CAB. VIII

1As dooyrt deiney Ephraim rish, Kys dy vel oo er hirveish shin myr shoh, nagh deïe oo orrin tra hie oo dy chaggey rish ny Midianiteyn? As v’ad feer chorree rish. 2As dooyrt eh roo, Cre ta mish nish er n’yannoo ayns soylaghey jiuish? Nagh vel jeelym fouyr-feeyney Ephraim ny share na slane fouyr-feeyney Abiezer? 3Ta Jee er livrey gys nyn laueyn princeyn Vidian, Oreb as Zeeb: as cre va mish abyl dy yannoo ayns soylaghey jiuish? Eisht va’n chorree oc er ny veiyghey, tra dooyrt eh shoh.

4As haink Gideon gys Jordan, as hie eh harrish, eh-hene, as y three cheead dooinney va mârish, faiynt, ny-yeih geiyrt orroo. 5As dooyrt eh rish deiney Succoth, Cur-jee, ta mee guee erriu, bwilleenyn arran da’n pobble ta geiyrt orrym; son t’ad gannooinaghey, as ta mee geiyrt er Zeba as Zalmunnah, reeaghyn Vidian.

6As dooyrt princeyn Succoth, Vel laueyn Zebah as Zalmunnah nish fo dty laue’s, dy jinnagh shinyn arran da’n armee ayd’s? 7As dooyrt Gideon, Shen-y-fa, tra nee yn Chiarn livrey Zebah as Zalmunna gys my laue’s, eisht neem’s raipey yn eill euish lesh drineyn yn aasagh as lesh dressyn. 8As hie eh seose veih shen gys Penuel, as loayr eh roosyn myrgeddin: as dansoor deiney Penuel eh myr ren deiney Succoth. 9As loayr eh myrgeddin rish deiney Penuel, gra, Tra hig-yms reesht ayns shee, lhieg-yms sheese y toor shoh.

10Nish va Zebah as Zalmunna ayns Karkor, as nyn sheshaght-caggee mâroo, mysh queig thousane jeig, wheesh as va er-mayrn jeh ooilley ny sheshaghtyn-caggee cloan y shiar: son huitt shey-feed thousane dooinney va tayrn y chliwe.

11As ghow Gideon e raad gys y cheer ocsyn va cummal ayns cabbaneyn, my-hiar jeh Nobah as Jogbehah, as woaill eh yn cheshaght-chaggee; va jeeaghyn orroo hene dy ve ass roshtyn dangere. 12As myr va Zebah as Zalmunna roie er-chea, deiyr eh orroo, as ghow eh yn daa ree Vidian, Zebah as Zalmunna, as skeayl eh ooilley’n cheshaght-chaggee.

13As ren Gideon mac Yoash chyndaa veih’n chaggey roish irree ny greïney. 14As haare eh dooinney aeg jeh cummaltee Succoth dy vriaght jeh: as hug eh shoh coontey da jeh princeyn Succoth, as y chanstyr, eer three-feed as shiaght-jeig. 15As haink eh gys deiney Succoth, as dooyrt eh, Cur-my-ner Zebah as Zalmunna, my-nyn-gione ren shiu boggyssagh harrym, gra, Vel laueyn Zebah as Zalmunna nish fo dty laue’s, dy jinnagh shinyn arran da dty gheiney ta skee as tooillit? 16As ghow eh shanstyryn yn ard-valley, as drineyn yn aasagh as dressyn, as lhieu shoh ren eh kerraghey dy dewil deiney Succoth. 17As vrish eh sheese toor Penuel, as varr eh deiney’n ard-valley.

18Eisht dooyrt eh rish Zebah as Zalmunna, Cre’n mec deiney v’ad shen ren shiu y varroo ee Tabor? As dreggyr ad, Myr t’ou uss, shen myr v’adsyn; va dagh fer jeu, dy yeeaghyn orroo, goll-rish cloan ree. 19As dooyrt eh, My vraaraghyn v’ad, eer mec my vayrey: myr ta’n Chiarn bio, dy beagh shiu er hauail yn vioys ocsyn, cha jinnin’s y vioys euish y ghoaill. 20As dooyrt eh rish Jether e vac shinney, Seose oo, as cur dy baase ad: agh cha hayrn y scollag e chliwe: son va aggle er, er-yn-oyr dy row eh foast agh aeg. 21Eisht dooyrt Zebah as Zalmunna, Trog hene ort, as tuitt orrin: son myr ta’n dooinney, myrgeddin ta e niart. As dirree Gideon, as varr eh Zebah as Zalmunna, as ghow eh ny colliaryn aalin va mysh mwannallyn ny camelyn oc.

22Eisht dooyrt deiney Israel rish Gideon, Reill uss harrin, chammah oo-hene as dty vac, as cloan dty chlienney myrgeddin, son t’ou livrey shin ass laue Vidian. 23As dooyrt Gideon roo, Cha jean-yms reill harrishdiu, chamoo nee my vac reill harrishdiu: yn Chiarn reillys harrishdiu.

24As dooyrt Gideon roo, Ta aghin aym dy yeearree erriu, dy der shiu ooilley dou fainaghyn-cleaysh nyn spooilley: (son va oc fainaghyn-cleaysh airhey, myr she Ishmaeliteyn v’ad.) 25As dreggyr ad, Ver mayd dy arryltagh ad. As skeayl ad garmad, as cheau ad ayn dagh dooinney fainaghyn-cleaysh e spooilley. 26As va trimmid ny fainaghyn airh ren eh y hirrey thousane as shiaght cheead shekel dy airh, cheu-mooie jeh coamraghyn, as jewellyn, as garmadyn purple v’er reeaghyn Vidian, as ny colliaryn airh va mysh mwannallyn ny camelyn. 27As jeu shoh ren Gideon Ephod, as hoie eh seose eh ayns Ophrah, yn ard-valley echey hene: as hie ooilley Israel er-shaghryn liorish coyrt ooashley da: yn red cheddin haink dy ve ribbeh da Gideon, as da e hie.

28Shoh myr va Midian er ny injillaghey fo cloan Israel, myr shen nagh hrog ad seose nyn ghing arragh: as va’n cheer ayns shee da-eed bleïn rish lhing Ghideon.

29As hie Jerubbaal mac Yoash, as chum eh ’sy hie hene. 30As va ec Gideon three-feed as jeih mec, er ny gheddyn jeh e chorp hene: son va echey ymmodee mraane. 31As y co-lhiabbagh v’echey ayns Shechem, ren ish myrgeddin gymmyrkey da mac, ren eh genmys Abimelech. 32As hooar Gideon mac Yoash baase tra v’eh shenn dy mie, as v’eh er ny oanluckey ayns lhiaght Yoash e ayr, ayns Ophrah jeh ny Abiezriteyn. 33As haink eh gy-kione, lurg baase Ghideon, dy ren cloan Israel chyndaa dy lhiattee, as hie ad er-shaghryn geiyrt er Baalim; as ghow ad Baal-berith dy ve yn jee oc. 34As cha ren cloan Israel cooinaghtyn er y Chiarn y Jee oc, va er livrey ad ass laueyn nyn noidyn er dy chooilley heu: 35Chamoo hoilshee ad kenjallys da thie Jerubbaal, ta shen Gideon, son ooilley ny obbraghyn mie v’eh er n’yannoo son Israel.