CAB. X

1As lurg Abimelech, hrog seose dy livrey Israel Tola mac Puah, mac Dodo, dooinney dy Issachar, as v’eh cummal ayns Shamir, ayns slieau Ephraim. 2As ren eh briwnys Israel three bleeaney as feed; as hooar eh baase, as v’eh oanluckit ayns Shamir.

3As ny lurg-syn hrog seose Jair, ny Ghileadite, as ren eshyn briwnys Israel daa vleïn as feed. 4As va echey jeih mec as feed, va markiagh er jeih lhiynyn assyl as feed, as va oc jeih ard-valjyn as feed, va enmyssit Havoth-jair gys y laa jiu, t’ayns cheer Ghilead. 5As hooar Jair baase, as v’eh oanluckit ayns Camon. 6As ren cloan Israel reesht olk ayns shilley’n Chiarn, as hirveish ad Baalim as Ashtaroth, as jeeghyn Syria, as jeeghyn Zidon, as jeeghyn Voab, as jeeghyn cloan Ammon, as jeeghyn ny Philistinee, as hreig ad y Chiarn, as cha hirveish ad eh.

7As ren jymmoose yn Chiarn brishey magh noi Israel, as chreck eh ad gys laue ny Philistinee, as gys laue cloan Ammon. 8As er y vleïn shen, son hoght bleeaney jeig, ren ad seaghney as tranlaase ’yannoo er cloan Israel, ooilley cloan Israel va er cheu elley dy Yordan, ayns cheer ny Amoriteyn, ta ayns Gilead, 9As hie cloan Ammon harrish Jordan dy chaggey myrgeddin noi Judah, as noi Benjamin, as noi thie Ephraim; myr shen dy row Israel dy mooar seaghnit.

10As ren cloan Israel geamagh gys y Chiarn, gra, Ta shin er n’yannoo peccah dt’oï, er-yn-oyr dy vel shin chammah er dreigeil y Jee ain, as myrgeddin er hirveish Baalim. 11As dooyrt y Chiarn rish cloan Israel, Nagh ren mish shiu y livrey veih ny Egyptianee, as veih ny Amoriteyn, veih cloan Ammon, as veih ny Philistinee? 12Ren ny Zidonianee myrgeddin, as ny Amalekiteyn, as ny Maoniteyn tranlaase erriu; as deïe shiu hym’s, as ren mee nyn livrey ass yn laue oc. 13Ny-yeih ta shiu er m’y hreigeil, as er hirveish jeeghyn elley: shen-y-fa cha livrey-ym shiu arragh. 14Immee-jee, as eïe-jee gys ny jeeghyn ta shiu er reih; lhig dauesyn shiu y livrey ayns traa nyn seaghyn.

15As dooyrt cloan Israel rish y Chiarn, Ta shin er n’yannoo peccah: jean uss rooin myr hee-ys oo mie; agh livrey shin, ta shin guee ort, yn cheayrt shoh. 16As hug ad ersooyl ny jeeghyn joarree veih nyn mast’, as hirveish ad yn Chiarn; as va e chree er ny veiyghaghey son seaghyn Israel. 17Eisht va cloan Ammon er nyn jaglym cooidjagh, as ren ad campal ayns Gilead: as va cloan Israel er nyn jaglym cooidjagh, as champ ad ayns Mizpeh. 18As dooyrt pobble as princeyn Ghilead yn derrey yeh rish y jeh elley, Quoi eh ny-vud ain nee goaill er hoshiaght dy chaggey noi cloan Ammon? eshyn vees yn ard-chaptan harrish ooilley cummaltee Ghilead.