1Jude sharvaant Yeesey Creest, as braar Yamys, hucsyn ta er nyn gasherickey liorish Jee yn Ayr, as er nyn goadey ayns Yeesey Creest, as er nyn eam: 2Myghin dy row hiu, as shee, as graih er nyn mishaghey. 3Chaarjyn, tra va mish ayns lane imnea dy scrieu hiuish mychione y taualtys cadjin, ve ymmyrchagh dooys dy scrieu hiu, as dy choyrlaghey shiu dy jeean dy hassoo seose son y chredjue va un cheayrt er ny livrey da ny nooghyn. 4Son ta shiartanse dy gheiney dy steetagh er hayrtyn stiagh, nyn gour va’n vriwnys shoh roïe er ny oardaghey; deiney mee-chrauee, chyndaa grayse yn Jee ain gys rouanys, as gobbal yn ynrycan Chiarn Jee, as nyn Jiarn Yeesey Creest. 5Baillym er-y-fa shen shiu y choyrt ayns cooinaghtyn, ga dy row fys eu er shoh keayrt dy row, kys dy ren y Chiarn erreish da ve er hauail y pobble ass cheer Egypt, ny lurg shen adsyn y stroie nagh ren credjal. 6As ny ainleyn nagh dreill yn chied stayd oc hene, agh daag nyn gummallyn cooie, t’eh er vreayll ayns geulaghyn dy bragh farraghtyn fo dorraghys cour briwnys yn laa mooar. 7Dy jarroo myr ta Sodom as Gomorrha as ny ard-valjyn mygeayrt-y-moo, ren er yn aght cheddin ad-hene y choyrt seose gys maarderys, as geiyrt er feill neu-ghooghyssagh, er nyn soiaghey magh son sampleyr, surranse kerraghey dewil yn aile dy bragh farraghtyn. 8Er yn aght cheddin neesht ta ny branlaadee shoh sollaghey yn eill, soiaghey beg jeh reiltys, as goltooaney ny pooaraghyn syrjey. 9Agh Michael yn ard-ainle, tra ayns streeu rish y drogh-spyrryd, v’eh pleadeil mychione corp Voses, cha ghow eh er dy choyrt stiagh plaiynt oltooanagh n’oï, agh dooyrt eh, Dy der y Chiarn oo dty host. 10Agh t’ad shoh loayrt dy olkyssagh jeh ny reddyn shen nagh vel ad dy hoiggal: agh shen ny t’ad toiggal dy dooghyssagh, myr beïyn gyn resoon; ayndoo shen t’ad stroie ad-hene. 11Smerg daue; son t’ad er n’immeeaght ayns raad Cain, as er roie dy jeean lurg shaghrynys Balaam son faill, as er jerraghtyn ayns irree-magh Core. 12T’ad shoh spuitt ayns nyn guirraghyn dy ghraih, tra t’ad ec gien mêriu, lhieeney ad-hene fegooish aggle: bodjallyn t’ad gyn ushtey, eebrit lesh y gheay; biljyn ta’n blaa oc fioghey, fegooish mess, keayrt as keayrt er n’gholl naardey, astyrit ass ny fraueyn; 13Tonnyn freanagh yn aarkey, keshal magh yn nearey oc hene; rollageyn rouail, daue ta kiarit yn dooid dy ghorraghys son dy bragh. 14As ren Enoch myrgeddin, yn chiaghtoo jeh kynney Adam phadeyrys mychione oc shoh, gra, Cur-my-ner ta’n Chiarn cheet lesh jeih thousaneyn jeh e nooghyn casherick, 15Dy chooilleeney briwnys orroo ooilley, as dy gheyrey ooilley ny mee-chrauee ny-vud oc, son ooilley nyn obbraghyn mee-chrauee, t’ad dy mee-chrauee er n’yannoo, as son ooilley ny goan lunagh ta peccee mee-chrauee er loayrt n’oï. 16T’ad shoh sleih ta tallagh, plaiyntee gyn oyr, gimmeeaght lurg nyn yeearreeyn hene; as ta’n beeal oc loayrt focklyn mooarey dy ardail, brynneragh rish persoonyn deiney er graih cosney. 17Agh, chaarjyn, cooinee-jee er ny goan va roïe loayrit liorish ostyllyn nyn Jiarn Yeesey Creest: 18Kys dinsh ad diu, dy beagh craidoilee ayns ny laghyn s’jerree, yinnagh gimmeeaght lurg ny yeearreeyn mee-chrauee oc hene. 19Shoh ad ta scarrey ad-hene voïn, sleih foalley, fegooish Spyrryd Yee. 20Agh shiuish, chaarjyn, troggal shiu hene er [undin] nyn gredjue smoo casherick, goaill padjer ayns y Spyrryd Noo, 21Freill-jee shiu hene ayns graih Yee, jerkal rish myghin nyn Jiarn Yeesey Creest gys bea dy bragh farraghtyn. 22As jeh paart gow-jee chymmey, jannoo reih jeu. 23As feallagh elley saue-jee lesh aggle, myr dy beagh shiu dy hayrn ad ass yn aile; coyrt feoh eer da’n gharmad sollit liorish yn eill. 24Nish huggeysyn ta abyl dy reayll shiu veih tuittym, as dy hebbal shiu gyn loght kionfenish e ghloyr lesh boggey erskyn towse, 25Gys yn ynrycan Jee creeney nyn Saualtagh, dy row gloyr as ard-ooashley, reill as pooar, nish as dy bragh. Amen.