CAB. VI

1As ren cloan Israel olk reesht ayns shilley yn Chiarn; as livrey yn Chiarn ad gys laue Vidian shiaght bleeaney. 2As va laue Vidian er ny niartaghey noi Israel: as er-aggle roish ny Midianiteyn ren cloan Israel daue hene ooigyn ayns ny sleityn, as guaggyn follit, as cashtallyn lajer. 3As shen myr ve, tra va Israel er chuirr, dy daink ny Midianiteyn seose, marish ny Amalekiteyn, as cloan y shiar, noi oc; 4As ren ad campal nyn ’oï, as stroie ad messyn y thallooin, choud’s Gaza; as cha daag ad veg y veaghey da Israel, chamoo keyrrey, ny dow, ny assyl. 5Son haink ad seose lesh nyn maase as nyn gabbaneyn, as haink ad myr locustyn ayns earroo, son va chammah ad-hene as ny camelyn oc erskyn coontey: as haink ad stiagh ayns y cheer dy chur mow eh. 6As va Israel er ny injillaghey gys lhag stayd kyndagh rish ny Midianiteyn; as deïe cloan Israel gys y Chiarn.

7As haink eh gy-kione, tra ren cloan Israel aghin gys y Chiarn kyndagh rish ny Midianiteyn, 8Dy dug y Chiarn gys cloan Israel phadeyr, dooyrt roo, Shoh, myr ta’n Chiarn Jee Israel gra, Hug mish lhiam shiu veih Egypt, as veih thie ny bondiaght, 9As livrey mish shiu ass laue ny Egyptianee, as veih’n laue ocsyn ooilley ren tranlaase erriu, as deiyr mee magh ad rhymbiu, as hug mee diu yn cheer oc; 10As dooyrt mee riu, She mish yn Chiarn yn Jee eu; ny gow-jee aggle roish jeeghyn ny Amoriteyn, ’sy cheer oc ta shiu cummal: agh cha vel shiu er ve biallagh gys my choraa.

11As haink 6:11 Chaghter.ainle y Chiarn, as hoie eh fo billey-darragh va ayns Ophrah, va lesh Joash yn Abi-ezrite: as va e vac Gideon bwoalley curnagh liorish yn press-feeyney, dy cheiltyn eh veih ny Midianiteyn. 12As haink ainle y Chiarn kionfenish da, as dooyrt eh rish, Ta’n Chiarn mayrt’s, uss ghooinney niartal caggee. 13As dooyrt Gideon rish, Oh my Hiarn, my ta’n Chiarn mârin, kys te eisht dy vel ooilley shoh er daghyrt dooin? as cre ta er jeet jeh ooilley e virrilyn my-nyn-gione dinsh nyn ayraghyn dooin, gra, Nagh nee yn Chiarn hug lesh shin magh ass Egypt? agh nish ta’n Chiarn er hreigeil shin, as er livrey shin gys laue ny Midianiteyn. 14As yeeagh y Chiarn er, as dooyrt eh, Immee er dty hoshiaght ayns dty niart, as saue-ee oo Israel veih laue ny Midianiteyn: nagh nee mish t’er dty choyrt? 15As dooyrt eh rish, Oh my Hiarn, kys neem’s Israel y hauail? cur-my-ner, cha vel my chynney’s agh faase ayns Manasseh, as mish s’fardalee ta ayns thie m’ayrey. 16As dooyrt y Chiarn rish, Shickyr beem’s mayrt, as nee oo bwoalley ny Midianiteyn myr dy beagh ad agh un dooinney. 17As dooyrt eh rish, My ta mee nish er gheddyn foayr ayns dty hilley, eisht cur dou cowrey dy nee uss [my Hiarn] ta taggloo rhym. 18Ny gow veih shoh, ta mee guee ort, derrey hig-yms reesht, as ver-ym lhiam my oural, dy hoiaghey eh kiongoyrt rhyt. As dooyrt eh, Fuirree-ym derrey hig oo. 19As hie Gideon stiagh, as daarlee eh mannan, as keeakyn millish jeh ephah dy flooyr: yn eill hug eh ayns baskad, as yn an-vroïe ayns pot, as hug eh lesh eh magh huggey fo’n villey-darragh, as ren eh chebbal eh. 20As dooyrt ainle Yee rish, Gow yn eill as ny berreenyn oor, as cur ad er y chreg shoh, as deayrt magh yn an-vroïe: as ren eh shen.

21Eisht heeyn ainle y Chiarn magh baare e lorg va ny laue, as venn eh rish yn eill, as ny berreenyn oor; as hrog aile seose ass y chreg, as losht eh yn eill as ny berreenyn oor. Eisht hie ainle y Chiarn seose ass e hilley. 22As tra dennee Gideon dy nee ainle y Chiarn v’ayn, dooyrt Gideon, Aless, O Hiarn Yee! son dy vel mee er vakin ainle y Chiarn eddin dy eddin. 23As dooyrt y Chiarn rish, Shee dy row hood; ny gow aggle: cha vow baase. 24Eisht hrog Gideon altar ayns shen gys y Chiarn, denmys eh eh 6:24 Dy der y Chiarn sheeJehovah-shalom: gys y laa jiu te foast ayns Ophrah jeh ny Abiezriteyn.

25As haink eh gy-kione yn oie cheddin, dy dooyrt y Chiarn rish, Gow dow aeg dty ayrey, as dow elley jeh shiaght bleeaney dy eash, as lhieg sheese altar Baal t’ec dty ayr, as giare sheese ny biljyn ta liorish; 26As trog altar gys y Chiarn dty Yee er mullagh yn chreg shoh, lurg my oardagh, as gow yn nah ghow, as cheb oural-losht lesh fuygh ny biljyn nee oo y yiarey sheese. 27Eisht ghow Gideon jeih deiney jeh e harvaantyn, as ren eh myr va’n Chiarn er ghra rish: as shen myr ve, er-yn-oyr dy row eh ayns aggle roish lught-thie e ayrey, as deiney yn ard-valley, nagh voddagh eh jannoo eh er y laa, dy ren eh eh ’syn oie.

28As tra dirree deiney yn ard-valley dy moghey, cur-my-ner, va altar Baal lhieggit, as va ny biljyn va liorish giarit sheese, as va’n nah ghow chebbit er yn altar va troggit. 29As dooyrt ad yn derrey yeh rish y jeh elley, Quoi ren yn obbyr shoh? As myr v’ad briaght as fênaght, dooyrt ad, She Gideon mac Yoash t’er n’yannoo shoh. 30Eisht dooyrt deiney yn ard-valley rish Joash, Cur lhiat magh dty vac, dy der mayd dy baase eh: er-yn-oyr dy vel eh er lhieggal altar Baal, as er yiarey sheese yn cheyll va liorish. 31As dooyrt Joash roosyn ooilley hass seose n’oï, Vel shiu pleadeil ayns lieh Baal? vel shiu shassoo seose er e hon? eshyn nee pleadeil ny lieh lhig eh ve er ny choyrt gy-baase jeeragh er y voghrey shoh: my t’eh ny yee, lhig da loayrt er e hon hene, fakin dy vel fer er lhieggal e altar. 32Shen-y-fa er y laa shen denmys eh Gideon, Jerubbaal, gra, Lhig da Baal pleadeil n’oï-syn, as cooilleeney ’ghoaill ersyn lhieg e altar.

33Eisht va ooilley ny Midianiteyn, as ny Amalekiteyn, as cummaltee’n shiar, er nyn jaglym cooidjagh, as hie ad harrish, as ren ad campal ayns coan Jezreel. 34Agh haink Spyrryd y Chiarn er Gideon, as heid eh lesh trumpet; as va deiney Abiezer er nyn jaglym geiyrt er. 35As hug eh chaghteryn magh trooid ooilley Manasseh; va myrgeddin er nyn jaglym huggey: as hug eh chaghteryn gys Asher, as gys Zebulun, as gys Naphtali; as haink ad seose ny whail.

36As dooyrt Gideon rish Jee, My nee uss Israel y hauail liorish my laue’s, myr t’ou er ghra, 37Cur-my-ner, ver-ym’s loamrey olley er y laare; as my vees yn druight ny-lomarcan er y loamrey, as my vees ooilley yn thalloo mygeayrt-y-mysh chirrym, eisht vees shickyrys aym dy jean uss sauail Israel liorish my laue’s, myr t’ou er ghra. 38As shen myr ve: son dirree eh dy moghey laa-ny-vairagh, as hionn eh dy cheilley yn loamrey, as hraisht eh yn druight ass y loamrey, lane meilley dy ushtey. 39As dooyrt Gideon rish Jee, Ny lhig da dty chorree brishey magh m’oï, as cha loayr-ym agh yn un cheayrt shoh: Cur dou, ta mee guee ort, agh un phrowal elley lesh y loamrey; lhig da’n loamrey hene nish ve chirrym, as lhig da’n druight ve er ooilley’n thalloo mygeayrt. 40As ren Jee myr shen yn oie cheddin: son va’n loamrey hene chirrym, agh va’n druight er ooilley’n thalloo mygeayrt.