CAB. XIII

1As ren cloan Israel reesht shen ny va olk ayns shilley’n Chiarn; as ren y Chiarn ad y livrey gys laue ny Philistinee da-eed bleïn.

2As va dooinney dy row ayns Zorah, jeh sluight ny Daniteyn, yn ennym echey va Manoah; as va’n ven echey gennish, gyn cloan. 3As haink ainle y Chiarn gys y ven, as dooyrt eh r’ee, Cur-my-ner nish, t’ou uss gennish, as gyn cloan: agh nee oo giennaghtyn, as gymmyrkey mac. 4Nish er-y-fa shen, jeeagh, ta mee guee ort, nagh jean oo giu feeyn ny jough lajer, as nagh jean oo gee nhee erbee neu-ghlen: 5Son cur-my-ner, nee oo giennaghtyn, as mac y ymmyrkey; as cha jig razor er e chione: son bee’n lhiannoo Nazarite gys Jee veih’n vreïn: as hed eh er e hoshiaght dy livrey Israel ass laue ny Philistinee.

6Eisht haink y ven, as dinsh ee da e sheshey, gra, Haink dooinney dy Yee hym’s, as va’n eddin echey goll-rish eddin ainle veih niau, feer atchimagh; agh cha dênee mee jeh cre voish v’eh, chamoo dinsh eh dou e ennym. 7Agh dooyrt eh rhym, Cur-my-ner, nee oo giennaghtyn, as gymmyrkey mac; as nish ny iu feeyn ny jough lajer, chamoo ee-ys oo nhee erbee neu-ghlen: son bee’n lhiannoo ny Nazarite gys Jee veih e ymmyrkey gys laa e vaaish.

8Eisht ren Manoah guee gys y Chiarn, as dooyrt eh, O my Hiarn, lhig da’n dooinney dy Yee ren uss y choyrt cheet reesht hooin, as gynsaghey dooin kys hroggys mayd y lhiannoo vees er ny ruggey. 9As hug Jee clashtyn da coraa Manoah; as haink ainle y Chiarn reesht gys y ven myr v’ee soie ’sy vagher: agh cha row Manoah e sheshey mâree. 10As roie yn ven dy siyragh dy insh shoh da e sheshey, as dooyrt ee rish, Cur-my-ner, ta’n dooinney er jeet hym’s reesht, haink my raad er y gherrit shoh. 11As hrog Manoah er, as deiyr eh er e ven, as haink eh gys y dooinney, as dooyrt eh rish, Nee uss y dooinney ren loayrt rish y ven? As dooyrt eh, Mish eh. 12As dooyrt Manoah, Nish lhig da dty ghoan’s ve jeant mie: cre’n aght nee mayd yn lhiannoo y oardrail? as cre ta kiarit da dy yannoo? 13As dooyrt ainle y Chiarn rish Manoah, Jeh ooilley ny ta mee er ghra rish y ven, lhig ee goaill tastey. 14Ny lhig j’ee gee jeh mess y villey-feeyney, chamoo lhig j’ee giu feeyn ny jough lajer, ny gee red neu-ghlen erbee: ooilley ny ta mee er harey lhig j’ee jannoo.

15As dooyrt Manoah rish ainle y Chiarn, Ta mee guee ort, fuirree mârin, derrey aarlys mayd mannan er dty hon. 16As dooyrt ainle y Chiarn rish Manoah, Ga dy vuirrin mêriu, cha jean-ym gee jeh dty arran; agh my nee oo oural-losht y hebbal, shegin dhyt chebbal eh gys y Chiarn: son cha row fys ec Manoah dy nee ainle y Chiarn v’eh. 17As dooyrt Manoah rish ainle y Chiarn, Cre ta dty ennym, dy vod mayd, tra vees dty ghoan jeant mie, ooashley y choyrt dhyt. 18As dooyrt ainle y Chiarn rish, Cre’n-fa t’ou fênaght myr shoh lurg m’ennym’s, ta folliaght? 19Myr shen ghow Manoah mannan, as oural-arran, as heb eh shen er y chreg gys y Chiarn: as ren yn ainle red yindyssagh; as va Manoah as e ven jeeaghyn er. 20Son shen myr ve, tra hrog y lossey seose ’syn aer veih’n altar, dy jagh ainle y Chiarn seose ayns y lossey: as tra honnick Manoah as e ven shoh, huitt ad er nyn eddin gys y thalloo. 21(Agh cha daink ainle y Chiarn arragh fenish Manoah as e ven.) Eisht va fys ec Manoah dy nee ainle y Chiarn v’ayn. 22As dooyrt Manoah rish y ven, Yiow mayd dy shickyr baase, son dy vel shin er vakin Jee. 23Agh dooyrt e ven rish, My ve aigney’n Chiarn dy ghoaill nyn mioys, cha row eh er n’yannoo soiagh jeh oural-losht as oural-arran veih nyn laueyn, chamoo veagh eh er hoilshaghey dooin ooilley ny reddyn shoh, ny ec y traa shoh er n’insh dooin cre ta ry-heet.

24As ren y ven gymmyrkey mac, as denmys ad eh Samson: as daase y lhiannoo, as ren y Chiarn eh y vannaghey. 25As ren Spyrryd y Chiarn toshiaght dy ghreinnaghey eh nish as reesht myr v’eh ayns camp Dan, eddyr Zorah as Eshtaol.