Chiarn, reih-jee yn laa jiu quoi nee shiu y hirveish; edyr ny jeeghyn ren ny ayraghyn eu shirveish cheu elley jeh’n awin, ny jeeghyn ny Amoriteyn ’sy cheer oc ta shiu cummal: agh er my hon hene as my lught-thie, shirveish mayd y Chiarn. 16As dreggyr y pobble, as dooyrt ad, Ny lhig eh Jee dy dreigagh shin y Chiarn, dy hirveish jeeghyn elley; 17Son y Chiarn y Jee ain, eshyn eh hug lesh shinyn as nyn ayraghyn ass cheer Egypt, veih thie ny bondiaght, as ren ny cowraghyn mooarey shen y hoilshaghey ’sy chilley ain, as ren nyn goadey ayns ooilley’n raad ren shin troailt, as mastey ooilley’n pobble ny hrooid oc hie shin. 18As ren y Chiarn geiyrt magh roïn ooilley’n pobble, eer ny Amoriteyn cummaltee’n cheer: shen-y-fa nee mayd myrgeddin shirveish y Chiarn; son eshyn y Jee ain. 19As dooyrt Joshua rish y pobble, Cha vod shiu shirveish y Chiarn: son t’eh ny Yee casherick; t’eh ny Yee eadolagh; cha leih eh diu nyn mee-viallys, ny nyn beccaghyn. 20My nee shiu treigeil y Chiarn as shirveish jeeghyn joarree, eisht nee eh chyndaa nyn ’oï, as ver eh seaghyn erriu, as ver eh mow shiu, lurg ooilley’n mie t’eh er n’yannoo diu. 21As dooyrt y pobble rish Joshua, Cha jean mayd dy bragh treigeil eh, agh nee mayd shirveish y Chiarn. 22As dooyrt Joshua rish y pobble, Ta shiu feanishyn noi eu hene dy vel shiu er reih’n Chiarn, dy hirveish eh. As dooyrt adsyn, Ta shin nyn veanishyn. 23Nish er-y-fa shen, (as eshyn,) cur-jee ersooyl ny jeeghyn joarree ta ny mast ’eu, as lhig da ny creeaghyn eu lhiantyn gys y Chiarn Jee Israel. 24As dooyrt y pobble rish Joshua, Yn Chiarn y Jee ain nee mayd shirveish, as da e choraa ver mayd biallys. 25Myr shoh ren Joshua conaant rish y pobble yn laa shen, as ren eh fockley magh daue yn slattys as yn oardagh ayns Shiloh, liorish Shechem.

26As ren Joshua ny goan shoh y scrieu ayns lioar leigh Yee, va ayns cabbane-agglish y Chiarn, as ghow eh clagh vooar, as hoie eh seose eh ayns shen fo billey-darragh. 27As dooyrt Joshua rish ooilley’n pobble, Cur-my-ner bee’n clagh shoh son feanish eddyr shin; son te er chlashtyn ooilley ny goan ta’n Chiarn er loayrt rooin: bee eh er-y-fa shen son feanish diu, nagh jean shiu gobbal yn Jee eu. 28Eisht lhig Joshua da’n pobble goll rhymboo, dy chooilley ghooinney gys e eiraght.

29As haink eh gy-kione lurg ny reddyn shoh, dy dooar Joshua mac Nun, sharvaant y Chiarn, baase, tra v’eh queig-feed as jeih bleeaney dy eash. 30As doanluck ad eh ayns thalloo e eiraght hene, ayns Timnath-serah, t’ayns cronk Ephraim, er cheu-twoaie cronk Gaash. 31As ren Israel shirveish y Chiarn rish slane lhing Yoshua, as lhing y chanstyr va bio lurg Joshua, as v’er vakin ooilley ny obbraghyn va’n Chiarn er n’yannoo son Israel.

32As craueyn Yoseph, hug cloan Israel lhieu seose ass Egypt, ren ad y oanluckey ayns Shechem, ayns y pheesh dy ghrunt chionnee Jacob veih mec Hamor, ayr Shechem, son keead peesh dy argid: as haink eh dy ve eiraght cloan Yoseph. 33As hooar Eleazar mac Aaron baase; as doanluck ad eh ayns cronk va lesh Phinehas e vac, v’er ny choyrt da ayns cronk Ephraim.