CAB. XI

1As loayr y Chiarn rish Moses, as rish Aaron, gra roo, 2Loayr-jee rish cloan Israel gra, Ad shoh ny beiyn nee shiuish gee mastey ooilley beiyn y thallooin. 3Cre-erbee ta rheynn yn yngyn, as ta lesh cass skeilt, as caigney-cheeilley mastey ny beiyn, shen nee shiu gee. 4Agh ad shoh cha jean shiu gee, jeusyn ta caigney-cheeilley, ny jeusyn ta rheynn yn yngyn; lheid as y camel, ga dy vel eh caigney-cheeilley, agh cha vel eh rheynn yn yngyn: te neu-ghlen diu. 5As y conning, ga dy vel eh caigney-cheeilley, agh cha vel eh rheynn yn yngyn, te neu-ghlen diu. 6As yn mwaagh, er-yn-oyr, dy vel eh caigney-cheeilley, agh cha vel eh rheynn yn yngyn: te neu-ghlen diu. 7As y vuc, ga dy vel eh rheynn yn yngyn, as skeilt-chassagh; ny-yeih cha vel eh caigney-cheeilley ta neu-ghlen diu. 8Jeh’n eill oc cha jean shiu gee: as rish y chorp marroo oc cha jean shiu bentyn: t’ad neu-ghlen diu.

9Ad shoh nee shiu gee: jeh ooilley ny t’ayns ny ushtaghyn cre-erbee ta skianyn as scaailey er, ayns ny ushtaghyn, ayns ny faarkaghyn, as ayns ny awinyn; ad shen foddee shiu gee. 10As ooilley nagh vel skianyn ny scaailey orroo ayns ny faarkaghyn, as ayns ny awinyn, jeh ooilley ny ta snaue ayns ny ushtaghyn, ny jeh nhee erbee bio, ta ayns ny ushtaghyn; bee ad feohdoil diu. 11Bee ad eer feohdoil diu: cha jean shiu gee jeh’n eill oc, agh bee ny kirp oc feohdoil diu. 12Cre-erbee nagh vel skianyn, ny scaailey er ayns ny ushtaghyn, bee eh feohdoil diu.

13As shoh adsyn, vees feohdoil diu, mastey ny eeanlee; cha bee ad er nyn ee, t’ad feohdoil: yn eagle, as yn ossifrage, as yn ospray, 14As y vulture, as y shyrragh, lurg e ghooie, 15Dy chooilley feeagh lurg e ghooie, 16As y hullad, as y shawk-oie, as y chooag, as dagh shawk, lurg e ghooie, 17As yn hullad beg, as y cormorant, as yn hullad mooar, 18Yn ollay, as y pelican, as yn urley sloo, 19As y stork, yn choar lurg e ghooie, as yn earkan, as y chraitnag. 20Dy chooilley pheisteig skianagh ta snaue er kiare cassyn, bee ad feohdoil diu. 21Agh ad shoh foddee shiu gee jeh dy chooilley chretoor etlagh snauee, ta goll er kiare cassyn, as lurgaghyn oc erskyn nyn gassyn, dy lheim lhieu er y thalloo: 22Jeu shoh hene foddee shiu gee; yn locust lurg e ghooie, as y locust-meayl lurg e ghooie, as y locust sloo lurg e ghooie, as y lheimeyder-faiyr lurg e ghooie. 23Agh dy chooilley nhee etlagh elley, ta snaue er kiare cassyn, vees feohdoil diu. 24Son lioroo shoh bee shiu neu-ghlen: quoi-erbee vennys rish y chorp marroo oc, bee eh neu-ghlen derrey’n astyr. 25As quoi-erbee hroggys lesh veg jeh’n challin oc, shegin da niee e choamrey, as bee eh neu-ghlen derrey’n astyr. 26Callinyn dagh baagh ta rheynn yn yngyn, as nagh vel e chass skeilt, ny caigney-cheeilley, t’ad neu-ghlen diu: bee dagh unnane vennys roo neu-ghlen. 27As cre-erbee ta goll er e spaagyn, mastey ooilley ny beiyn kiare-chassagh, t’ad shoh neu-ghlen diu: quoi-erbee vennys rish ny callinyn oc, bee eh neu-ghlen derrey’n astyr. 28As eshyn hroggys y challin oc, lhig da niee e eaddagh, as bee eh neu-ghlen derrey’n astyr: t’ad neu-ghlen diu.

29Bee ad shoh neesht neu-ghlen diu, mastey reddyn snauee y thallooin; yn assag, as y lugh, as y tortoise lurg e ghooie, 30As y ferret, as y chameleon, as y lizard, as y chrammag, as y mole. 31T’ad shoh neu-ghlen diu mastey dy chooilley nhee snauee: quoi-erbee vennys roo, as ad marroo, bee eh neu-ghlen derrey’n astyr. 32As er cre-erbee nee veg jeu tuittym, as ad marroo, bee shen neu-ghlen; edyr eh ve saagh-fuygh, ny coamrey, ny crackan, ny sack; saagh erbee t’er ny ve ayns ymmyd, te dy ve currit ayns ushtey, as bee eh neu-ghlen derrey’n astyr: myr shen vees eh er ny ghlenney. 33As dy chooilley haagh craie, nee veg jeu tuittym ayn, cre-erbee t’ayn bee eh neu-ghlen; as nee shiu brishey eh. 34Jeh dy chooilley vee cooie son beaghey, as lheid yn ushtey dy heet er, bee eh neu-ghlen: as dy chooilley yough ta iut ass lheid y saagh, bee eh neu-ghlen. 35As dy chooilley nhee, er huittys ayrn erbee jeh’n challin, bee shen neu-ghlen, lheid as oghe, ny binkyn son siyn craie, bee ad er nyn mrishey sheese; son t’ad neu-ghlen, as bee ad neu-ghlen diu. 36Ny-yeih, farrane ny chibbyr raad ta palchey ushtey, bee shen glen: agh shen vennys rish y challin oc, bee eh neu-ghlen. 37As my ta veg jeh’n challin oc tuittym er sheel correy erbee, ta dy ve cuirt, bee shen glen. 38Agh my vees veg yn ushtey er ny choyrt er y rass, as ayrn erbee jeh’n challin oc tuittym er shen, bee eh neu-ghlen diu. 39As my ta baagh erbee, ta cooie son beaghey, geddyn baase; bee eshyn vennys rish y challin echey neu-ghlen derrey’n astyr 40As nee eshyn, ta gee jeh’n eill echey, niee e eaddagh, as bee eh neu-ghlen derrey’n astyr. 41As dagh nhee ta snaue er yn ooir bee shen feohdoil, cha bee eh er ny ee. 42Cre-erbee ta snaue er e volg, as cre-erbee ta goll er kiare cassyn, ny cre-erbee ta ny smoo dy chassyn echey, mastey ooilley reddyn snauee yn ooir, ad shoh cha jean shiu gee; son t’ad feohdoil. 43Cha jean shiu neu-ghlen jiu hene lesh red snauee erbee, chamoo nee shiu shiu hene y vroghey lioroo. 44Son mish y Chiarn y Jee eu: nee shiu er-y-fa shen shiu hene y chasherickey, as bee shiu casherick, son ta mish casherick; chamoo nee shiu neu-ghlen jiu hene lesh keint erbee dy red snauee t’er yn ooir. 45Son ta mish y Chiarn, hug lhiam shiu magh ass cheer Egypt, dy ve yn Jee eu: bee-jee shiuish er-y-fa shen casherick, son ta mish casherick. 46Shoh yn leigh mychione ny beiyn, as mychione ny eeanlee, as mychione dy chooilley cretoor bio ta snaue ayns ny ushtaghyn, as dy chooilley chretoor ta snaue er yn ooir. 47Dy scarrey eddyr neu-ghlen as glen, eddyr yn baagh ta cooie son beaghey, as y baagh nagh vel cooie.