CAB. XV

1Agh haink eh gy-kione tammylt ny lurg shen, ayns imbagh y fouyr-churnagh, dy jagh Samson dy yeeaghyn e ven, lesh mannan son cuirraghyn; as dooyrt eh, Hem’s stiagh gys my ven ’sy chamyr: agh cha lhiggagh yn ayr eck da goll stiagh. 2As dooyrt yn ayr eck, Smooinee mee dy jarroo dy r’ou dy bollagh er hreigeil ee; shen-y-fa hug mee da dty charrey ee: nagh vel e shuyr saa ny s’aalin na ish? gow ish, ta mee guee ort, ’syn ynnyd eck.

3Er shoh smooinee Samson rish hene mychione oc, Cha vod ny Philistinee nish coyrt foill my lieh, ga dy jinnin’s assee dauesyn. 4As hie Samson as haare eh three cheead shynnagh, as ghow eh torchyn, as hyndaa eh ad famman ry amman, as hug eh ny torchyn ’sy vean eddyr y daa amman. 5As tra v’eh er choyrt aile gys ny torchyn, lhig eh’n raad daue ayns arroo ny Philistinee, as losht eh chammah ny sthookyn, as yn arroo creen marish ny garaghyn-feeyney as olive.

6Eisht dooyrt ny Philistinee, Quoi t’er n’yannoo shoh? As dreggyr ad, Samson, mac-’sy-leigh yn Timnite, er-yn-oyr dy ghow eh yn ven echey, as dy dug eh ee da e charrey. As haink ny Philistinee seose, as losht ad ish as e ayr lesh aile.

7As dooyrt Samson roo, Ga dy vel shiu er n’yannoo shoh, ny-yeih bee cooilleeney aym’s erriu, as eisht goym fea. 8As woaill eh ad rass as cass, lesh cragh dewil: as hie eh sheese as chum eh er mullagh creg Etam.

9Eisht hie ny Philistinee seose, as ren ad campal ayns Judah, as skeayl ad ad-hene ayns Lehi. 10As dooyrt deiney Yudah, Cre’n-oyr ta shiu er jeet seose nyn ’oï? As dreggyr ad, Dy chiangley Samson ta shin er jeet seose, dy yannoo rishyn myr t’eshyn er n’yannoo rooinyn. 11Eisht hie three thousane dooinney dy Yudah seose gys mullagh creg Etam, as dooyrt ad rish Samson, Nagh vel fys ayd’s dy vel ny Philistinee reill harrin? cre shoh t’ou er n’yannoo rooin? As dooyrt eh roo, Myr ren adsyn rhym’s, myr shen ta mish er n’yannoo roosyn. 12As dooyrt ad rish, Ta shin er jeet sheese dy chiangley oo, dy vod shin oo y livrey gys laue ny Philistinee. As dooyrt Samson roo, Loo-jee dou nagh jean shiu hene tuittym orrym. 13As loayr ad rish, gra, Cha jean mayd shen: agh nee mayd oo y chiangley dy shickyr, as livrey mayd oo gys y laue oc; agh dy firrinagh cha marr mayd oo: as chiangle ad eh lesh daa choyrd noa, as hug ad lhieu seose eh veih’n chreg.

14As tra haink eh gys Lehi, dyllee ny Philistinee n’oï: as haink Spyrryd y Chiarn dy niartal er, as haink ny coyrdyn v’er e roihaghyn dy ve myr lieen losht lesh aile, as huitt ny geulaghyn veih e laueyn. 15As hooar eh craue-keeill noa dy assyl, as ghow eh ny laue eh, as varr eh thousane dooinney lesh. 16As dooyrt Samson, Lesh craue-keeill assyl, carnaneyn er carnaneyn, lesh craue-keeill assyl ta mee er varroo thousane dooinney. 17As haink eh gy-kione, erreish da v’er ghra shoh, dy hilg eh yn chraue ass e laue, as denmys eh yn ynnyd shen Ramath-lehi.

18As v’eh feer phaagh, as deïe eh er y Chiarn, as dooyrt eh, T’ou er choyrt yn varriaght vooar shoh ayns laue dty harvaant; as nish voym baase lesh paays, as tuittym ayns laueyn ny chymmyltee shoh? 19Agh ren Jee fosley ’yannoo ayns yn 15:19 Ramath-lehi.ynnyd cheddin, as haink ushtey ass; as tra v’eh er n’iu, ghow eh cree reesht, as v’eh er ny niartaghey: shen-y-fa denmys eh yn ynnyd En-hakkore, ta ayns Lehi gys y laa jiu. 20As ren eh briwnys Israel rish lhing ny Philistinee, feed bleïn.