CAB. XIII

1As loayr y Chiarn rish Moses, gra, 2Tra vees ec dooinney ayns crackan yn eill echey att, screb, ny cron sollys, as shen dy ve ayns crackan yn eill echey, goll-rish y doghan dy louraanys; eisht bee eh er ny chur lesh gys Aaron y saggyrt, ny gys fer jeh e vec ny saggyrtyn. 3As nee’n saggyrt jeeaghyn er y doghan, ayns crackan yn eill: as tra ta ny renaigyn ayns y doghan er hyndaa bane, as y doghan, ayns shilley, ny s’diuney na crackan yn eill echey; doghan dy louraanys eh: as nee’n saggyrt jeeaghyn er, as briwnys eh neu-ghlen. 4My ta’n cron sollys gial ’sy chrackan, as nagh vel eh, ayns shilley, ny s’diuney na’n chrackan, as nagh vel y fynney echey er jyndaa bane; eisht ver y saggyrt eshyn ta’n doghan er ayns boayl er-lheh, son shiaght laa. 5As nee’n saggyrt jeeaghyn er, yn chiaghtoo laa: cur-my-ner, mannagh vel y doghan, ayns y shilley echey, er n’gholl ny sodjey, as nagh vel y doghan er skeayley ayns y chrackan: eisht nee’n saggyrt eh y yeigh seose shiaght laa sodjey. 6As jeeaghee yn saggyrt er reesht, yn chiaghtoo laa er-giyn: as cur-my-ner, my ta keint dy ghooïd er y boayl doghanit, as nagh vel eh er skeayley ayns y chrackan: nee’n saggyrt briwnys eh glen: cha vel eh agh y screb: as lhig da niee e eaddagh, as bee eh glen. 7Agh my ta’n screb skeayley cooid vooar ayns y chrackan, lurg da’n saggyrt ve roïe er vakin eh son e ghlennid; bee eh er ny akin reesht liorish y taggyrt. 8As my ta’n saggyrt fakin, as cur-my-ner dy vel y screb skeayley ayns y chrackan: eisht nee’n saggyrt eshyn y vriwnys neu-ghlen; louraanys t’ayn. 9Tra ta doghan y louraanys ayns dooinney, eisht bee eh er ny chur lesh gys y taggyrt. 10As nee’n saggyrt jeeaghyn er: as cur-my-ner, my ta’n att bane ’sy chrackan, as y fynney bane, as feill vio cheet rish ayns yn att; 11She shenn louraanys t’ayn, ayns crackan yn eill echey, as nee’n saggyrt eshyn y vriwnys neu-ghlen; as cha jean eh jeigh seose eh (son trial sodjey:) son t’eh neu-ghlen. 12As my ta louraanys brishey magh dy lhean ’sy chrackan, as y louraanys skeayley harrish ooilley’n crackan echeysyn ta’n doghan er, veih e chione eer gys e chassyn, raad erbee dy vel y saggyrt jeeaghyn; 13Eisht nee’n saggyrt goaill tastey: as cur-my-ner, my ta’n louraanys er choodaghey ooilley’n eill echey, nee eh eshyn, ta’n doghan er, y vriwnys glen: te ooilley er jyndaa gial: t’eh glen. 14Agh tra ta’n eill vio cheet rish aynsyn, bee eh neu-ghlen. 15As nee yn saggyrt fakin yn eill vio, as briwnys eh neu-ghlen: son ta’n eill vio cowrey dy neu-ghlennid: she louraanys t’ayn. 16Ny my ta’n eill vio chyndaa as caghlaa bane: hig eh gys y taggyrt. 17As nee’n saggyrt jeeaghyn er: as cur-my-ner, my ta’n doghan er jyndaa bane; eisht nee’n saggyrt eshyn y vriwnys glen ta’n doghan er: t’eh glen.

18Yn eill myrgeddin ayn, eer ayns y chrackan echey, va askaid, as t’er ny lheihys, 19As ayns ynnyd yn askaid, ta att baney, as spot sollys baney, as lesh red ennagh dy yirgid, as shen er ny yeeaghyn da’n taggyrt; 20As tra ta’n saggyrt fakin eh, cur-my-ner, my te ayns shilley, ny s’diuney na’n chrackan, as y fynney er jyndaa bane: nee’n saggyrt briwnys eh neu-ghlen: she doghan y louraanys t’ayn, er vrishey magh ass yn askaid. 21Agh my nee’n saggyrt jeeaghyn er, as cur-my-ner, nagh vel veg y fynney er jyndaa bane ayn, as mannagh vel eh ny s’diuney na’n chrackan, agh te red beg dorraghey: eisht nee’n saggyrt jeigh eh seose shiaght laa. 22As my te skeayley magh mooarane ayns y chrackan, eisht nee’n saggyrt eh y vriwnys neu-ghlen; she’n louraanys t’ayn. 23Agh my ta’n cron sollys cummal ayns e ynnyd gyn skeayley, she askaid loshtee t’ayn; as nee’n saggyrt eh y vriwnys glen.

24Ny my ta feill erbee, ayns y chrackan echey, ta guin loshtee cheh, as dy vel ayns yn eill vio loshtee cron sollys, red beg jiarg, ny bane; 25Eisht nee’n saggyrt jeeaghyn er: as cur-my-ner, my ta ny renaigyn ayns y chron sollys er jyndaa bane, as ayns shilley, ny s’diuney na’n chrackan: she louraanys t’ayn er vrishey magh ayns y lostey: er shoh nee’n saggyrt eh y vriwnys neu-ghlen: te’n loihrey. 26Agh my nee’n saggyrt jeeaghyn er, as cur-my-ner, nagh vel y fynney bane er y chron sollys, as nagh vel eh veg s’diuney na’n chrackan, agh red beg dorraghey; eisht nee yn saggyrt jeigh seose eh shiaght laa. 27As nee yn saggyrt jeeaghyn er yn chiaghtoo laa: as my te er skeayley cooid vooar ayns y chrackan, eisht nee’n saggyrt eh y vriwnys neu-ghlen: yn loihrey t’ayn. 28Agh my ta’n cron sollys ’syn ynnyd myr ve, as nagh vel eh skeayley ’sy chrackan, agh jeeaghyn, red beg dorraghey; cha vel eh agh att veih’n lostey, as nee’n saggyrt eh y vriwnys glen: she chiass eh veih’n lostey.

29My ta ec dooinney ny ben doghan er y chione, ny’n aasaag, 30Eisht nee’n saggyrt jeeaghyn er y doghan: as cur-my-ner, my te, ayns shilley, ny s’diuney na’n chrackan, as fynney buigh thanney ayn: yn charrid chirrym eh, eer louraanys er y chione ny’n aasaag. 31As my ta’n saggyrt jeeaghyn er doghan y charrid, as cur-my-ner, nagh vel eh, ayns shilley, ny s’diuney na’n chrackan, as nagh vel veg y folt doo ayn: eisht nee’n saggyrt jeigh seose eshyn ta’n doghan carragh er, shiaght laa. 32As er y chiaghtoo laa nee’n saggyrt jeeaghyn er y doghan: as cur-my-ner, mannagh vel y charrid skeayley, as nagh vel y folt er jyndaa buigh ayn, as nagh vel y charrid, ayns shilley, ny s’diuney na’n chrackan. 33Bee eshyn er ny vaarey; agh y boayl carragh cha jean eh baarey: as nee’n saggyrt jeigh eh seose ta’n charrid er, shiaght laa sodjey. 34As er y chiaghtoo laa, nee’n saggyrt jeeaghyn er y boayl carragh: as cur-my-ner, mannagh vel y charrid er skeayley ’sy chrackan, ny ayns shilley, ny s’diuney na’n chrackan; eisht nee’n saggyrt eh y vriwnys glen: as nee eh niee e eaddagh, as bee eh glen. 35Agh my ta’n charrid skeayley cooid vooar ’sy chrackan lurg e ghlenney; 36Eisht nee’n saggyrt jeeaghyn er: as cur-my-ner, my ta’n charrid er skeayley ’sy chrackan, cha jean y saggyrt jeeaghyn son fynney buigh: t’eh neu-ghlen. 37Agh my ta’n charrid ayns e hilley myr ve, as dy vel folt doo er n’aase seose ayn; ta’n doghan er ny lheihys, t’eh glen: as nee’n saggyrt eh y vriwnys glen.

38Myrgeddin my ta ec dooinney ny ben ayns crackan yn eill oc spuitt sollys, ta shen spuitt sollys baney; 39Eisht nee’n saggyrt jeeaghyn; as cur-my-ner, my ta ny spuitt sollys ayns crackan yn eill oc glass; she boayl spottagh t’ayn, ta gaase ’sy chrackan; t’eh glen. 40As yn dooinney ta’n folt echey er duittym jeh e chione, cha vel eh agh meayl: t’eh glen. 41As eshyn ta’n folt echey er duittym jeh veih erskyn glaare e eddin, t’eh meayl ’syn ayrn shen; t’eh glen. 42As my ta ayns y chione meayl, cheu-chooylloo ny cheu-veealloo, ching banee jiarg; yn loihrey t’ayn, er n’irree seose ayns e chione meayl, ny erskyn e eddin meayl. 43Eisht nee’n saggyrt jeeaghyn er; as cur-my-ner, my ta att y ching bane jiarg ayns e chione meayl, ny erskyn e eddin meayl, myr ta’n louraanys ry-akin ayns crackan yn eill echey; 44T’eh ny lourane, t’eh neu-ghlen: nee’n saggyrt eh y vriwnys ooilley-magh neu-ghlen; ta’n doghan ayns e chione. 45As y lourane, ta’n doghan er, bee eh ayns eaddagh raipit, as e chione rooisht, as ver eh coodagh er e veill heose, as nee eh geam, Neu-ghlen, neu-ghlen. 46Ooilley ny laghyn vees y doghan er, t’eh neu-ghlen; t’eh neu-ghlen: nee eh baghey ny-lomarcan; cheu-mooie jeh’n champ vees e ynnyd-vaghee.

47Yn garmad neesht ta’n doghan ayn, my she garmad olley, ny garmad lieen eh. 48My she ’sy ghloo ny ’syn innagh te, dy lieen, ny dy ollan; ny ayns crackan, ny ayns obbyr erbee jeant dy chrackan: 49As my vees y spot geayney ny jiarg ayns y gharmad, ny ’sy chrackan, edyr ayns y ghloo, ny ’syn innagh, ny ayns stoo erbee dy chrackan; she doghan y louraanys t’ayn, as bee eh er ny yeeaghyn da’n taggyrt. 50As nee’n saggyrt jeeaghyn er y doghan, as ver eh dy lhiattee eshyn ta’n doghan ayn, shiaght laa. 51As nee eh jeeaghyn er y doghan y chiaghtoo laa: as my te er skeayley ayns y gharmad, edyr ayns y ghloo, ny ayns yn innagh, ny ayns obbyr erbee ta jeant jeh crackan; loihrey dewil eh; te neu-ghlen. 52Loshtee eh eisht yn garmad shen, edyr gloo ny innagh, ayns ollan ny lieen, ny stoo erbee dy chrackan, ayn ta’n doghan: son loihrey dewil eh; bee eh er ny lostey ’syn aile. 53As my hee-ys y saggyrt, as cur-my-ner, nagh vel y doghan er skeayley ’sy gharmad, edyr ayns y ghloo ny ayns yn innagh, ny ayns stoo erbee dy chrackan; 54Eisht nee’n saggyrt sarey, dy jean ad niee shen ta’n doghan ayn, as ver eh dy lhiattee eh shiaght laa sodjey. 55As nee’n saggyrt jeeaghyn er y doghan, lurg da ve nieet: as cur-my-ner, mannagh vel y doghan er caghlaa e ghaah, ga nagh vel eh er skeayley; te neu-ghlen, nee oo eh y lostey ’syn aile; te eeit ny hrooid, edyr eh ve lhome cheu-sthie ny cheu-mooie. 56As my ta’n saggyrt jeeaghyn, as cur-my-ner, dy vel y doghan red ennagh dorraghey, lurg da ve nieet; eisht nee eh shen y yiarey ass y gharmad, ny ass y chrackan, ny ass y ghloo, ny ass yn innagh. 57As my te foast cheet rish ayns y gharmad, edyr ayns y ghloo, ny ayns yn innagh, ny ayns red erbee dy chrackan; te doghan ta skeayley; nee oo lostey shen, ta’n doghan ayn, ’syn aile. 58As yn garmad, edyr gloo, ny innagh, ny jeh stoo erbee dy chrackan vees nieet, my ta’n doghan er n’gholl assdoo, eisht bee eh nieet yn nah cheayrt, as bee eh glen. 59Shoh’n leigh mychione y doghan dy louraanys, ayns garmad dy ollan ny dy lieen, edyr gloo ny innagh, ny ayns stoo erbee dy chraitnyn; dy vriwnys eh glen, ny dy vriwnys eh neu-ghlen.