CAB. I

1As deïe yn Chiarn gys Moses, as loayr eh rish veih’n chabbane-agglish, gra, 2Loayr rish cloan Israel, as abbyr roo, My ta dooinney erbee jiu cur lesh oural gys y Chiarn, ver shiu lhieu yn oural eu jeh’n maase, ta shen, jeh’n chelloo, as jeh’n chioltane. 3My vees yn oural echey son oural-losht jeh’n chelloo, lhig da chebbal fyrrynagh fegooish lheamys; nee eh chebbal eh jeh’n aigney feoilt echey hene ec dorrys y chabbane-agglish, roish y Chiarn. 4As ver eh e laue er kione y chebbal-losht, as bee soiagh jeant jeh er e hon, dy yannoo lhiasaghey ny chour. 5As nee eh yn dow y varroo kiongoyrt rish y Chiarn, as ver ny saggyrtyn mec Aaron lhieu yn uill, as nee ad spreih yn uill mygeayrt er yn altar, ta ec dorrys y chabbane-agglish. 6As nee eh fanney yn chebbal-losht, as giarey eh ayns peeshyn. 7As ver mec Aaron y saggyrt aile er yn altar, as kiartee ad y fuygh er yn aile. 8As ver ny saggyrtyn, mec Aaron, ny peeshyn, yn kione, yn eeh, dy kiart er yn aile, t’er yn altar. 9Agh y mynnagh as e chassyn nee eh niee lesh ushtey: as loshtee yn saggyrt ooilley er yn altar, dy ve oural-losht, chebbal jeant lesh aile, dy hoar millish da’n Chiarn.

10As my vees y chebbal echey jeh ny shioltaneyn, ta shen, jeh ny kirree, ny jeh ny goair, son oural-losht; ver eh lesh eh fyrrynagh fegooish lheamys. 11As nee eshyn y varroo eh rish lhiattee twoaie yn altar kiongoyrt rish y Chiarn; as nee ny saggyrtyn mec Aaron spreih yn uill ooilley mygeayrt er yn altar. 12As nee eshyn y yiarey eh ayns peeshyn, marish yn kione, as yn eeh echey: as kiartee yn saggyrt ad er y fuygh t’er aile yn altar. 13As nee eh yn mynnagh as ny cassyn y niee lesh ushtey: as ver y saggyrt lesh ad ooilley, dy lostey ad er yn altar: she oural-losht eh, chebbal jeant lesh aile, gys y Chiarn.

14As my she dy eeanlee vees e oural-losht, son chebbal gys y Chiarn, eisht ver eh lesh e hebbal jeh calmaneyn-turtle, ny jeh eean calmane. 15As ver y saggyrt lesh eh gys yn altar, as nee eh cassey yn kione jeh, as y lostey eh er yn altar; as bee yn uill echey er ny hraastey ass, rish lhiattee yn altar. 16As gowee eh ass ny scrobbaghyn echey marish y chlooie, as tilgey ad rish yn altar er y cheu har, liorish ynnyd y leoie. 17As nee eh scoltey eh lesh e skianyn er, agh cha der eh ad veih-my-cheilley: as loshtee’n saggyrt eh er y fuygh t’er aile yn altar: she oural-losht eh, chebbal jeant lesh aile, dy hoar millish gys y Chiarn.