CAB. VII

1Agh va cloan Israel foiljagh ayns goaill jeh’n stoo custey: son ren Achan, mac Carmi, mac Zabdi, mac Zerah, jeh tribe Yudah, goaill jeh’n red custey: as va jymmoose yn Chiarn er ny vrasnaghey noi cloan Israel. 2As ren Joshua deiney y choyrt, veih Jericho gys Ai, ta liorish Beth-aven, er cheu-har jeh Beth-el, as loayr eh roo, gra, Immee-jee seose, as gow-jee baght jeh’n cheer. As hie ny deiney seose as ghow ad baght jeh Ai. 3As hyndaa ad gys Joshua, as dooyrt ad rish, Ny lhig da ooilley yn pobble goll seose; agh lhig da mysh ghaa ny three dy housaneyn dooinney goll seose, as Ai y ghoaill, as ny cur y doccar er ooilley’n pobble dy gholl gys shen; son cha vel ad mooarane. 4Myr shen hie mysh three thousaneyn jeh’n pobble seose: as ren ad chea voish deiney Ai. 5As ren deiney Ai mysh shey deiney jeig as feed jeu y varroo: son deiyr ad orroo veih’n yiat dy jarroo gys Shebarim, as varr ad jeu myr v’ad goll sheese: shen-y-fa ren creeaghyn y pobble lheïe ersooyl, as v’ad lhag myr ushtey.

6As raip Joshua e choamrey, as huitt eh er e eddin gys yn ooir, kiongoyrt rish arg y Chiarn, derrey’n astyr, eh-hene as shanstyryn Israel, as hug ad joan er nyn ghing. 7As dooyrt Joshua, Ah treih! O Hiarn Yee, cre’n-fa t’ou er choyrt lhiat yn pobble shoh harrish Jordan, dy livrey shin gys laue ny Amoriteyn, dy stroie shin? Dy baillish Jee dy beagh shin er ve booiagh raad va shin, as er chummal er cheu elley dy Yordan. 8O Hiarn, cre oddym’s gra, tra ta Israel cur cooyl rish nyn noidyn! 9Son nee ny Canaaniteyn, as ooilley cummaltee ny cheerey, clashtyn jeh, as nee ad shin y chruinnaghey mygeayrt, as giarey jeh yn ennym ain veih’n thalloo: as cre nee uss er son gloyr dty ennym mooar hene?

10As dooyrt y Chiarn rish Joshua, Irree seose; cre’n-fa t’ou myr shoh lhie as dty veeal foyd? 11Ta Israel er n’yannoo peccah, as t’ad er vrishey my chonaant ren mee y harey daue: son t’ad er ghoaill jeh’n eer red cursit, as t’ad myrgeddin er gheid, as neesht er cheiltyn, as eer er choyrt yn ghriu mastey yn chooid oc hene. 12Shen va’n oyr nagh voddagh cloan Israel shassoo roish nyn noidyn, agh dy dug ad cooyl da nyn noidyn, er-y-fa dy row ad cursit: chamoo veem’s ny-sodjey mêriu mannagh stroie shiu yn er custey shen veih ny-vud eu. 13Seose oo, jean y pobble y chasherickey, as abbyr roo, Jean-jee shiu-hene y chasherickey cour y laa mairagh: son myr shoh ta’n Chiarn Jee dy Israel gra, Ta red cursit ayns dty vean, O Israel: cha vod oo shassoo roish dty noidyn, derrey ta shiu goaill yn red cursit ersooyl veih ny mast’ eu. 14’Sy voghrey, er-y-fa shen, hig shiu kionfenish cordail rish nyn tribeyn: as hig eh gy-kione, dy jean y tribe, nee’n Chiarn y ghoaill, cheet cordail rish nyn gynneeyn; as yn kynney nee’n Chiarn y ghoaill, hig ad cordail rish ny lught-thieyn oc; as yn lught-thie nee’n Chiarn y ghoaill, hig ad dooinney as dooinney. 15As hig eh gy-kione, eshyn vees y red cursit er ny gheddyn er, dy bee eh er ny lostey lesh aile, eh-hene, as ooilley ny t’echey: er-yn-oyr dy vel eh er vrishey conaant y Chiarn, as son dy vel eh er n’yannoo dy olk ayns Israel.

16Myr shen dirree Joshua dy moghey, as hug eh lesh Israel magh lurg nyn tribeyn; as va tribe Yudah er ny ghoaill: 17As hug eh lesh magh kynney Yudah; as ghow eh kynney ny Zarhiteyn: as hug eh lesh magh kynney ny Zarhiteyn, dooinney as dooinney; as va Zabdi er ny ghoaill: 18As hug eh lesh magh yn lught-thie echeysyn, dooinney as dooinney; as va Achan, mac Carmi, mac Zabdi, mac Zerah, jeh tribe Yudah, er ny ghoaill. 19As dooyrt Joshua rish Achan, My vac, cur, ta mee guee ort, gloyr da’n Chiarn Jee Israel, as gow-rish dty loght huggeysyn; as insh dooys nish cre t’ou er n’yannoo, ny keill voym eh. 20As dreggyr Achan Joshua, as dooyrt eh, Ta mee dy jarroo er n’yannoo peccah noi’n Chiarn Jee Israel, as shoh as myr shoh ta mee er n’yannoo. 21Tra honnick mee mastey yn spooilley garmad aalin Babylonagh, as daa cheead shekel dy argid, as wedge airh jeh trimmid jeih shekelyn as da-eed, dy dug mee eisht saynt daue, as ghow mee ad; as cur-my-ner, t’ad follit ’syn ooir ayns mean my chabbane, as yn argid foue.

22Er shoh hug Joshua chaghteryn, as roie ad gys y chabbane; as cur-my-ner, ve follit ayns y chabbane, as yn argid fo. 23As ghow ad ad ass mean y chabbane, as hug ad lhieu ad gys Joshua, as gys ooilley cloan Israel, as skeayl ad magh ad kiongoyrt rish y Chiarn. 24As ghow Joshua, as ooilley Israel mârish, Achan mac Zerah, as yn argid, as y garmad, as y wedge airh, as e vec, as e inneenyn, as ny dew, as ny assylyn echey, as e chirree, as e chabbane, as ooilley ny v’echey: as hug ad lhieu ad gys coan Achor. 25As dooyrt Joshua, Cre’n-fa t’ou er hayrn seaghyn orrin? nee’n Chiarn uss y heaghney yn laa jiu. As ren ooilley Israel eh y chlaghey lesh claghyn, as ad y lostey lesh aile erreish daue v’er chlaghey ad lesh claghyn. 26As hrog ad harrish cayrn mooar cloaie gys y laa jiu. Er shoh hyndaa yn Chiarn veih eulys e yymmoose. Shen-y-fa, jir ad Coan Achor rish yn ynnyd shen gys y laa jiu.