CAB. IX

1As haink eh gy-kione, tra cheayll ooilley ny reeaghyn va er cheu shoh dy Yordan jeh, ayns ny sleityn, as ayns ny coanyn, as ayns ooilley slystyn yn aarkey vooar jeeragh er Lebanon, yn Hittite, as yn Amorite, yn Canaanite, yn Perizzite, yn Hivite, as y Jebusite. 2Dy ren ad chaglym ooilley dy cheilley, dy chaggey rish Joshua as rish Israel.

3As tra cheayll cummaltee Ghibeon jeh ny va Joshua er n’yannoo rish Jericho as rish Ai, 4Hie ad gys obbyr dy cooishagh, as lhig ad orroo hene dy ve chaghteryn reeoil, as ghow ad shenn saick er nyn assylyn, as siyn-feeyney, shenn, raipit, as kerrit; 5As shenn vraagyn patchit er ny cassyn oc, as shenn eaddagh orroo; as va ooilley yn arran v’oc son nyn yurnah chirrym as lheeah. 6As hie ad gys Joshua gys y champ ec Gilgal, as dooyrt ad rishyn, as rish ard-gheiney Israel, Ta shinyn er jeet voish cheer foddey: jean-jee nish, er-y-fa shen, shee rooin. 7As dooyrt ard-gheiney Israel rish ny Hiviteyn, Foddee dy vel shiuish cummaltee yn cheer shoh; as kys oddys mayd coardail ’yannoo riu? 8As dooyrt ad rish Joshua, Ta shin dty harvaantyn. As dooyrt Joshua roo, Quoi shiu hene? as cre voish haink shiu? 9As dooyrt ad rish, Veih cheer feer foddey ta dty harvaantyn er jeet, trooid arrym gys ennym y Chiarn dty Yee: son ta shin er chlashtyn jeh e ghoo mooar, as ooilley ny ren eh ayns Egypt, 10As ooilley ny ren eh rish daa ree ny Amoriteyn, va cheu elley dy Yordan, rish Sihon ree Heshbon, as rish Og ree Vashan, va cummal ayns Ashtaroth. 11Shen-y-fa loayr nyn shanstyr as ooilley cummaltee yn cheer ain rooinyn, gra, Gow-jee beaghey mêriu son y jurnah, as immee-jee nyn guail, as abbyr-jee roo, Ta shin dty harvaantyn: jean-jee er-y-fa shen conaant dy hee rooin. 12Yn arran shoh ghow shin cheh son nyn yurnah, tra haink shin veih’n thie er y laa haink shin magh dy heet hiuish; agh nish, cur-my-ner, te chirrym, as lheeah: 13As va ny siyn-feeyney shoh noa, tra lhieen shin ad; as cur-my-ner, t’ad raipit: as t’ad shoh nyn garmadyn as nyn mraagyn er n’aase shenn kyndagh rish y jurnah mooar liauyr. 14As ghow ny ard-gheiney jeh’n bee oc, as cha ghow ad coyrle ec beeal y Chiarn. 15As ren Joshua shee roo, as ren eh conaant roo, as hug eh nyn mioys daue; as ren princeyn y pobble breearrey dy reaylley’n chonaant. 16As haghyr eh, ec kione three laa, erreish daue v’er n’yannoo yn conaant dy hee roo, dy geayll ad dy nee nyn naboonyn v’ad, as baghey er-gerrey daue. 17As ghow cloan Israel nyn yurnah, as haink ad gys ny ard-valjyn oc er y trass laa. Nish va ny ard-valjyn oc Gibeon, as Chephirah, as Beeroth, as Kirjath-jearim. 18As cha dug cloan Israel laue orroo, son dy row princeyn y pobble er vreearrey daue liorish y Chiarn Jee Israel. As ren ooilley’n pobble plaiynt noi ny princeyn. 19As dooyrt ooilley ny princeyn rish y slane sheshaght, Ta shin fo breearrey daue liorish y Chiarn Jee Israel: shen-y-fa nish, cha vod mayd laue ’chur orroo. 20Agh shoh nee mayd roo; lhig mayd dy jarroo nyn mioys lhieu, er-aggle dy jig kerraghey orrin, er coontey’n breearrey ta shin er n’yannoo daue. 21As dooyrt ny princeyn roo, Ver mayd nyn mioys daue; (agh lhig daue ve deyrit dy yiarey fuygh, ad dy hayrn ushtey son ooilley’n pobble;) myr va ny princeyn er n’yialdyn daue.

22As hug Joshua fys orroo, as loayr eh roo, gra, Cre’n-fa ta shiu er volley shin, gra, Ta shinyn jeh cheer feer foddey veue; tra ta shiu cummal er-gerrey dooin? 23Nish shen-y-fa ta shiu deyrit, as cha bee dooinney jeu seyr veih bondiaght, as bee shiu ry-hoi giarey fuygh, as tayrn ushtey, son thie my Yee. 24As dreggyr ad Joshua, as dooyrt ad, Son dy row eh er ny insh da dty harvaantyn son firrinys, dy row yn Chiarn dty Yee er harey e harvaant Moses dy choyrt diuish ooilley’n cheer shoh, as dy stroie dy bollagh ooilley cummaltee ny cheerey, shoh’n oyr va shin ayns aggle baaish reue, as shoh ta shin er n’yannoo. 25As cur-my-ner nish, ta shin ayns dty laue: myr te mie as cairagh ayns dty hilley jean uss rooin. 26As shen myr ren eh roo, as ren eh ad y livrey ass laue cloan Israel, nagh ren ad nyn goyrt gy-baase. 27As doardee Joshua ad veih’n laa shen dy hirveish ayns giarey fuygh, as tayrn ushtey, son cabbane-agglish as altar y Chiarn, eer gys y laa jiu, ayns yn ynnyd baillish y reih.