CAB. IV

1As reesht ren cloan Israel olk ayns shilley’n Chiarn lurg baase Ehud. 2As ren y Chiarn ad y chreck gys laue Yabin ree Chanaan, va reill ayns Hazor; captan e heshaght-chaggee va Sisera, va e chummal ayns Harosheth jeh ny ashoonyn. 3As ren cloan Israel gaccan gys y Chiarn; son va echey nuy cheead fainagh yiarn; as son feed bleïn ren eh dy mooar seaghney cloan Israel.

4As va Deborah yn phadeyr, ben Lapidoth, briwnys Israel ec y traa shen. 5As v’ee cummal fo billey-palm Deborah, eddyr Ramah as Beth-el ayns cronk Ephraim; as hie cloan Israel seose huic son briwnys. 6As hug ee chaghteraght gys Barak mac Abinoam veih Kedesh-naphtali, as dooyrt ee rish, Nagh vel y Chiarn Jee Israel er harey, gra, Immee, as tayrn gys slieau Tabor, as gow mayrt jeih thousane dooinney jeh cloan Naphtali, as jeh cloan Zebulun? 7As tayrn-yms hood, gys awin Kishon, Sisera captan armee Yabin, marish ny fainee echey as e heshaght-chaggee; as livrey-yms eh gys dty laue. 8As dooyrt Barak r’ee, My hed uss mârym, eisht neem’s goll: agh mannagh jed uss mârym, eisht cha jean-yms goll. 9As dooyrt ee, Neem’s son shickyrys goll mayrt: agh ny-yeih cha bee’n jurnah shoh t’ou dy ghoaill gys dty ooashley; son nee’n Chiarn Sisera y livrey gys laue ben. As hrog Deborah urree, as hie ee marish Barak gys Kedesh.

10As ren Barak Zebulun as Naphtali y vusteral ec Kedesh; as hie eh seose lesh jeih thousane dooinney ec e voynyn: as hie Deborah seose mârish. 11Nish va Heber yn Kenite, va jeh cloan Hobab ayr-’sy-leigh Voses, er scarrey eh-hene veih ny Keniteyn, as er scughey e chabbane gys cheer-rea Zaanaim, va liorish Kedesh. 12As dinsh ad da Sisera dy row Barak mac Abinoam er n’gholl seose gys slieau Tabor. 13As ren Sisera chaglym cooidjagh ooilley ny fainee echey, nuy cheead fainagh yiarn, as ooilley’n cheshaght va mârish, veih Harosheth jeh ny ashoonyn gys awin Kishon. 14As dooyrt Deborah rish Barak, Seose oo; son er y laa shoh nee’n Chiarn livrey Sisera gys dty laue: nagh vel y Chiarn er n’gholl magh royd? Myr shen hie Barak sheese veih slieau Tabor, as jeih thousane dooinney geiyrt er. 15As hug y Chiarn fo-chosh Sisera, as ooilley ny fainee, as ooilley e heshaght-chaggee, lesh foyr y chliwe, kiongoyrt rish Barak; myr shen dy ren Sisera tarlheim jeh’n fainagh, as chossyn eh ersooyl ry-chosh. 16Agh deiyr Barak er ny fainee, as er y cheshaght-chaggee, derrey Harosheth jeh ny ashoonyn: as huitt ooilley sheshaght-caggee Sisera roish foyr y chliwe; as cha row dooinney jeu faagit. 17Agh chossyn Sisera ersooyl ry-chosh gys cabbane Jael ben Heber yn Kenite: son va shee eddyr Jabin ree Hazor as thie Heber yn Kenite.

18As hie Jael magh quail Sisera, as dooyrt ee rish, Chyndaa stiagh, my hiarn, chyndaa stiagh hym’s, ny bee aggle ort: as tra v’eh er jeet stiagh ayns y chabbane, ren ee coodaghey eh lesh curleïd. 19As dooyrt eh r’ee, Cur dou, ta mee guee ort, red beg dy ushtey dy iu, son ta mee paagh: as doshil ee saagh dy vainney, as hug ee jough da, as ren ee eh y choodaghey. 20Eisht dooyrt eh r’ee, Shass ayns dorrys y chabbane; as my hig dooinney erbee dy vriaght jeed, Vel dooinney erbee ayns shoh? dy jir uss, Cha vel. 21Eisht ghow Jael ben Heber unnane jeh kibbinyn y chabbane, as hammar ny laue, as hayrn ee dy aashagh er-gerrey da, as woaill ee yn kibbin trooid e chione, as ren ee shickyr jeh ’sy thalloo; (son v’eh ny hrome chadley, as skee:) myr shen hooar eh baase. 22As cur-my-ner, myr va Barak er-eiyrt’s Sisera, haink Jael magh ny whail, as dooyrt ee rish, Tar stiagh, as jeeagh-yms dhyt yn dooinney t’ou dy hirrey. As tra haink eh stiagh ayns y chabbane eck, cur-my-ner, va Sisera ny lhie marroo, as y kibbin trooid cuishlin e ching. 23Myr shen hug Jee fo-chosh er y laa shen Jabin ree Chanaan roish cloan Israel. 24As va laue cloan Israel er ny niartaghey, dy dooar ad y varriaght er Jabin ree Chanaan, derrey v’ad er stroie Jabin ree Chanaan.