CAB. XVI

1Eisht hie Samson gys Gaza, as honnick eh ayns shen ben oainjyragh, as ghow eh aaght mâree. 2As ve inshit da ny Gaziteyn, gra, Ta Samson er jeet ayns shoh. As chombaase ad eh stiagh, as lhie ad farkiagh dy feagh er e hon fud-ny-hoie ec giat yn ard-valley, gra, Cha leah’s hoilshys y laa nee mayd eh y varroo. 3As lhie Samson derrey mean-oie, as eisht dirree eh, as ghow eh dorryssyn giat yn ard-valley, as y daa essyn, as hie eh ersooyl lhieu, boltyn as ooilley, as hug eh ad er e gheayltyn, as hug eh lesh ad gys mullagh cronk ta liorish Hebron. 4As haink eh gy-kione ny lurg shen, dy bynney lesh ben ayns coan Sorek, yn ennym eck va Delilah. 5As haink chiarnyn ny Philistinee seose, as dooyrt ad r’ee, Miolee eh, as fow magh c’raad ta’n troshid vooar echey lhie, as kys yiow mayd yn varriaght er, dy chiangley as dy veeinaghey eh: as ver mayd dhyt’s, dagh unnane ain, un cheead jeig peesh dy argid. 6As dooyrt Delilah rish Samson, Insh dou, ta mee guee ort, cre ayns ta dty hroshid vooar lhie, as cre lesh oddagh oo ve kianlt dy reayll oo fo? 7As dooyrt Samson r’ee, My nee ad m’y chiangley lesh shiaght slattyn dy heillagh ghlass, my vel ad creen, eisht beem’s faase, as myr dooinney erbee elley. 8Eisht hug chiarnyn ny Philistinee lhieu shiaght slattyn glassey nagh row er chreenaghey, as lhieu shoh ren ee kiangley eh. 9(Nish va deiney eck mâree, lhie follit ayns y chamyr:) as dooyrt ee rish, Dy row ny Philistinee ort, Samson. As vrish eh ny slattyn, myr snaie-barree ec yn aile: myr shen nagh row yn troshid echey er ny gheddyn magh. 10As dooyrt Delilah rish Samson, Cur-my-ner, t’ou er my volley, as er n’insh breagyn dou: nish insh dou, ta mee guee ort, cre lesh oddys oo ve kianlt. 11As dooyrt eh r’ee, My nee ad m’y chiangley dy shickyr lesh coyrdyn noa nagh row rieau ayns use, eisht beem’s moal myr dooinney erbee elley. 12Ghow Delilah er-y-fa shen coyrdyn noa, as lhieu shoh chiangle ee eh, as dooyrt ee rish, Ny Philistinee ort, Samson. (As va feallagh ny lhie follit ’sy chamyr.) As vrish eh ad jeh e roihaghyn myr snaie. 13Eisht dooyrt Delilah rish Samson, T’ou foast dy m’y volley, as ginsh breagyn dou: insh dou cre lesh oddys oo ve kianlt. As dooyrt eh r’ee, My nee oo rheynn folt my ching ayns shiaght skeogyn, as fee ad dy cheilley, as jannoo ad shickyr lesh kibbin ’sy gharmin [hed my niart voym]. 14As tra v’ee er n’yannoo shoh, dooyrt ee rish, Ny Philistinee ort, Samson. As ghooisht eh ass e chadley, as hie eh ersooyl lesh y chibbin, y gharmin, as ooilley.

15As dooyrt ee rish, Kys oddys oo gra, Ta graih aym ort, tra nagh vel dty chree lhiam? t’ou er my volley ny three keayrtyn shoh, as cha vel oo er n’insh dou cre ayns ta dty niart vooar lhie. 16As haink eh gy-kione, tra v’ee dagh laa chionney er lesh e goan, as nagh lhig ee fea da, myr shen dy row eh skee jee ’heihll, 17Dy doshil eh jee ooilley e chree, as dooyrt eh r’ee, Cha daink rieau razor er my chione’s; son ta mish er ve my Nazarite gys Jee veih breïn my vayrey: my veem’s shavit, eisht hed my niart voym, as hig-yms dy ve faase myr dooinney erbee elley. 18As tra dennee Delilah dy row eh er n’insh jee folliaght e chree, hug ee fys er chiarnyn ny Philistinee, gra, Tar-jee seose yn un cheayrt shoh; son t’eh er hoilshaghey dou ooilley e chree. Eisht haink chiarnyn ny Philistinee seose, as hug ad lhieu argid ayns nyn laue. 19As hug ee er cadley er e glioonyn, as deïe ee er fer, as hug ee er shaval shiaght skeogyn e ching; as ren ee toshiaght dy voirey eh, as hie e niart veih. 20As dooyrt ee, Ta ny Philistinee ort, Samson. As ghooisht eh ass e chadley, as dooyrt eh, Hem’s magh myr boallin, dy chraa mee-hene. As cha row fys echey dy row yn Chiarn er hreigeil eh.

21As ghow ny Philistinee eh, as chur ad e hooillyn ass, as hug ad lhieu eh sheese gys Gaza, as chiangle ad eh lesh geulaghyn prash, as hug ad er blieh ayns thie yn phryssoon. 22Ny-yeih va’n folt echey gaase reesht, lurg da ve shavit. 23Eisht va chiarnyn ny Philistinee er nyn jaglym cooidjagh dy hebbal oural-ooasle gys Dagon yn jee oc, as dy ghoaill boggey: son dooyrt ad, Ta’n Jee ain er livrey Samson nyn noid gys nyn laue. 24As tra honnick yn pobble eh, hug ad moylley da’n jee oc: son dooyrt ad, Ta’n jee ain er livrey nyn noid gys nyn laue, eshyn hug naardey yn cheer ain, as varr ymmodee j’in. 25As haink eh gy-kione, tra va ny creeaghyn oc gennal, dy dooyrt ad, Eïe-jee er Samson, dy yannoo aittys dooin. As deïe ad er Samson ass y phryssoon; as v’eh son gamman daue: as hoie ad eh eddyr ny pillaryn. 26As dooyrt Samson rish y yuilley va ny chione, Lhig dou loaghtey ny pillaryn ta cummal seose y thie, dy voddym goaill my aash. 27Nish va’n thie lane dy gheiney as mraane; as va ooilley chiarnyn ny Philistinee ayns shen: as va er mullagh y thie mysh three thousaneyn dy gheiney as mraane, va jeeaghyn er Samson, tra v’ad jannoo gamman jeh. 28As ren Samson padjer gys y Chiarn, as dooyrt eh, O Hiarn Yee, cooinee orrym, ta mee guee ort, as niartee mee, ta mee guee ort, agh yn un cheayrt shoh, O Yee, dy voddym, un cheayrt son ooilley, goaill cooilleeney er ny Philistinee, son my ghaa hooill. 29As ghow Samson greme er y daa phillar mean va gymmyrkey’n thie, er y derrey yeh lesh e laue yesh, as er y jeh elley lesh e laue chiare. 30As dooyrt Samson, Lhig dou baase y gheddyn marish ny Philistinee. As chroym eh eh-hene lesh ooilley e niart; as huitt y thie er ny chiarnyn, as er ooilley yn sleih v’ayn: myr shen dy varr eh ny shlee ec e vaase, na v’eh er varroo ooilley e vea roïe. 31Eisht haink e vraaraghyn, as ooilley thie e ayrey, sheese, as ghow ad eh, as hug ad lhieu seose eh, as doanluck ad eh eddyr Zorah as Eshtaol, ayns grunt-oanluckee Manoah e ayr. As v’eh ny vriw er Israel feed bleïn.