CAB. IV

1As haink eh gy-kione, tra va’n slane pobble dy bollagh er gholl harrish Jordan, dy loayr y Chiarn rish Joshua, gra, 2Gow-jee daa ghooinney jeig veih mastey yn pobble, dooinney ass dagh tribe, 3As cur-jee sarey daue, gra, Gow-jee ass shoh veih mean Yordan, veih yn eer ynnyd er ren cassyn ny saggyrtyn shassoo shickyr, daa chlagh jeig; as ver shiu lhieu ad mêriu, as faagail ad ’syn ynnyd raad nee shiu campal noght. 4Eisht deïe Joshua er y daa ghooinney jeig v’eh hene er reih mastey cloan Israel, ass dagh tribe dooinney: 5As dooyrt Joshua roo, Chyndaa-jee dy tappee gys arg y Chiarn y Jee eu ayns mean Yordan, as trog-jee dagh dooinney eu clagh er e gheaylin, cordail rish earroo tribeyn cloan Israel: 6Dy vod shoh ve cowrey ny-vud eu, tra nee nyn gloan briaght jeh nyn ayraghyn ’sy traa ry-heet, gra, Cre ta er ny hoiggal liorish ny claghyn shoh? 7Eisht nee shiu ginsh daue, dy row ushtaghyn Yordan er nyn scarrey veih-my-cheilley roish arg conaant y Chiarn; tra hie eh harrish Jordan, dy row ushtaghyn Yordan er nyn giarey jeh: as bee ny claghyn shoh son imraa da cloan Israel er son dy bragh. 8As ren cloan Israel myr va Joshua er harey, as hrog ad daa chlagh jeig veih mean Yordan, myr va’n Chiarn er ghra rish Joshua, corrym rish earroo tribeyn cloan Israel, as hug ad lhieu ad mâroo gys yn ynnyd ren ad campal ayn, as hug ad ad ny lhie ayns shen. 9As ren Joshua soiaghey seose daa chlagh jeig ayns mean Yordan, ayns yn eer ynnyd ren cassyn ny saggyrtyn dymmyrk arg y chonaant shassoo er: as t’ad ayns shen gys y laa t’ayn jiu.

10Son ren ny saggyrtyn dymmyrk yn arg shassoo ayns mean Yordan, derrey va dy chooilley nhee er ny chooilleeney va’n Chiarn er phointeil da Joshua dy ghra rish y pobble, cordail rish ooilley ny va Moses er churmal Joshua: as ren y pobble siyr, as hie ad harrish. 11As haink eh gy-kione, tra va ooilley yn pobble dy bollagh er n’gholl harrish, dy jagh arg y Chiarn as ny saggyrtyn harrish, ayns fenish y pobble. 12As ren cloan Reuben, as cloan Ghad, as lieh-tribe Vanasseh, goll harrish armit roish cloan Israel, myr va Moses er loayrt roo: 13Mysh da-eed thousane aarloo dy ghoaill magher hie harrish kiongoyrt rish y Chiarn gys caggey, gys thalloo-rea Yericho.

14Er y laa shen ren y Chiarn soiaghey seose Joshua ayns ard-ooashley fenish ooilley Israel; as v’ad arrymagh da, myr v’ad arrymagh da Moses, ooilley laghyn e vea. 15As loayr y Chiarn rish Joshua, gra, 16Abbyr rish ny saggyrtyn ta gymmyrkey arg yn eanish, ad dy heet seose ass Jordan. 17Doardee Joshua er-y-fa shen ny saggyrtyn, gra, Tar-jee seose ass Jordan. 18As haink eh gy-kione, tra va ny saggyrtyn va gymmyrkey arg conaant y Chiarn er jeet seose ass mean Yordan, as (dy goan) va boyn-coshey ny saggyrtyn er roshtyn gys y thalloo chirrym, dy ren ushtaghyn Yordan chyndaa gys nyn ynnyd hene, as gatt harrish ooilley e vrooinyn, myr v’ad roïe.

19As haink ooilley yn pobble seose ass Jordan er y jeihoo laa jeh’n chied vee, as hoie ad nyn gamp ayns Gilgal, ayns ardjyn my-hiar Jericho.

20As hoie Joshua seose ayns Gilgal yn daa chlagh jeig v’ad er ghoaill ass Jordan. 21As loayr eh rish cloan Israel, gra, Tra nee yn chloan eu briaght jeh nyn ayraghyn ’sy traa ry-heet, gra, Cre ta er ny hoiggal liorish ny claghyn shoh? 22Eisht ver shiu toiggal da nyn gloan, gra, Haink Israel trooid Jordan er thalloo chirrym. 23Son ren y Chiarn yn Jee eu chyrmaghey seose ushtaghyn Yordan reue, derrey va shiu er n’gholl trooid, rere myr ren y Chiarn yn Jee eu rish y Faarkey Jiarg, hyrmee eh seose roïnyn, derrey va shin er n’gholl trooid. 24Dy vod dy chooilley phobble er feaï-ny-cruinney cronnaghey laue y Chiarn, dy vel eh niartal; dy vod shiuish aggle y ghoaill roish y Chiarn y Jee eu ooilley laghyn nyn mea.