CAB. XXI

1Nish va deiney Israel er vreearrey ayns Mizpeh, gra, Cha jean fer j’inyn cur yn inneen echey da Benjamin son ben. 2As haink y pobble gys thie Yee, as duirree ad ayns shen gys yn astyr fenish Yee, as hrog ad seose nyn goraa, as cheayn ad dy sharroo; 3As dooyrt ad, O Hiarn Yee Israel, cre’n-oyr ta shoh er duittym er Israel, dy beagh un tribe nish caillit ayns Israel? 4As haink eh gy-kione laa-ny-vairagh, dy dirree yn pobble dy moghey, as hrog ad altar ayns shen, as heb ad ourallyn-losht, as ourallyn-shee. 5As dooyrt cloan Israel, Quoi t’ayn mastey ooilley tribeyn Israel nagh daink seose marish y cheshaght gys y Chiarn? son v’ad er n’yannoo breearrey chion n’oï-syn nagh daink seose gys y Chiarn gys Mizpeh, gra, Bee eh dy shickyr er ny choyrt gy-baase. 6As ghow cloan Israel chymmey jeh Benjamin nyn mraar, as dooyrt ad, Ta un tribe giarit jeh veih Israel yn laa jiu: 7Cre nee mayd son mraane dauesyn ta er-mayrn, fakin dy vel shin er vreearrey liorish y Chiarn, nagh der mayd ny inneenyn ain daue son mraane?

8As dooyrt ad, Quoi t’ayn jeh tribeyn Israel, nagh daink seose gys Mizpeh gys y Chiarn? As cur-my-ner, cha daink dooinney veih Jabesh-gilead gys y champ ec yn eam. 9Son va’n pobble er nyn earroo, as cur-my-ner, cha row unnane jeh cummaltee Yabesh-gilead ayns shen. 10As hug y cheshaght nyn ’oï daa housane jeig jeh ny deiney s’dunnal, goardrail daue, gra, Immee-jee, as stroie-jee cummaltee Yabesh-gilead lesh foyr y chliwe, marish ny mraane as y chloan. 11As shoh t’er nyn gurrym, Nee shiu dy bollagh stroie dy chooilley vac dooinney, as dy chooilley ven nagh vel ny moidyn. 12As hooar ad mastey cummaltee Yabesh-gilead kiare cheead moidyn aegey, nagh bione daue dooinney; as hug ad lhieu ad gys y champ gys Shiloh, t’ayns cheer Chanaan. 13As hug yn slane sheshaght chaghteryn dy loayrt rish cloan Venjamin, va ayns creg Rimmon, as dy hebbal daue shee. 14As haink Benjamin reesht ec y traa shen; as hug ad daue ny mraane v’ad er hauail bio jeh mraane Yabesh-gilead; as ny-yeih myr shen hene huitt ad giare. 15As va’n pobble seaghnit son Benjamin, er-yn-oyr dy row yn Chiarn er n’yannoo brishey ayns tribeyn Israel.

16Eisht dooyrt shanstyr y phobble, Cre nee mayd er ny son ocsyn nagh vel mraane er roshtyn orroo, fakin nagh vel ben faagit ayns Benjamin? 17As dooyrt ad, Shegin da’n eiraght ve ny chour ocsyn ta er-mayrn jeh Benjamin, nagh bee tribe er ny stroie ayns Israel. 18Agh cha jig lhien dy choyrt daue mraane jeh ny inneenyn ainyn: son va cloan Israel er chiangley ad-hene fo mollaght, gra, Cursit vees eshyn ver ben da Benjamin. 19Eisht dooyrt ad, Cur-my-ner, ta feailley-bleeaney dy ve freilt gys y Chiarn ayns Shiloh, ayns ynnyd my-hwoaie jeh Beth-el, er cheu-har jeh’n raad mooar ta goll seose veih Beth-el gys Shechem, as my-yiass jeh Lebonah. 20Shen-y-fa doardee ad da cloan Venjamin, gra, Immee-jee, as lhie-jee fo-chlea ayns ny garaghyn-feeyney; 21As gow-jee tastey, tra hee shiu inneenyn Shiloh cheet magh ayns sheshaght dy ghaunsin, eisht roie-jee magh ass ny garaghyn-feeyney, as taare-jee dagh dooinney e ven jeh inneenyn Shiloh, as cosne-jee gys thalloo Venjamin. 22As my hig nyn ayraghyn ny nyn mraaraghyn hooinyn dy phlaiynt, jir mayd roo, Bee-jee foayroil daue er y ghraih ainyn, er-yn-oyr nagh daag shin bio da dagh dooinney e ven ’sy chaggey: son cha nee shiuish ta nish er choyrt daue mraane, dy yannoo shiu-hene oolee. 23As shen myr ren cloan Venjamin, as cordail rish earroo ny deiney, ghow ad ben y pheesh, ren ad y haartyn jeusyn va daunsin: as hie ad rhymboo reesht gys nyn eiraght, as hrog ad ass-y-noa ny ard-valjyn, as ren ad cummal ayndoo. 24As hie cloan Israel myrgeddin roue ec y traa shen, dy chooilley ghooinney gys e hribe hene, as gys e lught-thie, as jimmee ad rhymboo veih shen dy chooilley ghooinney gys e eiraght hene. 25Ayns ny laghyn shen cha row ree ayns Israel: agh dy chooilley ghooinney jannoo lurg e aigney hene.