CAB. IX

1As hie Abimelech mac Jerubbaal gys Shechem, gys braaraghyn e vayrey, as va taggloo oc ry-cheilley, as rish ooilley lught-thie ayr e voir, gra, 2Loayr-jee, ta mee guee erriu, ayns clashtyn ooilley deiney Shechem, Cre share te diu, ooilley mec Jerubbaal, (ta three-feed as jeih persoonyn,) na un dooinney dy reill harrishdiu? cooinee-jee myrgeddin dy nee mish fer jeh’n chraue as yn eill eu hene. 3As loayr braaraghyn e vayrey mychione echey ayns clashtyn ooilley deiney Shechem ooilley ny goan cheddin: as ren ny creeaghyn oc chiow gys Abimelech; son dooyrt ad, Nyn mraar eh. 4As hug ad da three-feed as jeih peeshyn argid ass tashtaghyn thie Baal-berith; lhieu shoh ren Abimelech failley sheshaght dy gheiney awane as eddrym, ren geiyrt er. 5As hie eh gys thie e ayr ec Ophrah, as varr eh e vraaraghyn mec Jerubbaal, three-feed as jeih persoonyn, er yn un chreg: ny-yeih, va Jotham mac saa Jerubbaal faagit; son dollee eh eh-hene. 6As ren ooilley deiney Shechem chaglym cooidjagh, as ooilley deiney Millo, as hie ad as ren ad Abimelech nyn ree, liorish billey-darragh y phillar va ayns Shechem.

7As tra va shoh er ny insh da Jotham, hie eh, as hass eh er mullagh slieau Gerizim, as hrog eh seose e choraa dy ard, as dooyrt eh roo, Clasht-jee rhym’s, shiuish gheiney Shechem, dy vod Jee cur clashtyn diuish. 8Hie ny biljyn magh tra dy row dy ooilaghey ree harrystoo; as dooyrt ad rish yn billey-olive, Reill uss harrin. 9Agh dooyrt yn billey-olive roo, Bailliu mish dy aagail my veeaylys, lesh t’ad ooashlaghey Jee as dooinney, as mish dy ve soit harrish ny biljyn? 10As dooyrt ny biljyn rish yn billey-figgagh, Tar uss, as reill harrin. 11Agh dooyrt y billey-figgagh roo, Vel mish dy hreigeil my viljid, as my vess mie, as goll dy ve soit harrish ny biljyn? 12Eisht dooyrt ny biljyn rish yn billey-feeyney, Tar uss, as jean reill harrin. 13As dooyrt y billey-feeyney roo, Vel mish, dy scarrin’s rish my feeyn ta Jee as dooinney goaill boggey ayn, dy gholl dy ve soit harrish ny biljyn? 14Eisht dooyrt ooilley ny biljyn rish y dress, Tar uss, as jean reill harrin. 15As dooyrt y dress rish ny biljyn, My ta shiu dy jarroo dy ooilaghey mish dy ve ree harriu, eisht tar-jee as cur-jee nyn marrant er y scadoo aym’s; as mannagh jean shiu, lhig da aile cheet magh veih’n dress, as stroie biljyn-cedar Lebanon. 16Nish er-y-fa shen, my ta shiu er n’yannoo dy ynrick as dy cairal, ayns dy vel shiu er hoiaghey seose Abimelech dy ve nyn ree, as my ta shiu er ghellal dy mie rish Jerubbaal as e hie, as er n’yannoo rish cordail rish toilchinys e laueyn; 17(Son ren my ayr caggey er nyn son lesh gaue e vioys, as ren eh livrey shiu as laue Vidian; 18As ta shiuish nish er n’irree-magh noi thie m’ayrey, as er varroo e vec, three-feed as jeih persoonyn, er yn un chreg, as er n’yannoo Abimelech, mac e inney-veyl, ny ree harrish deiney Shechem, son dy nee nyn mraar eh;) 19My ta shiuish eisht er ghellal dy ynrick as dy cairal rish Jerubbaal as rish e hie yn laa jiu, eisht gow-jee boggey jeh Abimelech, as lhig dasyn myrgeddin goaill boggey jiuish; 20Agh mannagh vel, lhig da aile cheet magh veih Abimelech, dy stroie deiney Shechem, as thie Millo; as lhig da aile cheet magh veih deiney Shechem, as veih thie Millo, dy stroie Abimelech. 21As roie Jotham ersooyl, as chossyn eh roish, as hie eh gys Beer, as chum eh ayns shen, ayns aggle roish Abimelech e vraar.

22Erreish da Abimelech v’er reill three bleeaney harrish Israel, 23Eisht hug Jee spyrryd dy ghrogh choardail eddyr Abimelech as deiney Shechem; as ren deiney Shechem cleiy fo Abimelech: 24Dy voddagh y dewlys jeant er ny three-feed as jeih mec Jerubbaal ve cooilleenit, as yn uill oc lhie er Abimelech nyn mraar, ren ad y varroo, as er deiney Shechem, ren cooney lesh dy stroie e vraaraghyn. 25As ren deiney Shechem soiaghey sleih dy lhie cooyl-chlea er e hon ayns mullagh ny sleityn, as ren ad spooilley ooilley ny haink nyn raad: as ve inshit da Abimelech. 26As haink Gaal mac Ebed, marish e vraaraghyn, as hie ad harrish gys Shechem: as hug deiney Shechem nyn dreisht ayn. 27As hie ad magh trooid ny magheryn, roostey ny garaghyn-feeyney, as ren ad feeyn, as v’ad gennal, as hie ad gys thie yn jee oc, as ren ad gee as giu, as ghwee ad mollaght er Abimelech. 28As dooyrt Gaal mac Ebed, Quoi Abimelech, as quoi Shechem, dy jinnagh shin eshyn y hirveish? nagh nee mac Jerubbaal eh, as Zebul e chiannoort? Shirveish-jee deiney Hamor, ayr Shechem: son cre’n-fa yinnagh shin shirveish eh shoh? 29As dy baillish Jee dy beagh yn pobble shoh fo my laue’s! eisht yinnin’s Abimelech y scughey. As dooyrt eh mychione Abimelech, Niartee dty heshaght-chaggee, as tar magh.

30As tra cheayll Zebul, kiannoort yn ard-valley, goan Gaal mac Ebed, va e chorree er ny vrasnaghey. 31As hug eh chaghteryn dy follit gys Abimelech, gra, Cur-my-ner, ta Gaal mac Ebed, as e vraaraghyn er jeet gys Shechem; as Cur-my-ner, t’ad niartaghey yn ard-valley dt’oï. 32Nish er-y-fa shen, seose oo-hene, as yn pobble ta mayrt, ’syn oie, as lhie-jee cooyl-chlea ’sy vagher: 33As hig eh gy-kione, ayns y voghrey ec irree ny greïney, dy drog oo ort, as tuittym er y valley: as cur-my-ner, tra nee eshyn as e heshaght cheet magh dt’oï, eisht foddee oo jannoo roo myr hig eh lhiat.

34As hie Abimelech seose, as ooilley’n pobble va mârish, ’syn oie, as lhie ad cooyl-chlea son Shechem ayns kiare sheshaghtyn. 35As hie Gaal mac Ebed magh, as hass eh ec giat yn ard-valley: as dirree Abimelech, as y pobble va mârish, veih’n boayl-follit. 36As tra honnick Gaal yn pobble, dooyrt eh rish Zebul, Cur-my-ner, ta sleih cheet neose veih mullagh ny sleityn. As dooyrt Zebul rish, T’ou fakin scadoo ny sleityn as goaill ad son deiney. 37As loayr Gaal reesht, as dooyrt eh, Jeeagh, ta sleih cheet sheese rish mean y clieau, as ta sheshaght elley cheet rish cheer-rea Meonenim. 38Eisht dooyrt Zebul rish, C’raad ta nish boggyssagh dty veeal, tra dooyrt oo, Quoi Abimelech, dy jinnagh shin shirveish eh? Nagh nee shoh yn pobble t’ou er hoiaghey beg jeu? gow magh nish, ta mee guee ort, as jean caggey roo. 39As hie Gaal magh er kione deiney Shechem as ren eh caggey rish Abimelech. 40As deiyr Abimelech er, as ren eh chea kiongoyrt rish; as va ymmodee er nyn stroie as lhottit, eer gys beeal ny giattey. 41As va Abimelech cummal ec Arumah: as deiyr Zebul magh Gaal as e vraaraghyn veih cummal ayns Shechem. 42As haink eh gy-kione laa-ny-vairagh, dy ghow yn 9:42 Shechem.pobble magher; as ve inshit da Abimelech. 43As ghow eh yn pobble, as rheynn eh ad ayns three sheshaghtyn, as lhie eh farkiagh ayns y vagher, as yeeagh eh, as cur-my-ner, va’n pobble er jeet magh ass yn ard-valley; as dirree eh nyn ’oï, as woaill eh ad. 44As roie Abimelech as e heshaght er nyn doshiaght, as hass ad ec giat yn ard-valley: as huitt y daa heshaght elley er ooilley yn pobble va ayns ny magheryn, as stroie ad ad. 45As ren Abimelech caggey noi yn ard-valley fey-ny-laa shen; as ghow eh yn ard-valley as varr eh ny cummaltee, as lhieg eh voallaghyn yn ard-valley, as chuirr eh eh lesh sollan.

46As tra cheayll ooilley deiney toor Shechem shen, hie ad stiagh ayns cashtal lajer chiamble y jalloo Berith. 47As ve inshit da Abimelech dy row ooilley deiney toor Shechem er nyn jaglym cooidjagh. 48As hie Abimelech seose gys cronk Zalmon, eh hene as ooilley e heshaght; as ghow Abimelech teigh ny laue, as yiare eh sheese banglane jeh ny biljyn, as ghow eh, as hug eh er e gheaylin eh, as dooyrt eh rish e heshaght, Shen ny ta shiu er vakin mish jannoo, jean-jee shiuish dy tappee. 49As ren ooilley’n cheshaght myrgeddin giarey sheese, dagh dooinney e vanglane, as deiyr ad er Abimelech, as hug ad ny banglaneyn rish y chashtal, as hoie ad eh er aile; myr shen dy row ooilley ny deiney v’ayns toor Shechem er nyn stroie myrgeddin, mysh thousane dooinney as ben.

50Eisht hie Abimelech gys Thebez, as ren eh campal noi Thebez, as ghow eh eh. 51Agh va toor lajer cheu-sthie jeh’n ard-valley, as gys shen chossyn ooilley ny deiney as ny mraane, as ooilley cummaltee yn ard-valley, as ghooin ad dy shickyr nyn yeï, as hie ad seose gys mullagh y toor. 52As haink Abimelech gys y toor, as ren eh caggey n’oï, as hionn eh gys dorrys y toor dy hoiaghey er aile eh. 53Agh cheau ben dy row peesh dy chlagh-wyllin er kione Abimelech, as vrish ee dy peeshyn e chlaigin. 54Eisht deïe eh dy siyragh gys y dooinney aeg e armyder, as dooyrt eh rish, Tayrn dty chliwe, as marr mee, nagh jir ad, She ben ren y varroo eh. As roie yn dooinney aeg eh trooid, as shoh myr hooar eh baase. 55As tra honnick deiney Israel dy row Abimelech marroo, hie ad dy chooilley unnane gys e ynnyd hene.

56Myr shen ren Jee cooilleeney er Abimelech yn olk ren eh da e ayr, liorish stroie ny three-feed as jeih braaraghyn echey. 57As ooilley’n olk ren deiney Shechem ren Jee y chooilleeney er nyn ghing hene: as orroo nyn-neesht haink mollaght Jotham mac Jerubbaal.