CAB. V

1Cooinee, O Hiarn, cre t’er jeet orrin, smooinee er, as cur-my-ner nyn oltooan. 2Ec joarreeyn ta nyn eiraght, as ny thieyn ain ec nyn noidyn. 3Ta shin cloan treigit as gyn ayr, as ta nyn moiraghyn myr mraane-treoghe. 4Ta shin er n’iu yn ushtey ain son argid, as ta’n fuygh ain creckit rooin. 5Ta ny mwannallyn ain fo tranlaase; ta shin laboragh, as cha vel aash erbee ain. 6Ta shin er heeyney magh nyn laue gys ny Egyptianee, as gys ny Assyrianee, son greme dy arran. 7Ta nyn ayraghyn er n’yannoo peccah, as t’ad er n’immeeaght, agh ta shinyn er n’ymmyrkey yn vee-chairys oc. 8Ta sharvaantyn reill harrin: cha vel ain fer dy livrey shin veih nyn laue. 9Lesh gaue nyn mioys, roish foyr y chliwe, hooar shin nyn arran ’syn aasagh. 10Va’n crackan ain doo myr yn oghe, kyndagh rish y ghortey dewil. 11Ghow ad mraane Zion er-êgin, as ny moidynyn ayns ard-valjyn Yudah. 12Ta ny princeyn croghit liorish ny laueyn oc; cha ren ad soiaghey jeh eddin y chanstyr. 13Ghow ad ny deiney aegey dy vlieh, as huitt ny scollagyn fo’n fuygh. 14Ta’n chanstyr er hreigeil yn giat; as ny deiney aegey er scuirr veih bingys nyn giaulleeaght. 15Ta boggey nyn gree ec kione, ta’n daunsin ain er ny hyndaa gys dobberan. 16Ta’n attey er duittym veih nyn gione: smerg dooin dy vel shin er n’yannoo peccah! 17Son shoh ta’n cree ain faiynt, son ny reddyn shoh ta ny sooillyn ain moal; 18Eer son slieau Zion, ta ny hraartys, te ec ny shynnee dy hooyl ayn. 19T’ou uss, O Hiarn, er-mayrn son dy bragh: dty stoyl-reeoil veih sheeloghe gys sheeloghe. 20Cre’n-fa t’ou dy yarrood shin son dy bragh, as treigeil shin son choud dy hraa? 21Chyndaa uss shin hood, O Hiarn, as bee mayd er nyn jyndaa: jean ass-y-noa nyn laghyn, myr jeh’n chenn earish. 22Agh t’ou uss dy bollagh er n’yiooldey rooin: t’ou feer jymmoosagh nyn ’oï.