CAB. V

1Eisht ghow Deborah, as Barak mac Abinoam, arrane-moyllee er y laa shen, gra, 2Cur-jee moylley da’n Chiarn son goaill cooilleeney da Israel, tra ren y pobble dy arryltagh chebbal ad hene. 3Clasht-jee, O shiuish reeaghyn; eaisht-jee shiuish phrinceyn: neem’s, dy jarroo mish, nee goaill arrane gys y Chiarn; neem’s arrane-moyllee y ghoaill gys y Chiarn Jee Israel. 4Hiarn, tra hie uss magh veih Seir, tra v’ou nyn leeideilagh trooid magher Edom, ren y thalloo craa, as yn aer taarnaghey, gheayrt ny bodjallyn myrgeddin neose thooillaghyn. 5Roish y Chiarn ren ny sleityn lheïe, eer Sinai hene roish y Chiarn Jee Israel. 6Ayns laghyn Shamgar mac Anath, ayns laghyn Jael, cha row ny raaidyn mooarey er nyn daaghey, as ghow ny troailtee raaidyn follit. 7Hie ny baljyn-cheerey naardey, hie ad naardey ayns Israel, derrey dirree mish Deborah, derrey dirree mish my voir ayns Israel. 8Reih ad jeeghyn noa; eisht va caggey ayns ny giattyn: row scape ny shleiy ry-akin mastey da-eed thousane ayns Israel? 9Ta my chree lesh leeideilee Israel, ren dy arryltagh chebbal ad-hene mastey’n pobble. Bannee-jee yn Chiarn. 10Cur-jee moylley, shiuish ta markiagh er assylyn baney; shiuish ta soie ayns briwnys, as shiuish ta shooyl er y raad. 11Adsyn t’er nyn livrey veih feiyr-caggee ny sideyryn liorish ny chibbraghyn ushtey, shen y raad nee ad loayrt jeh obbraghyn cairal y Chiarn, eer e obbraghyn cairal rish cummaltee e valjyn-cheerey ayns Israel: eisht nee pobble y Chiarn reesht taaghey ny giattyn. 12Dooisht oo, dooisht oo, Deborah; dooisht, dooisht; gow lesh dt’arrane-moyllee: trog ort, Barak, as leeid dty chappee ayns cappeeys, uss vac Abinoam. 13Eisht va reill echeysyn va er-mayrn harrish princeyn nyn noidyn: yn Chiarn t’er choyrt dooys barriaght harrish y vooinjer niartal. 14Ass Ephraim haink fraue jeu noi Amalek; dty lurg’s, haink Benjamin, mastey dty phobble: veih Machir haink sheese fir-reill, as veih Zebulun adsyn ta geiyrt pen y scrudeyr. 15As va princeyn Issachar marish Deborah; eer Issachar, as myrgeddin Barak; eh hene as e heshaght rish nyn gosh ’sy choan. Son streeughyn Reuben va ymmodee smooinaghtyn dowiney cree. 16Cre’n-fa duirree uss mastey ny bwoailtchyn keyrragh, dy chlashtyn eam ny shioltaneyn? Son streeughyn Reuben va ymmodee smooinaghtyn dowiney cree. 17Duirree Gilead cheu elley dy Yordan: as cre’n-fa va Dan cur rish e lhuingys? duirree Asher rish oirr ny marrey, as v’eh ny haaue ayns ny purtyn. 18Va Zebulun as Naphtali sleih heb ad-hene gys dangere baaish ayns yrjid y vagher-caggee. 19Haink reeaghyn gys y chaggey; eisht ren reeaghyn Chanaan caggey ec Taanach rish ushtaghyn Megiddo: cha ren ad leagh-caggee erbee y ghoaill. 20Ren ny niaughyn caggey; ren ny rollageyn ayns nyn goorse caggey noi Sisera. 21Ren awin Kishon sceabey ad ersooyl, yn shenn awin cheddin, awin Kishon. O my annym, t’ou er choyrt niart fo-chosh. 22Eisht va yngnyn ny cabbil brisht liorish stampey, liorish lheimyragh nyn gabbil trean. 23Gwee-jee mollaght er Meroz, (dooyrt ainle y Chiarn;) gwee-jee mollaght trome er ny cummaltee eck; er-yn-oyr nagh daink ad gys cooney yn Chiarn, gys cooney’n Chiarn noi’n vooinjer niartal. 24Bannit erskyn mraane vees Jael ben Heber yn Kenite, bannit vees ee erskyn mraane ayns y chabbane. 25Hir eh ushtey, as hug ee da bainney; hoie ee roish eeym ayns claare stoamey. 26Hug ee e laue gys y treiney, as e laue yesh gys hammar yn obbree; as lesh yn hammar woaill ee Sisera, woaill ee trooid e chione eh, tra v’ee er hoylley as er woalley trooid baaishyn e ching. 27Ec ny cassyn eck chroym eh, huitt eh, lhie eh sheese: ec ny cassyn eck chroym eh, huitt eh: raad chroym eh, shen y raad huitt eh sheese marroo. 28Yeeagh moir Sisera magh er yn uinniag, as deïe ee veih e shamyr, Cre’n-oyr ta’n fainagh echey fuirriaght choud? cre ta cumrail queeylyn e ainagh? 29Hug ny ladeeyn creeney eck ansoor jee, dy jarroo, hug ee ansoor jee hene, 30Nagh vel ad er speedeil? nagh vel ad er rheynn y spooilley; da dagh dooinney moidyn ny jees? da Sisera spooilley dy choamraghyn aalin dy chaghlaaghyn daah, spooilley dy choamraghyn aalin dy chaghlaaghyn daah dy obbyr-snaidey, dy choamraghyn aalin dy chaghlaaghyn daah dy obbyr-snaidey er dagh cheu, dy hoiaghey magh ny mwannallyn ocsyn ta goaill y spooilley? 31Shen myr lhig da ooilley dty noidyn cherraghtyn, O Hiarn: agh lhig dauesyn ta graihagh ersyn ve myr y ghrian tra te goll magh ayns e niart. As va’n cheer ec shee son da-eed bleïn.