CAB. I

1Nish lurg baase Yoshua, haink eh gy-kione, dy ren cloan Israel shirrey coyrle jeh’n Chiarn, gra, Quoi hed seose hoshiaght er nyn son noi ny Canaaniteyn, dy chaggey? 2As dooyrt y Chiarn, Hed Judah seose: cur-my-ner, ta mish dy livrey yn cheer gys e laue. 3As dooyrt Judah rish Simeon e vraar, Tar seose mârym gys my chronney, dy vod mayd caggey noi ny Canaaniteyn, as neem’s myrgeddin goll mayrt’s gys dty chronney’s. Myr shen hie Simeon mârish. 4As hie Judah seose; as ren y Chiarn livrey ny Canaaniteyn as ny Perizziteyn gys nyn laueyn; as varr ad jeu ayns Bezek jeih thousane dooinney. 5As haink ad seose rish Adoni-bezek ec Bezek; as ren ad caggey n’oï, as varr ad ny Canaaniteyn as ny Perizziteyn. 6Agh chossyn Adoni-bezek roish: as deiyr ad er, as haare ad eh, as yiare ad jeh ordaagyn e laueyn, as ordaagyn e choshey. 7As dooyrt Adoni-bezek, Three-feed as jeih reeaghyn, va nyn ordaagyn laue as coshey giarit jeu, ren teiy nyn mee fo my voayrd’s: myr ta mish er n’yannoo, myr shen ta Jee er my chooilleeney. As hug ad lhieu eh gys Jerusalem, as hooar eh baase ayns shen. 8(Nish va cloan Yudah er chaggey noi Jerusalem, as er ghoaill eh, as er woalley eh lesh foyr y chliwe, as er hoiaghey yn ard-valley er aile.)

9As ny lurg shen hie cloan Yudah sheese dy chaggey noi ny Canaaniteyn va cummal ayns y clieau, as ayns y jiass, as ayns y choan. 10As hie Judah noi ny Canaaniteyn va cummal ayns Hebron, (nish yn ennym v’er Hebron roïe va Kirjath-arba,) as varr ad Sheshai, as Ahiman, as Talmai. 11As veih shen hie eh noi cummaltee Debir: (as yn ennym v’er Debir roïe va Kirjath-sepher:) 12As dooyrt Caleb, Eshyn woaillys Kirjath-sepher, as ghoys eh, dasyn ver-yms Achsah my inneen son ben. 13As ren Othniel, mac Kenaz, braar saa Caleb goaill eh: as hug eh da Achsah e inneen son ben. 14As haink eh gy-kione, tra v’ee er jeet huggey, dy dug ee coyrle da dy hirrey magher er e ayr, as harlheim ee jeh’n assyl; as dooyrt Caleb r’ee, Cre ta dty yeearree? 15As dooyrt ee rish, Cur dty vannaght dou: son t’ou er choyrt dou thalloo chirrym jiass, cur dou myrgeddin farraneyn ushtey. As hug Caleb jee ny farraneyn heose as heese.

16As hie cloan yn Kenite, ayr-’sy-leigh Voses, seose ass ard-valley ny biljyn-palm, marish cloan Yudah, gys faasagh Yudah, ta er cheu-jiass Arad: as hie ad as chum ad mastey’n pobble. 17As hie Judah marish Simeon e vraar, as stroie ad ny Canaaniteyn va cummal ayns Zephath, as ren ad dy bollagh eh y choyrt mow: (as va ennym yn ard-valley Hormah.) 18Ghow Judah myrgeddin Gaza as e ardjyn, as Askelon as e ardjyn, as Ekron as e ardjyn. 19As va’n Chiarn marish Judah, as deiyr eh magh mooinjer-ny-ard, agh cha voddagh eh geiyrt magh cummaltee’n choan, er-yn-oyr dy row oc fainee yiarn. 20As hug ad Hebron da Caleb, myr va Moses er yialdyn: as deiyr eh veih shen three mec Anak. 21Agh cha row cloan Venjamin dy slane er n’eiyrt magh ny Jebusiteyn va cummal ayns Jerusalem; agh ta ny Jebusiteyn cummal mastey cloan Venjamin ayns Jerusalem gys y laa jiu.

22As hie cloan Yoseph myrgeddin seose noi Beth-el: as va’n Chiarn mâroo. 23As hug cloan Yoseph deiney dy scrial Beth-el: (nish va ennym Beth-el roïe Luz.) 24As honnick ny scrialtee dooinney cheet ass yn ard-valley; as dooyrt ad rish, Jeeagh dooin, ta shin guee ort, yn raad sassey dy chosney stiagh ’syn ard-valley, as bee mayd foayroil dhyt’s. 25As tra v’eh er yeeaghyn daue y raad, woaill ad yn ard-valley lesh foyr y chliwe; agh lhig ad y raad da’n dooinney as da ooilley e lught-thie. 26As hie yn dooinney gys cheer ny Hittiteyn, as hrog eh ard-valley, as denmys eh eh Luz: as shoh’n ennym t’er gys y laa jiu.

27Chamoo ren Manasseh geiyrt magh cummaltee Beth-shean as e baljyn, ny cummaltee Taanach as e baljyn, ny cummaltee Dor as e baljyn, ny cummaltee Ibleam as e baljyn, ny cummaltee Megiddo as e baljyn: agh va ny Canaaniteyn foast cummal ’sy cheer shen. 28As haink eh gy-kione, tra va Israel er ghoaill troshid, dy dug ad ny Canaaniteyn fo keesh, as cha deiyr ad magh ad dy bollagh.

29Chamoo ren Ephraim geiyrt magh ooilley ny Canaaniteyn va cummal ayns Gezer; agh va ny Canaaniteyn cummal ayns Gezer ny mast’ oc.

30Chamoo ren Zebulun dy slane geiyrt magh cummaltee Kitron, ny cummaltee Nahalol; agh va ny Canaaniteyn ny mast’ oc, as fo keesh.

31Chamoo ren Asher geiyrt magh ooilley cummaltee Accho, ny cummaltee Zidon, ny Ahlab, ny Achzib, ny Helbah, ny Aphik, ny Rehob: 32Agh ren ny Asheriteyn cummal mastey ny Canaaniteyn, as cummaltee’n cheer; son cha deiyr ad magh ad dy bollagh.

33Chamoo ren Naphtali dy slane geiyrt magh cummaltee Beth-shemesh, ny cummaltee Beth-anath; agh chum eh mastey ny Canaaniteyn, cummaltee yn cheer: agh va cummaltee Beth-shemesh as Beth-anath fo keesh. 34As deiyr ny Amoriteyn cloan Dan gys y clieau; son cha lhiggagh ad daue cummal ’sy choan: 35Agh va ny Amoriteyn foast cummal ayns cronk Heres ayns Aijalon er niart, as ayns Shaalbim: ny-yeih va laue yn eaghtyr ec cloan Yoseph, myr shen dy daink ad dy ve fo keesh. 36As va cagliagh ny Amoriteyn veih ard Akrabbim, veih’n chreg, as seose.