CAB. XIX

1As haink eh gy-kione, ayns ny laghyn shen, tra nagh row ree ayns Israel, dy row Levite cummal er lhiattee cronk Ephraim, ghow da hene co-lhiabbagh veih Beth-lehem-judah. 2As phrow’n co-lhiabbagh neu-firrinagh da, as hie ee ersooyl voish gys thie e ayrey, gys Beth-lehem-judah, as v’ee ayns shen kiare meeaghyn. 3As dirree e sheshey, as hie eh geiyrt urree dy loayrt dy dooie r’ee, as dy ghoaill ee reesht, as va’n charvaant echey mârish, as daa assyl: as hug ish lh’ee stiagh eh gys thie e ayrey; as tra honnick ayr yn ven aeg eh, ghow eh lane boggey jeh. 4As ren e ayr-’sy-leigh, ayr y ven aeg, mooar jeh; as duirree eh mârish three laa; myr shen ren ad gee as giu, as goaill aaght ayns shen. 5As haink eh gy-kione er y chiarroo laa, tra v’ad er n’irree ’sy voghrey, dy chiartee eh dy gholl roish: as dooyrt ayr y ven aeg rish e vac-’sy-leigh, Gow greme dy veaghey mârin, dy niartaghey dty chree, eisht foddee shiu goll er nyn raad. 6As hoie ad sheese cooidjagh, as ren ad gee as giu: son va ayr y ven aeg er ghra rish y dooinney, Fuirree raad t’ou, ta mee guee ort, fud-ny-hoie, as lhig da dty chree ve gennal. 7As tra dirree yn dooinney seose dy gholl roish, ren e ayr-’sy-leigh chionney er; shen-y-fa, ghow ad aaght ayns shen reesht. 8As dirree eh dy moghey er y wheiggoo laa dy gholl roish: as dooyrt ayr y ven aeg, Gerjee dty chree, ta mee guee ort. As duirree ad derrey’n astyr, as ghow ad beaghey cooidjagh. 9As tra hrog y dooinney er dy gholl roish, eh-hene, as e cho-lhiabbagh, as e er-mooinjerey, dy dooyrt e ayr-’sy-leigh, ayr y ven aeg, rish, Cur-my-ner, te nish lesh yn astyr; ta mee guee ort fuirree fud-ny-hoie: t’ou fakin dy vel eh lesh yn anmys; gow aaght ayns shoh, dy vod dty chree ve gennal, as moghrey mairagh gow-jee er nyn yurnah, dy vod oo goll thie. 10Agh cha n’uirragh y dooinney yn oie shen, agh hrog eh er, as hie eh roish, as haink eh er-gerrey da Jebus, (ta shen Jerusalem) as mârish daa assyl jeeltit; va e cho-lhiabbagh myrgeddin mârish. 11As tra v’ad liorish Jebus, va’n laa foddey baarit; as dooyrt yn charvaant rish e vainshtyr, Tar, ta mee guee ort, as lhig dooin chyndaa stiagh gys yn ard-valley shoh jeh ny Jebusiteyn, as goaill aaght ayn. 12As dooyrt e vainshtyr rish, Cha jed mayd stiagh gys yn ard-valley joarree shoh, nagh vel jeh cloan Israel; hed mayd harrish gys Gibeah. 13As dooyrt eh rish e harvaant, Tar as lhig dooin tayrn er-gerrey gys unnane jeh ny ynnydyn shoh, dy ghoaill aaght fud-ny-hoie, ayns Gibeah, ny ayns Ramah. 14As hie ad er nyn doshiaght er y raad; as lhie yn ghrian orroo tra v’ad liorish Gibeah, ta bentyn gys Benjamin. 15As hyndaa ad dy lhiattee gys Gibeah, dy ghoaill aaght ayn: as tra v’eh er jeet stiagh, hoie eh sheese ayns straid yn ard-valley son cha row dooinney erbee ghoghe ad stiagh ’sy hie, dy choyrt aaght daue.

16As cur-my-ner, haink shenn ghooinney veih e obbyr ass y vagher ’syn astyr, v’eh hene myrgeddin veih cronk Ephraim; as v’eh cummal ayns Gibeah; agh va deiney yn ard-valley Benjamiteyn. 17As tra v’eh er hroggal seose e hooillyn, honnick eh dooinney joarree ayns straid yn ard-valley, as dooyrt y chenn ghooinney, C’raad t’ou goll? as cre veih t’ou er jeet? 18As dooyrt eh rish, Ta shin goll er nyn doshiaght veih Beth-lehem-judah gys slyst cronk Ephraim; veih shen ta mee: as hie mee gys Beth-lehem-judah, agh ta mee goll nish gys thie’n Chiarn; as cha vel dooinney erbee ta chebbal aaght dooin. 19Ny-yeih ta coonlagh as foddyr ain son nyn assylyn; as ta ain arran as feeyn, chammah er my hon hene, as son dty inney-veyl, as son y dooinney aeg ta marish dty harvaant: cha vel shin feme nhee erbee. 20As dooyrt y chenn ghooinney, Shee dy row mayrt: faag dooys dy yannoo magh ooilley ny t’ou dt’eme; agh ny fuirree ’sy traid. 21Myr shen hug eh lesh eh stiagh ’sy hie, as hug eh foddyr da ny assylyn echey: as niee ad nyn gassyn, as ren ad gee as giu.

22Nish myr v’ad jannoo mooar jeu hene, cur-my-ner, ren shiartanse jeh deiney’n valley, mec Velial, chionney mysh y thie, as woaill ad ’sy dorrys, as loayr ad rish y chenn ghooinney, mainshtyr y thie, gra, Cur magh hooin yn dooinney shen haink stiagh gys dty hie, dy vod enney ’ve ain er. 23As hie dooinney’n thie magh, as dooyrt eh roo, Ta mee guee erriu, my vraaraghyn, ny jean-jee lheid y peccah eajee; fakin dy vel y dooinney shoh er jeet stiagh fo my chlea, ny jean-jee yn ommijys shoh. 24Cur-my-ner, ta my inneen ayns shoh, ny moidyn, as co-lhiabbagh y dooinney shoh; ad shoh ver-ym lhiam magh hiu nish, as gow-jee ad, as jean-jee roo myr sailliu: agh rish yn dooinney shoh, ny jean-jee lheid y peccah feohdagh. 25Agh cha jinnagh ny deiney geill da: myr shen ghow yn dooinney e cho-lhiabbagh, as hug eh lesh ee magh huc; as va enney oc urree, as hug ad drogh ghellal jee fud-ny-hoie derrey’n voghrey: as ec brishey’n laa, lhig ad yn raad jee. 26Eisht haink yn ven ec soilshey’n laa, as huitt ee sheese marroo ec dorrys thie’n dooinney raad va’n sheshey eck, derrey va’n ghrian er n’irree. 27As dirree yn dooinney eck ’sy voghrey, as doshil eh dorryssyn y thie, kiarail dy gholl roish: as cur-my-ner, va’n ven e cho-lhiabbagh er duittym sheese ec dorrys y thie, as ny laueyn eck er sole y dorrys. 28As dooyrt eh r’ee, Irree, as lhig dooin ve goll roïn: agh cha dooar eh ansoor: eisht hrog eh ee er assyl, as hrog y dooinney er, as jimmee eh roish gys e hie hene.

29As tra v’eh er roshtyn, ghow eh skynn, as rheynn eh corp e cho-lhiabbagh, lesh ny craueyn eck, ayns daa ayrn jeig, as hug eh ad gys ooilley tribeyn Israel. 30As shen myr ve, dy dooyrt ooilley ny honnick eh, Cha row lheid yn olk jeant ny er ny akin, er-dyn laa haink cloan Israel seose magh ass Egypt gys y laa jiu: smooinee-jee er, gow-jee coyrle, as insh-jee nyn aigney.