CAB. III

1Nish ad shoh ny ashoonyn daag y Chiarn dy phrowal Israel lioroo, (eer whilleen jeu as nagh row ayns ooilley caggaghyn Chanaan; 2Dy voddagh sluight cloan Israel ve ynsit dy chaggey, yn chooid sloo nyn lheid as nagh row cliaghtit er roïe;) 3Ta shen, queig chiarnyn jeh ny Philistinee, as ooilley ny Canaaniteyn, as ny Sidonianee, as ny Hiviteyn va cummal ayns slieau Lebanon, veih slieau Baal-hermon derrey hig oo gys Hamath. 4As v’ad shoh dy phrowal Israel, jinnagh ad geaishtagh rish annaghyn y Chiarn, doardee eh da ny ayraghyn oc liorish laue Voses.

5As ren cloan Israel cummal mastey ny Canaaniteyn, Hittiteyn, as ny Amoriteyn, as ny Perizziteyn, as ny Hiviteyn, as ny Jebusiteyn: 6As ghow ad ny inneenyn oc dy ve son mraane daue, as hug ad ny inneenyn oc hene da ny mec ocsyn, as hirveish ad ny jeeghyn oc. 7As ren cloan Israel olk ayns shilley’n Chiarn, as yarrood ad yn Chiarn nyn Yee, as hirveish ad Baalim as Ashtaroth.

8Shen-y-fa va corree yn Chiarn er ny ghreinnaghey noi Israel, as chreck eh ad gys laue Chushan-rishathaim ree Mesopotamia: as ren cloan Israel shirveish Chushan-rishathaim hoght bleeaney. 9As tra ren cloan Israel gaccan gys y Chiarn, hrog y Chiarn seose fendeilagh da cloan Israel, ren ad y livrey, eer Othniel mac Kenaz, braar saa Caleb. 10As haink Spyrryd y Chiarn er, as ren eh briwnys Israel, as hie eh magh dy chaggey; as ren y Chiarn livrey Chushan-rishathaim ree Mesopotamia gys e laue; as va e laue er ny niartaghey noi Chushan-rishathaim. 11As va shee ec y cheer da-eed bleïn: as hooar Othniel mac Kenaz baase.

12As ren cloan Israel olk reesht ayns shilley’n Chiarn: as ren y Chiarn Eglon ree Voab y niartaghey noi Israel, er-yn-oyr dy row ad er n’yannoo olk ayns shilley’n Chiarn. 13As ren eh chaglym huggey cloan Ammon as Amalek, as hie eh as woaill eh Israel, as ghow eh ard-valley ny biljyn-palm. 14Myr shen ren cloan Israel shirveish Eglon ree Voab hoght bleeaney jeig. 15Agh tra ren cloan Israel gaccan gys y Chiarn, hrog y Chiarn seose daue fendeilagh, Ehud mac Gera, Benjamite, dooinney kiuttagh: as leshyn hug cloan Israel gioot gys Eglon ree Voab. 16Agh hug Ehud lesh skynn-attey (dy ghaa foyr), cubit er lhiurid; as chiangle eh eh fo e eaddagh er e heu yesh. 17As hug eh lesh yn gioot gys Eglon ree Voab: as va Eglon ny ghooinney feer roauyr. 18As erreish da v’er jebbal y gioot, hug eh ersooyl yn vooinjer haink lesh y gioot. 19Agh ren eshyn eh hene chyndaa reesht veih ny quarreeyn liorish Gilgal, as dooyrt eh, Ta chaghteraght follit aym’s hood’s, O ree: quoi dooyrt, Bee dty host. As hie ooilley ny va ayns shen magh. 20As haink Ehud huggey; as v’eh ny hoie ayns shamyr-souree, va echey da hene, as dooyrt Ehud, Ta chaghteraght aym hood’s veih Jee: as hass eh seose. 21As hug Ehud magh e laue chiare, as ghow eh yn skynn-attey veih e lheayst yesh, as roie eh stiagh eh ’sy volg echey. 22As hie yn hilt myrgeddin stiagh marish y vlod; dy row ad coodit lesh y vlennick, myr shen nagh voddagh eh tayrn y daggar ass e volg; as haink yn trustyr magh. 23Eisht chossyn Ehud magh trooid y phorch, as yeigh eh dorryssyn y chamyr er, as ghliass eh ad. 24Erreish da ver n’gholl magh haink e harvaantyn; as tra honnick ad dy row dorryssyn y chamyr glast, dooyrt ad, Shickyr t’eh coodaghey e chassyn [dy chadley] ayns e hiamyr-souree. 25As duirree ad derrey ghow ad yindys; as cur-my-ner, tra nagh doshil eh dorryssyn y chamyr, ghow ad ogher as doshil ad: as cur-my-ner, hooar ad nyn jiarn ny lhie marroo er y laare. 26As chossyn Ehud roish choud’s v’ad farkiagh, as v’eh er roshtyn harrish ny quarreeyn, as er chosney gys Seirath. 27As haink eh gy-kione, tra v’eh er jeet, dy heid eh trumpet er slieau Ephraim, as haink cloan Israel sheese mârish veih’n clieau, as eshyn rhymboo. 28As dooyrt eh roo, Eiyr-jee orrym’s: son ta’n Chiarn er livrey ny Moabiteyn nyn noidyn gys nyn laue. As hie ad sheese geiyrt er, as hie ad harrish aaghyn Yordan ta leeideil gys Moab, as cha lhiggagh ad dooinney dy gholl harrish.

29As varr ad jeh ny Moabiteyn ec y traa cheddin mysh jeih thousane dooinney, ooilley deiney lajer as dunnal; as cha ren dooinney jeu scapail. 30Myr shen va Moab er ny choyrt fo-chosh er y laa shen liorish laue Israel. As va shee ec y cheer kiare-feed bleïn.

31As ny lurg-syn hrog Shamgar, mac Anath, varr jeh ny Philistinee shey cheead dooinney lesh lorg immanagh: as ren eshyn myrgeddin livrey Israel.