CAB. VIII

1As dooyrt y Chiarn rish Joshua, Ny bee aggle ort, chamoo lhig sheese dty chree: gow mayrt ooilley ny deiney caggee, as trog ort, immee seose noi Ai: jeeagh, ta mee er livrey gys dty laue ree Ai, as e phobble, as e ard-valley, as e heer. 2As nee oo rish Ai as rish y ree eck, myr t’ou er n’yannoo rish Jericho as rish e ree: ynrycan yn spooilley, as yn ollagh eck, nee shiu goaill son cragh diu hene: cur deiney dy lhie cooyl-chlea noi’n ard-valley cheu e cooylloo.

3Er shoh hrog Joshua er, as ooilley ny deiney caggee, dy gholl seose noi Ai: as ren Joshua reih magh jeih thousaneyn as feed dy gheiney-caggee niartal, as hug eh ad magh ’syn oie. 4As doardee eh daue, gra, Cur-jee my-ner, nee shiu lhie cooyl-chlea noi yn ard-valley, dy jarroo ny chooyl: ny gow-jee roud voish yn ard-valley, agh bee-jee ooilley ullee: 5As tayrn-yms, as ooilley my gheiney ta mârym, er-gerrey da’n ard-valley: as hig eh gy-kione tra hig ad magh nyn ’oï, myr ec y toshiaght, dy der mayd cooyl daue, 6(Son hig ad magh geiyrt orrin,) derrey ta shin er hayrn ad voish yn ard-valley: son jir adsyn, T’ad coyrt cooyl rooin, myr ren ad roïe: shen-y-fa, nee mayd chea kiongoyrt roo. 7Eisht nee shiuish troggal erriu veih’n cooyl-chlea, as goaill yn ard-valley: son nee’n Chiarn y Jee eu eh y livrey gys nyn laueyn. 8As lurg diuish v’er n’ghoaill yn ard-valley, ver shiu yn ard-valley er aile: cordail rish oardagh yn Chiarn nee shiu. Cur-jee my-ner, ta mee er choyrt sarey diu.

9Hug Joshua er-y-fa shen magh ad; as hie ad dy lhie cooyl-chlea, as ghow ad grunt eddyr Beth-el as Ai, sheear voish Ai; agh duirree Joshua yn oie shen mastey n pobble. 10As dirree Joshua dy moghey ’sy vadran, as ghow eh musteral y pobble, as hie eshyn as leeideilee Israel seose, roish y pobble gys Ai. 11As hie ooilley ny deiney-caggee va mârish seose, as hayrn ad er-gerrey, as haink ad kiongoyrt rish yn ard-valley, as hass ad ayns order-caggee cheu-twoaie dy Ai: nish va coan eddyr adsyn as Ai. 12As ghow eh mysh queig thousane dooinney, as hug eh ad dy lhie cooyl-chlea eddyr Beth-el as Ai, cheu-heear yn ard-valley. 13Nish tra v’ad er hoiaghey yn pobble, eer yn slane sheshaght-caggee v’er cheu-twoaie yn ard-valley, as ny cooyl-chleaderyn er cheu-heear yn ard-valley, hie Joshua yn oie shen gys mean y choan.

14As haink eh gy-kione, tra honnick ree Ai shen, dy ren ad siyr, as hrog ad orroo dy moghey, as hie deiney yn ard-valley magh dy chaggey noi Israel, eshyn as ooilley e gheiney, ec traa pointit, er oirr y vagher-caggee, kiongoyrt rish y choan; agh ve gyn-yss da, dy row deiney lhie cooyl-chlea er e hon cheu-heear yn ard-valley. 15As lhig Joshua as ooilley Israel orroo myr dy row ad er choayl yn laa, as roie ad er-chea raad yn aasagh. 16As va ooilley ny deiney v’ayns Ai sumnit cooidjagh dy gholl er nyn eiyrt’s; as deiyr ad er Joshua, as v’ad er nyn dayrn ersooyl veih’n ard-valley. 17As cha row dooinney faagit ayns Ai ny Beth-el nagh jagh magh er-eiyrt’s Israel: as daag ad yn ard-valley foshlit, as hie ad er-eiyrt’s Israel. 18As dooyrt y Chiarn rish Joshua, Sheeyn magh yn shleiy t’ayns dty laue lesh Ai; son livrey-ym eh gys dty laue. As ren Joshua yn shleiy v’echey ’sy laue y heeyney magh lesh yn ard-valley. 19As hrog ny deiney va nyn lhie cooyl-chlea dy tappee orroo ass nyn follaghyn, as roie ad cha leah as v’eh er heeyney magh e laue, as hie ad stiagh ’syn ard-valley, as ghow ad eh, as ren ad siyr, as hug ad yn ard-valley er aile. 20As tra yeeagh deiney Ai nyn yeï, honnick ad, as cur-my-ner, hie jaagh yn ard-valley seose ’syn aer, as hie nyn dappey voue dy chosney roue, yn derrey raad ny’n raad elley: as ren ny deiney va er roie myr-yien er-chea gys yn aasagh chyndaa back dy choyrt eddin da nyn eiyrtyssee. 21As tra honnick Joshua, as ooilley Israel, dy row ny deiney va nyn lhie cooyl-chlea er ghoaill yn ard-valley, as dy row jaagh yn ard-valley er droggal, dy dug ad eddin reesht, as varr ad deiney Ai. 22As yn vooinjer elley, v’er n’ghoaill yn ard-valley, vrish ad magh nyn ’oï; myr shen dy row ad ayns mean Israel, paart dagh cheu jeu; as woaill ad ad, myr shen nagh daag ad fer er-mayrn dy scapail. 23As ghow ad ree Ai bio, as hug ad lhieu eh gys Joshua. 24As haink eh gy-kione tra va Israel erreish stroie ooilley cummaltee Ai, ’sy vagher, ’syn aasagh raad v’ad er n’eiyrt ad, as tra v’ad ooilley er duittym lesh foyr y chliwe, derrey v’ad ooilley er nyn stroie, dy ren ooilley ny Israeliteyn chyndaa gys Ai, as woaill ad eh lesh foyr y chliwe. 25As shoh myr ve, dy row ooilley ny huitt yn laa shen, eddyr deiney as mraane, daa housane jeig, dy jarroo ooilley cummaltee Ai. 26Son cha ren Joshua tayrn back e laue, lesh v’eh er heeyney magh yn shleiy, derrey v’eh dy bollagh er stroie ooilley cummaltee Ai. 27Ynrycan maase as spooilley’n ard-valley shen, ghow Israel daue hene, cordail rish raa’n Chiarn, v’eh er harey da Joshua. 28As ren Joshua Ai y lostey, as ve ny charnane son dy bragh, dy jarroo ny hraartys gys y laa jiu. 29As ree Ai ren ad y chroghey er billey derrey’n astyr: as ec lhie ny greiney, doardee Joshua yn corp dy ve goit neose jeh’n villey, as dy hilgey eh rish giat yn ard-valley, as dy hroggal harrish cayrn mooar cloaie, ta er-mayrn gys y laa jiu.

30Eisht ren Joshua altar y hroggal da’n Chiarn Jee Israel, er cronk Ebal, 31Myr va Moses sharvaant y Chiarn er harey da cloan Israel, myr te scruit ayns lioar leigh Voses, Altar dy chlaghyn slane, orroo nagh daink rieau greïe yiarn: as heb ad er ourallyn-losht gys y Chiarn, as ourallyn-shee. 32As scrieu eh ayns shen er ny claghyn copy jeh leigh Voses, [ny jeih annaghyn,] v’eh er scrieu kionfenish cloan Israel. 33As ren ooilley Israel, as nyn shanstyr, as fir-oik, as nyn mriwnyn, shassoo er dagh cheu jeh’n arg, kiongoyrt rish ny saggyrtyn ny Leviteyn, va gymmyrkey arg conaant y Chiarn, chammah yn joarree as eshyn va ruggit ny mast’ oc; yn derrey lieh jeu jeeragh er cronk Gerizim, as y lieh elley jeeragh er cronk Ebal; myr va Moses sharvaant y Chiarn roïe er chur sarey, dy vannaghey pobble Israel 34As ny lurg shen lhaih eh ooilley goan y leigh, ny bannaghtyn as ny mollaghtyn, cordail rish ooilley ny va scruit ayns lioar y leigh. 35Cha row fockle jeh ooilley ny doardee Moses nagh ren Joshua lhaih kiongoyrt rish slane chaglym-cooidjagh Israel, marish ny mraane, as y chloan, as ny joarreeyn ny-vud oc va jeh’n un chredjue.