CAB. V

1As haink eh gy-kione, tra va ooilley reeaghyn ny Amoriteyn, v’ayns naboonys Yordan er cheu-heear, as ooilley reeaghyn ny Canaaniteyn, v’er slyst ny marrey, er chlashtyn dy row yn Chiarn er hyrmaghey seose ushtaghyn Yordan roish cloan Israel, derrey v’ad er n’gholl harrish, dy ren ny creeaghyn oc gannooinaghey, chamoo va bree ayndoo veg sodjey, kyndagh rish cloan Israel. 2Ec y traa shen dooyrt y Chiarn rish Joshua, Lhig da skynnyn gyerey ve jeant, as lhig da cloan Israel v’er ny yiarey-chymmylt yn nah cheayrt. 3As hooar Joshua skynnyn gyerey jeant, as va cloan Israel er nyn yiarey-chymmylt ec cronk ny chymmyltee. 4As shoh yn oyr v’ec Joshua dy yiarey-chymmylt: ooilley ny deiney haink ass Egypt, eer ooilley ny deiney caggee, hooar ad baase, ’syn aasagh er y raad, erreish daue v’er jeet magh ass Egypt. 5Nish va ooilley yn pobble haink ass er nyn yiarey-chymmylt; agh ooilley yn pobble v’er ny ruggey ’syn aasagh er y raad myr haink ad ass Egypt, ad shen cha row er nyn yiarey-chymmylt. 6Son ren cloan Israel troailt da-eed bleïn ayns yn aasagh, derrey va ooilley yn pobble va deiney caggee, haink magh ass Egypt, marroo, er-yn-oyr nagh dug ad biallys da coraa yn Chiarn: daue shoh ren y Chiarn breearrey nagh jinnagh eh shilley dauesyn jeh’n cheer ren y Chiarn loo da ny ayraghyn oc dy choyrt daue, cheer taal bainney as mill. 7As y chloan ocsyn, v’eh er hroggal seose ’syn ynnyd oc, adsyn ren Joshua y yiarey-chymmylt: son v’ad gyn giarey-chymmylt: er-yn-oyr nagh row yn cowrey shen er ny choyrt orroo er y raad. 8As haink eh gy-kione, tra v’ad erreish ooilley yn pobble y yiarey-chymmylt, dy ren ad tannaghtyn ’sy champ derrey v’ad slane. 9As dooyrt y Chiarn rish Joshua, Jiu ta mee er scughey ersooyl oltooan Egypt veueish. Shen-y-fa ta’n ynnyd enmyssit Gilgal gys y laa t’ayn jiu.

10As ren cloan Israel campal ayns Gilgal, as dreill ad y chaisht er y chiarroo laa yeig jeh’n vee, ’syn astyr, ayns cheer-rea Yericho. 11As ren ad gee jeh shenn arroo yn cheer er laa-ny-vairagh lurg y chaisht, berreenyn gyn soorit as arroo greddanit ’syn eer laa cheddin.

12As va’n manna ec kione er laa-ny-vairagh erreish daue v’er n’ee jeh shenn arroo yn cheer; chamoo va manna arragh ec cloan Israel veih’n traa shen; agh ren ad gee jeh mess thalloo Chanaan yn vleïn shen.

13As haink eh gy-kione, tra va Joshua er-gerrey da Jericho, dy hrog eh seose e hooillyn as yeeagh eh, as cur-my-ner, va dooinney ny hassoo jeeragh roish, as cliwe rooisht ny laue: as hie Joshua huggey, as dooyrt eh rish, Vel uss er y cheu ainyn, ny son nyn noidyn? 14As dooyrt eshyn, Cha nee nyn ’oï; agh myr ard-leeideilagh sheshaght-caggee yn Chiarn ta mish er jeet. As chroym Joshua lesh e eddin gys yn ooir, as hug eh ammys, as dooyrt eh rish, Cre ta my Hiarn dy ghra rish e harvaant? 15As dooyrt ard-leeideilagh sheshaght-caggee yn Chiarn rish Joshua, Feayshil dty vraag veih dty chass; son ta’n ynnyd er t’ou dty hassoo casherick. As ren Joshua myr shen.