CAB. IV

1Kys ta’n airh er jeet dy ve dorraghey! kys ta’n airh s’glenney er ny chaghlaa! ta claghyn yn ynnyd casherick ceaut magh ayns kione dy chooilley straïd. 2Mec aalin Zion, corrym rish airh ghlen, kys t’ad coontit myr siyn craie obbyr-lauee yn phasheyder! 3Ta eer raunyn ny marrey tayrn magh nyn sheeintyn, t’ad cur keeagh da ny quallianyn oc: ta inneen my phobble er n’aase dewil, myr ny ostrichyn ayns yn aasagh. 4Ta chengey yn oikan er y cheeagh lhiantyn gys e ghruntyn trooid paays: ta’n chloan aegey geearree arran, as cha vel unnane dy hirveish eh orroo. 5Adsyn va beaghey dy keiyn, t’ad treigit ayns ny straïdyn: adsyn va coamrit lesh scarleod t’ad lhie er ny torranyn. 6Son ta kerraghey mee-chairys inneen my phobble ny s’trimmey na kerraghey peccah Sodom, va stroit myr ayns shallid, as cha row laue dooinney urree. 7Va ny Nazariteyn eck ny s’glenney na sniaghtey, v’ad ny s’gilley na bainney, v’ad ny s’aalin ayns corp na rubieyn, v’ad ny sollys na’n sapphire. 8Ta’n eddin oc ny s’dorraghey na’n gheayl: s’coan ver oo enn orroo ayns ny straïdyn: ta’n crackan oc lhiantyn gys nyn graueyn: te shyrgit myr brasnag. 9Adsyn t’er nyn marroo lesh y chliwe, t’ad ny share jeh, na adsyn ta goll dy baase lesh accyrys: son t’ad shoh shymley ersooyl, as goll eig ayns feme messyn y vagheragh. 10Ta laueyn ny mraane erreeishagh er n’aarlagh yn chloan oc hene, v’ad yn beaghey oc ayns toyrt-mow inneen my phobble. 11Ta’n Chiarn er chooilleeney e eulys, t’eh er gheayrtey magh dewilys e yymmoose, as er ghreesey aile ayns Zion, as t’eh er stroie ny undinyn eck. 12Cha voddagh reeaghyn ny hooirey, ny ooilley cummaltee yn theihll credjal dy darragh y noid stiagh er Jerusalem.

13Kyndagh rish peccaghyn e phadeyryn, as mee-chairys e haggyrtyn, t’er gheayrtey fuill yn vooinjer ynrick ayns y vean eck; 14T’ad er rouail myr deiney doal ayns ny straïdyn, t’ad sollit lesh fuill, myr shen nagh voddagh deiney bentyn rish ny garmadyn oc. 15Deïe ad daue, Reue-jee, te neu-ghlen, reue-jee, reue-jee, ny tar-jee faare ad, tra ren ad chea ersooyl as rouail: dooyrt ad mastey ny ashoonyn, Cha nhegin daue cummal ny-sodjey ayns shen. 16Ta corree yn Chiarn er skeayley ad, cha der eh geill sodjey daue: cha ren ad soiaghey jeh persoon ny saggyrtyn, ny cur ammys da’n chanstyr. 17Er y hon ainyn, ta nyn sooillyn er vailleil trooid treishteil fardalagh nyn gooney: ayns nyn arrey yeeagh shin son ashoon, nagh voddagh sauail shin. 18T’ad shelg nyn gesmadyn, nagh vod mayd goll trooid nyn straïdyn: ta’n jerrey ain er-gerrey, ta nyn laghyn harrish, son ta’n jerrey ain er jeet. 19Ta ny tranlaasee ain ny s’bieau na urlee yn aer: deiyr ad shin er ny sleityn, lhie ad cooyl-chlea er nyn son ayns yn aasagh. 20Va ree ooilit y Chiarn, ennal nyn mioys, goit ayns ny ribbaghyn oc, my-e-chione dooyrt shin, Nee mayd cummal fo yn scadoo echey mastey ny ashoonyn. 21Gow boggey, as bee gennal, O inneen Edom, ta cummal ayns cheer Uz; nee yn cappan myrgeddin goll harrish hood: bee uss er-meshtey, as er dty roostey.

22Ta kerraghey dty vee-chairys cooilleenit, O inneen Zion, cha der eh lesh oo arragh gys cappeeys: gowee eh kerraghey er dty vee-chairys, O inneen Edom, ver eh briaght er dty pheccaghyn.