CAB. III

1Mish y dooinney ta ainjyssagh er seaghyn liorish slatt e yymmoose. 2T’eh er my leeideil, as er chur lesh mish gys dorraghys, as cha nee gys y toilshey. 3Dy shickyr m’oï’s t’eh er ny hyndaa, t’eh chyndaa e laue m’oï fey-ny-laa: 4My eill as my chrackan t’eh er n’yannoo shenn; t’eh er vrishey my chraueyn. 5T’eh er hroggal m’oï, as er chombaasal mee mygeayrt lesh gall as angaish. 6T’eh er hoiaghey mee ayns buill dorraghey, myr adsyn ta foddey marroo. 7T’eh er chruinnaghey mee mygeayrt nagh voddym cosney magh: t’eh er n’yannoo my gheuley trome. 8Myrgeddin tra ta mee gaccan as geam, t’eh dooney magh my phadjer. 9T’eh er yeigh my raaidyn lesh claghyn giarit: t’eh er n’yannoo ny chassanyn cam. 10Dooys v’eh myr muc-awin ny lhie farkiaght, as myr lion cooyl-chlea. 11T’eh er hyndaa dy lhiattee my raaidyn, as er my raipey ayns peeshyn; t’eh er my yannoo follym-faase. 12T’eh er lhoobey e vhow, as er hoiaghey mish son mark da’n tide. 13T’eh er lhiggey sideyn e whiver ayns my veeghyn. 14Va mee son craid da ooilley my phobble, as yn ronneeaght oc fey-ny-laa. 15T’eh er my lhieeney lesh sherriuid, t’eh er n’yannoo mee er-meshtey lesh ullymar. 16T’eh myrgeddin er vrishey my eeacklyn myr claghyn-geinnee, t’eh er my choodaghey lesh leoie. 17As t’ou er scughey my annym foddey veih shee: yarrood mee my vaynrys. 18As dooyrt mee, Ta my niart, as my hreishteil er jerraghtyn veih’n Chiarn. 19Cooinaghtyn er my heaghyn as my hreihys, yn ullymar as y gall. 20Ta my annym dy kinjagh cooinaghtyn orroo, as te er ny injillaghey cheu-sthie jee’m. 21Shoh ta mee tayrn gys my chooinaghtyn, shen-y-fa ta mee ayns treishteil.

22She trooid myghinyn y Chiarn te, nagh vel shin stroit, as nagh vel e hymmey failleil. 23T’ad noa dy chooilley voghrey: s’mooar ta dt’ynrickys. 24Ta’n Chiarn my chronney, ta my annym dy ghra, shen-y-fa bee my varrant er. 25Ta’n Chiarn dooie dauesyn ta farkiaght er, da’n annym ta shirrey huggey. 26Te mie son dooinney chammah dy hreishteil, as dy meen farkiaght son saualtys y Chiarn. 27Te mie son dooinney dy ymmyrkey’n whing ayns e aegid. 28T’eh soie ny-lomarcan, as ny host, er-yn-oyr dy vel eh er n’ymmyrkey er eh. 29T’eh cur e veeal ayns y joan, ayns treishteil dy chaghlaa. 30T’eh cur e lieckan dasyn ta bwoalley eh, t’eh laadit lesh oltooan. 31Son cha jean y Chiarn tilgey jeh son dy bragh. 32Agh ga dy vel eh seaghney, foast nee eh chymmey ’ghoaill cordail rish earroo e vyghinyn. 33Son cha vel eh aggindagh er kerraghey, chamoo er seaghney cloan gheiney. 34Dy vroo fo e chassyn ooilley pryssoonee ny hooirey. 35Dy hyndaa dy lhiattee cairys dooinney fenish eddin yn er-syrjey, 36Dy chassey dooinney ayns e chooish cha vel y Chiarn lowal jeh.

37Quoi eshyn ta gra, as te cheet gy-kione, tra nagh vel y Chiarn er harey eh? 38Nagh vel mie as sie cheet magh ass beeal yn er-syrjey? 39Cre’n-fa ta dooinney bio plaiynt, dooinney son kerraghey e pheccaghyn? 40Lhig dooin ronsagh as prowal nyn raaidyn, as chyndaa reesht gys y Chiarn. 41Lhig dooin troggal seose nyn gree, marish nyn laueyn, gys Jee ayns ny niaughyn. 42Ta shin er ve foiljagh as er n’irree-magh, cha vel uss er phardooney. 43T’ou er choodaghey shin lesh dty yymmoose, as er n’yannoo tranlaase orrin: t’ou er varroo gyn erreeish. 44T’ou er choodaghey oo hene lesh bodjal, nagh ragh nyn badjer ny hrooid. 45T’ou er n’yannoo shin myr jeelym, as orch mastey’n pobble. 46Ta ooilley nyn noidyn er vosley nyn meeal nyn ’oï. 47Ta aggle as y ribbey er jeet orrin, traartys as toyrt-mow. 48Ta my hooill roie sheese lesh strooanyn ushtey, kyndagh rish toyrt-mow inneen my phobble. 49Ta my hooill shilley gyn scuirr, ny goaill fea; 50Derrey nee’n Chiarn jeeaghyn sheese, as cur-my-ner veih niau. 51Ta my hooill seaghney my chree, son ooilley inneenyn my ard-valley. 52Ren my noidyn shelg mee dy gyere gyn oyr, myr ushag. 53T’ad er yiarey jeh my vioys ayns pryssoon, as er lhie lhiack orrym. 54Ren ushtaghyn lhieeney harrish my chione, eisht dooyrt mee, Ta mee giarit jeh.

55Deïe mee er dty ennym, O Hiarn, veih diunid yn ooig. 56T’ou er chlashtyn my choraa, ny dooin dty chleaysh noi my osnaghyn, ny my accan. 57Hayrn oo er-gerrey er y laa deïe mee ort: dooyrt oo, Ny bee aggle ort. 58O Hiarn, t’ou er ghoaill seose my chooishyn anmey, t’ou er livrey my vioys. 59T’ou uss, O Hiarn, er vakin my aggair, jean uss my chooish y vriwnys. 60T’ou er vakin ooilley yn eulys oc, as ooilley ny croutyn oc m’oï. 61T’ou er chlashtyn yn oltooan oc, O Hiarn, as ooilley nyn gliaghtaghyn cluicagh m’oï. 62Ny meillyn ocsyn dirree seose m’oï, as nyn saaseyn m’oï fey-ny-laa. 63Cur-my-ner yn soie-sheese as yn irree-seose oc, t’ad jannoo mish nyn ronneeaght. 64Ver uss dauesyn, O Hiarn, cooilleeney, rere obbyr nyn laueyn. 65Ver oo daue sou-aigney, hig dty vollaght orroo. 66Nee oo geiyrt ad, as stroie ad ayns dty yymmoose, veih fo niaughyn y Chiarn.